24
Ka pegpanagne ni Balaam diye te Piyur
1 Te nasabut ni Balaam ne ingkahale te Magbebaye ne Manama ka pegpanalangin te me kabuhalan ni Israil, warad sikandin migpanagne iling te hun‑a ne inggimu rin, ke kene, migtangke naan de sikandin diye te disirtu. 2 Te pegtengteng ni Balaam, nakita rin ka tagse tribu te Israil ne migkekampu. Ne in-umaan sikandin te Panisingan te Manama, 3 wey migkahi sikandin,
“Sikeddi si Balaam ne anak ni Biyur.
Malehet ka me lalag ku, nasabut ku ke nekey ka eleg,
4 su narineg ku ka lalag te Manama,
wey due impakita keddi te Maresen ne Manama.
Migpariralem a kandin wey impasabut din ka impakita rin keddi. Seini ka lalag ku:
5 ‘Amana ne mateles ka me balungbalung te me kabuhalan ni Israil ne me kabuhalan ni Hakub.
6 Egpekeiling seini te me napu ne luluahi;
egpekeiling te me pinamulaan diye te ilis te weyig,
wey egpekeiling te me kayu ne egngaranan te alu ne impamula te Magbebaye ne Manama,
wey te me sidar diye te ilis te me weyig.
7 Ne egsibu ka weyig puun te me tahuanan dan,
wey egmamula sikandan diye te tane ne egkengaweyihan.
Ne subla pad ne maresen ki Agag ka Hari dan keureme,
wey egkareyrey ka migharian din.
8 Ka Manama ka migpalihawang kandan puun te Ihiptu.
Egpekeiling sikandan kanekal te leew ne baka.
Intalu ran ka langun ne nasud ne migsukul kandan;
impanggepu-gepu dan ka me tul‑an te me kuntere dan,
wey impamane dan sikandan.
9 ✡ Hin 49:9; Hin 12:3.Egpekeiling sikandan te liyun ne eglipereng.
Ne ware egpaalag-alag ne egpukew kandan.
Egpanalanginan ka langun ne egpanalangin kandan,
wey egdilusen ka langun ne egdilus kandan.’ ”
10 Ne nalanglangetan si Balak ki Balaam wey insuntuk din te limang ne kamemeu rin ka palad din. Ne ingkahiyan din si Balaam, “Impeumew ku sikeykew eyew igparilus ka me kuntere ku, piru nasi nu mule sikandan panalangini te katatelu. 11 Sikan naa ka uli kad diye te kaniyu. Migsaad a ne eg-unahan ku sikeykew piru ware migtuhut ka Magbebaye ne Manama ne egkeunahan ka.”
12 Ne migtabak si Balaam ki Balak, “Nalingawan nu bes ka ingkahi ku te me sinuhu nu ne mig-angey keddi? Migkahi a, 13 ‘Minsan pad igbehey ni Balak keddi ka baley rin ne napenu te me pelata wey bulawan, kene ku iya egsupaken ka suhu te Magbebaye ne Manama te peggimu te minsan nekey, meupiya ma wey se mareet pinaahi re te keddi mismu ne planu. Iyan ku re iya eglalahen ka igpalalag keddi te Magbebaye ne Manama.’ ”
14 Ne ingkahiyan ni Balaam si Balak, “Na, eg-uli ad diye te keet-etawan ku kuntee. Piru te kene pad, egguhuran ku pad sikeykew te eggimuwen keureme te me kabuhalan ni Israil diye te keet-etawan nu.”
15 Ne migpabulus-bulus si Balaam ka migkahi,
“Sikeddi si Balaam ne anak ni Biyur,
malehet ka me lalag ku, nasabut ku ke nekey ka eleg.
16 Narineg ku ka lalag te Manama,
wey due impakita keddi te Maresen ne Manama.
Migpariralem a kandin wey impasabut din ka impakita rin keddi. Seini ka lalag ku:
17 ‘Nakita ku ka egkeyitabu keureme;
nakita ku ne due egkeyimu ne Hari ne egpuun te kabuhalan ni Hakub.
Egpekeiling sikandin te bituen
wey egdereetan din ka langun ne Muwabihanen
wey ka langun ne kabuhalan ni Isaw.
18 Egkatalu rin ka me kuntere din ne me matig-Idum, ka inged ne egngaranan ded man‑e te Siir,
wey egkaahew rin ka tane dan.
Piru egpabulus-bulus mule ka Israil te pegpanpanalu rin.
19 Ne due talagmandu ne egpuun te kabuhalan ni Hakub,
wey egdereetan din ka nenasame ne neuyag pad diye te me siyudad te Muwab.’ ”
20 Ne nakita degma ni Balaam ka me Amalikanen wey migkahi sikandin,
“Ka Amalik iyan subla ne maresen te langun ne nasud,
piru egdereetan ded iya man‑e seini te katamanan.”
21 Ne nakita rin degma ka me Kinihanen wey migkahi sikandin,
“Malig‑en seini se impangugpaan niyu,
iling te salag ne diye nakatahu te dalayap.
22 Piru egkareetan kew red iya man‑e ke egpandakepen kew te me matig-Asirya.”
23 Ne migpabulus-bulus pad man‑e si Balaam ka migkahi,
“Hentew naa ka egkasame ne manekal ke eggimuwen e seini te Manama?
24 Ne egmanlepew ka me talaglusud ne egmanguntud te me barku puun te Kitim,
wey egbaybayaran dan ka Asur wey ka Ibir,
piru egkahuhus ded degma ka Kitim.”
25 Ne nataman, mig-uli e si Balaam diye te ugpaan din, wey iling ded degma si Balak.