1 Ne ingkahiyan ni Muwisis ka me pangulu te me tribu te Israil, “Migsuhu ka Magbebaye ne Manama 2  ✡ Diy 23:21-23; Mat 5:33.ne emun ke egpanaad ka sabeka ne lukes wey ke egpahunlibet naa diye te Magbebaye ne due eggimuwen din wey ke kene din naa eggimuwen, keilangan ne egtumanen din iya seini.

3 “Ne emun degma egpanaad wey ke egpahunlibet naa diye te Magbebaye ka mengebay ne miglemung pad te amey wey iney rin, ne due eggimuwen din wey ke kene din naa eggimuwen, 4 wey nanengnengan te amey rin ka impahunlibet din diye te Magbebaye piru migpeeneng-eneng de, keilangan ne egtumanen din ka sika ne panaad. 5 Piru ke egbalabag ka amey rin ke egpakanengneng meyitenged te impahunlibetan din, kenad keilangan ne egtumanen din pad seini, wey egpasayluwen sikandin te Magbebaye su migbalabag ma ka amey rin.

6 “Ne emun ke egpakaasawe e ka sabeka ne mengebay taheed te duen pad impanaad din wey ke impahunlibetan naa ne ware diye te suman-suman din, 7 wey nanengnengan te iglukes din ka impahunlibetan din, piru migpeeneng-eneng de, keilangan ne egtumanen din ka sika ne panaad. 8 Piru ke egbalabag ka iglukes din ke egpakanengneng meyitenged te impahunlibetan din, kenad keilangan ne egtumanen din pad seini, wey egpasayluwen sikandin te Magbebaye.

9 “Piru ke balu wey ke in-engkeran naa ne malitan ka egpanaad wey ke egpahunlibet naa, keilangan iya ne egtumanen din ka sika ne panaad.

10 “Ne emun ke manggiasawa ne malitan ka egpanaad wey ke egpahunlibet naa ne due eggimuwen din wey ke kene din naa eggimuwen, 11 wey egpakanengneng ka iglukes din meyitenged te impahunlibetan din, piru migpeeneng-eneng de, keilangan iya ne egtumanen din ka sika ne panaad. 12 Piru ke egbalabag ka iglukes din ke egpakanengneng meyitenged te impahunlibetan din, kenad keilangan ne egtumanen din pad seini, wey egpasayluwen sikandin te Magbebaye. 13 Purisu due katenged te iglukes te pegtuhut wey pegbalabag te minsan nekey ne igpanaad wey ke igpahunlibet naa te asawa rin. 14 Piru ke egpakanengneng ka iglukes meyitenged te impahunlibetan te asawa rin diye te Magbebaye piru migpeeneng-eneng de, migpasabut naa sika ne intuhutan din ka asawa rin ne egtumanen ka langun ne panaad din. 15 Piru ke egpakanengneng ka lukes meyitenged kayi, ne wey e egbalabag ke pile e ne aldew ka eglihad, ka lukes ka egparusaan te parusa ne para perem te asawa rin.”

16 Sika ka me tulumanen ne imbehey te Magbebaye ki Muwisis meyitenged te alunggun, wey meyitenged te mengebay ne miglemung pad te amey wey iney rin.