23
Ka pegpanalangin ni Balaam te Israil
1 Ne ingkahiyan ni Balaam si Balak, “Peyimuwi a kayi te pitu ne altar, wey behayi a te pitu ne turu ne baka wey pitu ne lukesan ne karniru.”
2 Ne intuman ni Balak ka ingkahi ni Balaam. Ne migpanubad sikandan se daruwa te tigsabeka ne turu ne baka wey lukesan ne karniru diye te tagse altar. 3 Ne ingkahiyan ni Balaam si Balak, “Sasindeg ke naa due te kakiliran te egtutungen ne igpanubad nu taheed te eggipanew a su kema ke egpakigkita ka Magbebaye ne Manama keddi. Ne egnangenan ku re sikeykew te minsan nekey ne igkahi keddi te Manama.” Ne migtakereg e si Balaam diye te masalad ne bubungan 4 wey migpakigkita ka Manama kandin. Ne migkahi si Balaam, “In-andam kud e ka pitu ne altar ne egtutungan te igpanubad, wey migpanubad ad te tigsabeka ne turu ne baka wey lukesan ne karniru diye te tagse altar.”
5 Ne inlalahan te Manama si Balaam te igpalalag kandin, wey ingkahiyan, “Libed kad diye ki Balak wey kahii nu sikandin te ingkahi ku keykew.” 6 Ne miglibed e si Balaam diye ki Balak wey neumaan din pad sikandin duma te langun ne pangulu te Muwab ne migmanasindeg diye te kakiliran te intutung ne impanubad.
7 Ne migkahi si Balaam,
“Puun te Aram, te me bubungan dapit te igsile,
impeengkayi a ni Balak ne Hari te Muwab,
wey ingkahiyan a nikandin,
‘Dilusa nu ka me kabuhalan ni Hakub; dilusa nu ka keet-etawan te Israil!’
8 Piru egmenuwen ku naa te egdilus ka ware dilusa te Manama?
Egmenuwen ku naa te eglalag te pegdereet ka ware dereeti te Manama?
9 Puun te puntul te me bubungan, nakita ku sikandan!
Nangugpe de iya sikandan ne kandan de, wey nakanengneng sikandan ne subla pad sikandan panalangini du te duma ne me nasud.
10 Ware minsan hentew ne egpakaseel te me kabuhalan ni Hakub ne iling kasulug te alinepung.
Ware minsan hentew ne egpakaseel minsan te igkeep‑at de ne baad te me kabuhalan ni Israil.
Egpatey a perem ne iling te kamatayen te me matareng ne etew.
Egpekeiling perem kandan ka katamanan te umul ku.”
11 Ne ingkahiyan ni Balak si Balaam, “Nekey‑a seini se inggimu nu keddi? Impaangey ku sikeykew eyew egdilusen nu ka me kuntere ku, piru mania te nasi nu sikandan panalangini?”
12 Ne migtabak si Balaam, “Keilangan ne iyan ku re eglalahen ka igpalalag keddi te Manama.”
Ka igkarangeb ne pegpanalangin ni Balaam te Israil
13 Ne ingkahiyan e man‑e ni Balak si Balaam, “Eggendiye ki te lein ne inged. Ne egkakita nu diye ka sabeka ne punduk te me kabuhalan ni Israil—kene ne langun. Ne dilusa nu sikandan.” 14 Purisu indume e ni Balak si Balaam diye te kamet ni Supim ne diye te puntul te Bubungan ne Pisga. Ne miggimu sikandin diye te pitu ne altar wey migpanubad te tigsabeka ne turu ne baka wey lukesan ne karniru diye te tagse altar.
15 Ne ingkahiyan e man‑e ni Balaam si Balak, “Sasindeg ke naa due te kakiliran te egtutungen ne igpanubad nu taheed te eggipanew a su kema ke egpakigkita ka Manama keddi.”
16 Ne migpakigkite e man‑e ka Manama ki Balaam wey inlalahan e man‑e te igpalalag ki Balak, wey ingkahiyan, “Libed kad man‑e diye ki Balak wey kahii nu sikandin te ingkahi ku keykew.” 17 Ne miglibed e man‑e si Balaam diye ki Balak wey neumaan din pad iya man‑e sikandin duma te langun ne pangulu te Muwab ne migmanasindeg diye te kakiliran te intutung ne impanubad. Ne mig-inse si Balak, “Nekey‑a ka ingkahi keykew te Manama?”
18 Ne migtabak si Balaam,
“Sasindeg ka Balak ne anak ni Sipur wey pammineha a.
19 Kene ne iling te etew ka Manama, purisu kene sikandin eg-uubat.
Kene sikandin ne anak te etew, purisu kene egkaalin-halin ka suman-suman din.
Eggimuwen din iya ka minsan nekey ne eglalahen din.
Ka eglalahen din, egkeyitabu iya.
20 Nengnengi nu ne insuhu a iya te Manama te pegpanalangin te me kabuhalan ni Israil,
wey impanalanginan din en iya sikandan,
purisu kene kud seini egkabalbalawan.
21 “Ware nakita rin ne mareet diye te me kabuhalan ni Hakub.
Ware nakita rin ne kahubut diye te me kabuhalan ni Israil.
Indumaan sikandan te Manama, ne Manama ran
wey in-ila ran sikandin isip Hari dan.
22 Impalihawang sikandan te Manama puun te Ihiptu;
para kandan, egpekeiling sikandin kanekal te leew ne baka.
23 Ne ware dilus ne eg-uteng te me kabuhalan ni Hakub;
ware timbusawen ne egpakakuntere te me kabuhalan ni Israil.
Purisu egpakakahi ka me etew meyitenged te me kabuhalan ni Hakub te,
‘Amana ne kein-inuwan ka inggimu te Manama te me kabuhalan ni Israil.’
24 Ka sika ne keet-etawan
egpekeiling te liyun ne migtawalang wey andam e ne egdawi;
kene seini egbuluku taman te egkakeen din ka narawi rin
wey egkasupsup din ka langesa te napatey rin.”
25 Ne ingkahiyan ni Balak si Balaam, “Kene nud iya nasi sikandan dilusa, piru kene nu degma panalangini.”
26 Piru migtabak si Balaam, “Inlalahan kud e sikeykew te iyan ku re iya eglalahen ka igpalalag keddi te Manama.”
27 Ne ingkahiyan e man‑e ni Balak si Balaam, “Egdumeen kud e man‑e sikeykew diye te lein ne inged. Kema ke egtuhutan ke red te Manama ne egdilusen nu ka me kabuhalan ni Israil diye.” 28 Purisu indume e man‑e ni Balak si Balaam diye te puntul te Bubungan ne Piyur ne egpakapantew te disirtu. 29 Ne ingkahiyan e man‑e ni Balaam si Balak, “Peyimuwi ad man‑e te pitu ne altar kayi, wey behayi ad e man‑e te pitu ne turu ne baka wey pitu degma ne lukesan ne karniru.” 30 Ne intuman e man‑e ni Balak ka ingkahi ni Balaam. Ne migpanubad e man‑e sikandan se daruwa te tigsabeka ne turu ne baka wey lukesan ne karniru diye te tagse altar.