1 Taheed te migkekampu ka me kabuhalan ni Israil diye te Sitim, migbunsud e miggilabet ka me lukes te Muwabihanen ne me malitan. 2 Ka seini ne me malitan ka migginggat te me kabuhalan ni Israil te pegpanubad diye te me diyus-diyus dan. Ne nangekeen e ka me kabuhalan ni Israil te me halad, wey migsimba te seeye ne me diyus-diyus. 3 Sikan naa ka mig-apil e ka me kabuhalan ni Israil migsimba ki Baal diye te Piyur. Ne nalanglangetan te me kabuhalan ni Israil ka Magbebaye ne Manama. 4 Ne ingkahiyan te Magbebaye si Muwisis, “Pandakepa nu ka langun ne pangulu te me kabuhalan ni Israil wey pangimatayi nu sikandan kayi te tangkaan ku ne egkiteen te keet-etawan, eyew egkaawe e ka langet ku te me kabuhalan ni Israil.”

5 Purisu imbanasalan ni Muwisis ka me talewukum te Israil te migkahi, “Keilangan ne egpangimatayan niyu ka me etew niyu ne mig-apil migsimba ki Baal diye te Piyur.”

6 Ne due sabeka ne kabuhalan ni Israil ne migduruma te malitan ne matig-Midiyan diye te balungbalung din. Nakakita kayi si Muwisis wey ka langun ne kabuhalan ni Israil taheed te egmaninehew sikandan diye te gumawan te Balungbalung ne Temuwanan. 7 Te pegkakita kayi ni Pinihas ne anak ni Iliyasar ne anak te talagpanubad ne si Aarun, migsasindeg e sikandin wey miglihawang puun te libulunganan, wey mig-uyan te kelaab. 8 Insinundul rin ka etew diye te seled te balungbalung wey impilak din lagkes ka malitan wey mig-abbas kandan te daruwa ka kelaab. Te seini ne paahi, migpeeneng-eneng e ka pegkapatey te me kabuhalan ni Israil. 9 Piru minsan pad due, daruwe e ne pulu wey hep‑at ne libu (24,000) ka nammatey.

10 Ne ingkahiyan te Magbebaye si Muwisis, 11 “Iyan nakaawe te langet ku te me kabuhalan ni Israil si Pinihas ne anak ni Iliyasar ne anak te talagpanubad ne si Aarun, su nalangetan ma degma sikandin iling te pegkalangeti ku te me kabuhalan ni Israil ne migsupak keddi. Purisu ware ku amina te egpangimatey ka me kabuhalan ni Israil. 12 Purisu kahii nu sikandin te, ‘Eggimu a te kasabutan te keupianan duma kandin, 13 wey igbehey ku kandin wey te me kabuhalan din ka kasabutan meyitenged te pegkatalagpanubad te ware egtamanan su miglapig ma sikandin keddi wey nabulihan din ka me kabuhalan ni Israil ne napasaylu ka me sale dan.’ ”

14 Si Simri ka ngaran te kabuhalan ni Israil ne inggimatayan duma te malitan ne matig-Midiyan. Anak si Simri ni Salu ne pangulu te sabeka ne pamilya ne sakup te me kabuhalan ni Simyun. 15 Ne si Kusbi ka ngaran te malitan ne matig-Midiyan ne inggimatayan. Anak si Kusbi ni Sur ne pangulu te sabeka ne pamilya ne matig-Midiyan.

16 Ne ingkahiyan te Magbebaye si Muwisis, 17 “Isipa niyu ne kuntere niyu ka me matig-Midiyan wey pangimatayi niyu sikandan, 18 su in-isip kew ma nikandan ne me kuntere dan pinaahi te peglimbung kaniyu ne egpakasimba kew ki Baal diye te Piyur, wey tenged degma ki Kusbi ka malitan ne anak te matig-Midiyan ne pangulu. Inggimatayan si Kusbi diye te Piyur te timpu te karereetan.”