1 Ne ingkahiyan e man‑e ni Muwisis ka me kabuhalan ni Israil, “Te peglihad te hep‑at ne pulu (40) ne aldew wey hep‑at ne pulu (40) ne marusilem, ingkahiyan a te Magbebaye ne Manama, ‘Sesapsap ka te daruwa ne malumpayag ne batu ne iling te an-anayan, wey takereg ke naa kayi te bubungan. Ne himu ka man‑e te tahuanan ne kayu. 2 Igsulat ku due ka insulat ku diye te an-anayan ne me batu ne impese nu. Ne itahu nu naa seini te tahuanan ne kayu.’

3 “Purisu miggimu a te tahuanan ne kayu ne egngaranan te akasya, wey migsesapsap ad te daruwa ne malumpayag ne batu ne iling te an-anayan. Ne migtakereg ad diye te bubungan wey in-uyan kud ka daruwa ne malumpayag ne batu. 4 Ne insulat e te Magbebaye ne Manama te seini se daruwa ne malumpayag ne batu, ka iling ded te seeye se an-anayan ne malumpayag ne batu. Ka ingkulit din, iyan ka Sapulu ne Balaud ne inlalag din kaniyu puun te taliware te hapuy diye te Bubungan ne Sinay te timpu ne migmanlibulung kew diye. Ne imbehey rin e seini keddi. 5 Ne migtupang ad wey intahu kud ka daruwa ne malumpayag ne batu diye te tahuanan ne inggimu ku, sumale te insuhu keddi te Magbebaye ne Manama. Ne duen ded iya kuntee seini te tahuanan.”

6  ✡ Num 20:28; 33:38.(Te seeye ne timpu, miggipanew e ka me kabuhalan ni Israil puun te me belun te me Haakanen, wey miggendiyad te Musira. Ne diyad migpatey si Aarun wey diyad degma ilebeng. Ne iyan e migsubal kandin te pegkatalagpanubad ka anak din ne Iliyasar. 7 Ne puun te Musira, miggendiyad man‑e sikandan te Gudguda wey miggendiyad man‑e te Hutbata ne masulug se bangalug ne egtulayasan te weyig. 8  ✡ Num 3:5-8.Te seeye ne timpu, in-alam te Magbebaye ne Manama ka me kabuhalan ni Libi eyew iyan eg-uyan te Tahuanan te Kasabutan din, eyew egpamakey diye te tangkaan din, wey te peg-ampu ne egpanalanginan din ka me kabuhalan ni Israil. Ne taman kuntee, sikan ded iya man‑e ka himu ran. 9 Purisu ware baari te tane ka me kabuhalan ni Libi isip egkapanunud dan ne karatuan ne inggaat, iling te duma ran ne me kabuhalan ni Israil, su iyan dan ma himu ka egpamakey te Magbebaye ne Manama niyu isip me talagpanubad.) 10  ✡ Iks 34:28.Ne migpabulus-bulus si Muwisis ka migkahi te me kabuhalan ni Israil, “Ne mig-uugpa a diye te bubungan taman te hep‑at ne pulu (40) ne aldew wey hep‑at ne pulu (40) ne marusilem, wey migpammineg ded iya man‑e keddi ka Magbebaye ne Manama, wey ware kew red nikandin pangimatayi. 11 Ingkahiyan a te Magbebaye ne Manama te egpeyipanawen ad eyew egpanguluwan ku sikaniyu te peggendiye wey peg-angken te Inged ne Insaad din te me kaap-apuan niyu.”

12 “Ne kuntee me kabuhalan ni Israil, ka imbuyu de kaniyu te Magbebaye ne Manama niyu, iyan ka egtahuren niyu sikandin wey egtumanen niyu ka langun ne igpeyimu rin, eggeyinawaan niyu sikandin, wey egpamakayen niyu te mapahetpet. 13 Tumana niyu ka langun ne balaud din ne ingkahi ku kaniyu para te keupianan niyu. 14 Kandin te Magbebaye ne Manama ka langun! Ka Magbebaye ne Manama niyu ka kamuney te aw-awangan, te titikangi ne langit, te kalibutan, wey te langun-langun de iya ne tahu kayi. 15 Piru in-alam te Magbebaye ne Manama ka me kaap-apuan niyu wey inggeyinawaan din sikandan labew te langun ne etew. Ne in-alam kew degma nikandin se me kabuhalan dan labew te langun ne nasud, wey taman kuntee, me keet-etawan kew iya nikandin. 16 Purisu puun kuntee, paruma-ruma kew e te Magbebaye ne Manama, wey kene niyud pakehala ka me ulu niyu. 17  ✡ 1Tim 6:15; Imp 17:14; 19:16; Him 10:34; Rum 2:11; Gal 2:6; Ipi 6:9.Maresen amana ka Magbebaye ne Manama niyu labew te me manama wey te me talagmandu. Mabantug sikandin wey maresen wey eleg ne egtahuren; ware eglapihan din te peggukum din, wey kene sikandin egdawat te bayad ne igbunbun te mareet. 18 Eggimuwen din ka eleg ne peggukum para te me ilu wey te me balu. Inggeyinawaan din ka me lapu ne mig-ugpe kayi te kanta, wey imbehayan din te egkakeen wey me kumbale. 19 Purisu geyinawei niyu degma ka me lapu, su me lapu kew ma degma dengan diye te Ihiptu. 20 Tahura niyu ka Magbebaye ne Manama niyu, wey pamakaya niyu sikandin. Kene kew engked kandin, wey kahi kew te egdusaan kew nikandin ke kene niyu eggimuwen ka insaad niyu. 21 Deyraya niyu sikandin su sikandin de ka Manama ne miggimu te me kein-inuwan wey makaliyas-liyas ne me himu para kaniyu ne sikaniyu mismu ka nakakita. 22  ✡ Hin 46:27; Hin 15:5; 22:17.Te timpu ne nangendiye dengan te Ihiptu ka me kaap-apuan niyu, pitu ne pulu (70) de sikandan langun, piru kuntee, impamasulug kew e te Magbebaye ne Manama niyu iling kasulug te me bituen diye te langit.”