1 Seini ka me inged ne nabayaan te me kabuhalan ni Israil te peg-awe dan te Ihiptu. Mig-awe sikandan te Ihiptu ne migpunduk-punduk wey impanguluwan sikandan ni Muwisis wey ni Aarun. 2 Ne tenged te suhu te Magbebaye ne Manama, immanlista ni Muwisis ka ngaran te inged ne migligkatan dan, wey ka me inged ne nabayaan dan.

3 Mig-awe te Ramisis ka me kabuhalan ni Israil te igkasapulu wey lalimma (15) ne aldew te an-anayan ne bulan ne iyan ka pegkeimpus te Sahakeen te Peglihad te Panalihan. Mig-awe sikandan ne due kabulut taheed te egmanetengteng kandan ka me Ihiptuhanen 4 ne egmanlelebeng te me kinakakayan ne me anak dan ne impangimatayan te Magbebaye, wey inggukuman din degma ka me diyus-diyus dan.

5 Ne mig-awe e te Ramisis ka me kabuhalan ni Israil, wey nangendiyad te Sukut, wey diyad nangekampu. 6 Ne mig-awe e man‑e sikandan te Sukut, wey nangendiyad man‑e te Itam ne ilis te disirtu, wey diyad man‑e nangekampu. 7 Ne mig-awe e man‑e sikandan te Itam, wey migpalilibed e man‑e peendiye te Pihahirut ne egkatalipag te Baal-Sipun, wey diyad man‑e nangekampu te marani te Migdul. 8 Ne nangawe e man‑e sikandan te Pihahirut, wey miglapas e te Malalab ne Dahat, wey nangipanew e man‑e te tatelu ne aldew diye te disirtu, diye te Itam. Ne diye pad man‑e sikandan nangekampu te Mara. 9 Ne mig-awe e man‑e sikandan te Mara, wey nangendiyad e man‑e te Ilim. Ne diye, due sapulu wey daruwa (12) ne sebseb, wey pitu ne pulu (70) ne kayu ne palmira. Purisu diyad man‑e sikandan nangekampu. 10 Ne mig-awe e man‑e sikandan te Ilim, wey nangendiyad e man‑e te ilis te Malalab ne Dahat, wey diyad man‑e nangekampu. 11 Ne mig-awe e man‑e sikandan te Malalab ne Dahat, wey nangendiyad e man‑e te disirtu, diye te Sin wey diyad man‑e nangekampu. 12 Ne mig-awe e man‑e sikandan te disirtu, diye te Sin, wey nangendiyad man‑e te Dupka, wey diyad man‑e nangekampu. 13 Ne mig-awe e man‑e sikandan te Dupka, wey nangendiyad man‑e te Alus, wey diyad man‑e nangekampu. 14 Ne mig-awe e man‑e sikandan te Alus, wey nangendiyad man‑e te Ripidim, wey diyad man‑e nangekampu. Ne ware weyig diye ne egkeinum te me etew. 15 Ne mig-awe e man‑e sikandan te Ripidim, wey miggendiyad e man‑e te disirtu, diye te Sinay, wey diyad man‑e nangekampu.

16 Ne mig-awe e man‑e sikandan te disirtu, diye te Sinay, wey miggendiyad man‑e te Kibrut-Hataaba, wey diyad man‑e nangekampu. 17 Ne mig-awe e man‑e sikandan te Kibrut-Hataaba, wey miggendiyad man‑e te Hasirut, wey diyad man‑e nangekampu. 18 Ne mig-awe e man‑e sikandan te Hasirut, wey miggendiyad man‑e te Ritma, wey diyad man‑e nangekampu. 19 Ne mig-awe e man‑e sikandan te Ritma, wey miggendiyad man‑e te Rimun-Piris, wey diyad man‑e nangekampu. 20 Ne mig-awe e man‑e sikandan te Rimun-Piris, wey miggendiyad man‑e te Libna wey diyad man‑e nangekampu. 21 Ne mig-awe e man‑e sikandan te Libna, wey miggendiyad man‑e te Risa, wey diyad man‑e nangekampu. 22 Ne mig-awe e man‑e sikandan te Risa, wey miggendiyad man‑e te Kihilata, wey diyad man‑e nangekampu. 23 Ne mig-awe e man‑e sikandan te Kihilata, wey miggendiyad man‑e te Bubungan ne Sipir, wey diyad man‑e nangekampu. 24 Ne mig-awe e man‑e sikandan te Bubungan ne Sipir, wey miggendiyad man‑e te Harada, wey diyad man‑e nangekampu. 25 Ne mig-awe e man‑e sikandan te Harada, wey miggendiyad man‑e te Makhilut, wey diyad man‑e nangekampu. 26 Ne mig-awe e man‑e sikandan te Makhilut, wey miggendiyad man‑e te Tahat, wey diyad man‑e nangekampu. 27 Ne mig-awe e man‑e sikandan te Tahat, wey miggendiyad man‑e te Tira, wey diyad man‑e nangekampu. 28 Ne mig-awe e man‑e sikandan te Tira, wey miggendiyad man‑e te Mitka, wey diyad man‑e nangekampu. 29 Ne mig-awe e man‑e sikandan te Mitka, wey miggendiyad man‑e te Hasmuna, wey diyad man‑e nangekampu. 30 Ne mig-awe e man‑e sikandan te Hasmuna, wey miggendiyad e man‑e te Musirut, wey diyad man‑e nangekampu. 31 Ne mig-awe e man‑e sikandan te Musirut, wey miggendiyad man‑e te Bini-Haakan, wey diyad man‑e nangekampu. 32 Ne mig-awe e man‑e sikandan te Bini-Haakan, wey miggendiyad man‑e te Hur-Hagidgad, wey diyad man‑e nangekampu. 33 Ne mig-awe e man‑e sikandan te Hur-Hagidgad, wey miggendiyad man‑e te Hutbata, wey diyad man‑e nangekampu. 34 Ne mig-awe e man‑e sikandan te Hutbata, wey miggendiyad man‑e te Abruna, wey diyad man‑e nangekampu. 35 Ne mig-awe e man‑e sikandan te Abruna, wey miggendiyad man‑e te Isiyun-Gibir, wey diyad man‑e nangekampu. 36 Ne mig-awe e man‑e sikandan te Isiyun-Gibir, wey miggendiyad man‑e te Kadis, ka disirtu ne diye te Sin, wey diyad man‑e nangekampu. 37 Ne mig-awe e man‑e sikandan te Kadis, wey miggendiyad man‑e te Bubungan ne Hur, ka eletanan te tane te Idum, wey diyad man‑e nangekampu.

38  ✡ Num 20:22-28; Diy 10:6; 32:50.Ne migtakereg diye te Bubungan ne Hur si Aarun ne talagpanubad, sumale te suhu te Magbebaye ne Manama, wey migpatey e sikandin diye. An-anayan seeye ne aldew te igkalimma ne bulan te igkeep‑at ne pulu (40) ne leg‑un puun te peg-awe te me kabuhalan ni Israil te Ihiptu. 39 Ne 123 ka idad ni Aarun te pegpatey rin diye te Bubungan ne Hur.

40 Te seeye ne timpu, ka Kanaanen ne Hari te Arad ne diye mig-ugpe te Nigib ne sakup ded te Kanaan, nakarineg ne egpalundaniyan e ka me kabuhalan ni Israil.

41 Ne puun te Hur, miggendiyad e man‑e ka me kabuhalan ni Israil te Salmuna, wey diyad man‑e nangekampu. 42 Ne mig-awe e man‑e sikandan te Salmuna, wey miggendiyad e man‑e sikandan te Punun, wey diyad man‑e nangekampu. 43 Ne mig-awe e man‑e sikandan te Punun, wey miggendiyad e man‑e sikandan te Ubut, wey diyad man‑e nangekampu. 44 Ne mig-awe e man‑e sikandan te Ubut, wey miggendiyad e man‑e sikandan te Iyi-Abarim ne eletanan te Muwab, wey diyad man‑e nangekampu. 45 Ne mig-awe e man‑e sikandan te Iyi-Abarim, wey miggendiyad e man‑e sikandan te Dibun-Gad, wey diyad man‑e nangekampu. 46 Ne mig-awe e man‑e sikandan te Dibun-Gad, wey miggendiyad e man‑e sikandan te Almun-Diblataim, wey diyad man‑e nangekampu. 47 Ne mig-awe e man‑e sikandan te Almun-Diblataim, wey miggendiyad e man‑e sikandan te kabubunganan te Abarim ne marani te Nibu, wey diyad man‑e nangekampu. 48 Ne mig-awe e man‑e sikandan te kabubunganan te Abarim, wey miggendiyad e man‑e sikandan te kanapnapuan te Muwab, te ilis te Weyig ne Hurdan ne egkatalipag te Hiriku, wey diyad man‑e nangekampu. 49 Nakalurug sikandan ka nangekampu diye te ilis te Hurdan puun te Bit-Hisimut taman te Abil-Satim ne diye te kanapnapuan te Muwab.

50 Ne taheed te diye pad sikandan te kanapnapuan te Muwab, te ilis te Weyig ne Hurdan ne egkatalipag te Hiriku, ingkahiyan te Magbebaye ne Manama si Muwisis, 51 “Kahii nu ka me kabuhalan ni Israil: Emun ke egpakalapas kew e te Hurdan peendiye tane te Kanaan, 52 keilangan ne egpandeldelen niyu ka langun ne mahinged diye wey dereeti niyu ka langun ne diyus-diyus dan ne inggimu puun te batu wey putew, wey guhusa niyu ka me panubaran dan diye te me bubungan. 53 Ne angkena niyud wey pangugpei niyud ka seeye ne tane su igbehey ku ma seeye kaniyu. 54  ✡ Num 26:54-56.Ne pama-baara niyu ka tane pinaahi te pegpintut-pintut sumale te kasuluhan te sakup te tagse tribu. Maluaha niyu ka baad te tribu ne masulug se sakup, wey malig-eta niyu re ka baad te tribu ne deisek de se sakup. Ka tane ne egkapintutan te tagse sabeka, iyan e kandin ne baad. Te seini ne paahi, egkabaad-baad niyu ka tane diye te tagse tribu.

55 “Piru ke kene niyu egpandeldelen ka me mahinged diye, ka seeye se nenasame iyan egpakabalabag kaniyu iling te egpakasundang te mata niyu wey egpakaruhi te kakiliran niyu. Egpakabehey sikandan kaniyu te kahubut. 56 Ne timul pad due, eggimuwen ku due te kaniyu ka implanu ku ne eggimuwen diye te kandan.”