1 Anak, pammineg ka ayad-ayad te katagseb wey katuenan ne igpanulu ku keykew 2 eyew egkateu ka ne eg-alam, wey ke egmenuwen te eglalag-lalag ne egkeilaan ne matagseb ka. 3 Su ka peglalag-lalag te egpalibug-libug ne malitan, egpekeiling keemis te teneb wey egpekeiling ka lanang te lana te ulibu. 4 Piru te katammanan, ware lein ne iggaat din keykew, ke kene, iyan de ka pepeiti iling te aperu, wey sesakiti iling te pali. 5 Emun ke eg-ikul ka kandin, egpakaruma ka kandin diye te inged te me minatey. 6 Kene sikandin eglinga-linga te dalan ne egpeendiye te umul. Ware kalintahaan din ne nalaag-laag bes sikandin.

7 Purisu pammineg kew keddi me anak, wey kene niyu iya lingawi ka iglalag ku kaniyu. 8 Pariyu kew te malitan ne iling kandin, kene kew en iya bul‑ug parani te gumawan te baley rin. 9 Emun ke kene, iyan e egpakaangken te kabantug niyu ka duma ne me etew, wey egpatey kew diye te belad te me etew ne ware keyid‑u. 10 Ne egpanguen e te me lapu ka me karatuan niyu ne inlasayan niyu. 11 Ne emun ke egkengabuyag kew e, egmandeg-uy kew e tenged te dalu ne egketket te sapu niyu. 12 Ne egpakakahi kew naan de, “Hendei naan iya te ware ki migpadisiplina wey ware ta tantanuri ka pegpasapad kanta! 13 Ware ki migpammineg wey miglinga-linga te me paney-paney te me talagpanulu kanta. 14 Purisu neyilawan ki diye te kalibulungan te keet-etawan.”

15 Kene nu limbungi ka asawa nu wey sikandin de geyinawei nu. 16 Kene ne meupiya ne egkatalagtag ka beuhan ne eg-inuman nu diye te maddiyu; kene ne meupiya ne ka sebseb nu egpakales‑ag diye te me deralanen. 17 Iyan nu re huliri ka asawa nu, wey kene ka te lein ne malitan. 18 Purisu, gale-gale kew te asawa nu, wey egpanalanginan kew perem te Magbebaye ne Manama. 19 Mateles sikandin wey mekein-inniyat iling te usa. Purisu egkeeyaman ka perem te kumeng din, wey layun ka perem egkabukusi te geyinawa rin. 20 Anak, kene ka peinniyat te egpalibug-libug ne malitan. Kene ne meupiya ne eglunggun ka te asawa te duma. 21 Nakakita ka Magbebaye te langun ne eggimuwen nu, wey egtengteng sikandin minsan hendei ka egpabaye. 22 Ka hinimuwan te maddeet ne etew, egpekeiling te baled. Egkeuney sikandan egsahad te kandan mismu ne sale. 23 Ne egpatey sikandan tenged su imbalahad dan ma ka pegdisiplina kandan, wey egkengallaag-laag sikandan tenged te egkasublaan ne keungelan dan.