6
Ka duma pad ne pegpaney-paney
1 Anak, ke migsaad ka ne iyan egbayad te utang te duma ne etew, 2 nasahilut kad e te keykew mismu ne me saad. 3 Ke neyimu nu sika, neyiketan ka te sika ne etew, piru seini himuwa nu eyew egpakaawe ka due: hendiyei nu sikandin wey peyid‑u-hid‑u ka ne kene kad e iglagkes te utang. 4 Kene ka liplipereng de wey kene ka liba-liba. 5 Luwasa nu ka pegkeetew nu iling te manuk-manuk wey ke kuleping naa ne eg-alihu puun te mangnganup.
6 Pehulen ne etew, tengtengi nu ka me iteng wey ikuli nu ke nekey ka inggimu ran eyew egmatagseb ka. 7 Minsan ware pangulu ran wey ke talagmandu naa, 8 piru egpakalimud sikandan te pegkeen te timpu te tingmeinit eyew te pegpangandam para te timpu te tingmaagsil. 9 Pehulen ne etew, egpabulus-bulus ke naan de eglipereng? Ken‑u ke naan pad eg-enew? 10 Na, liplipereng ke re iya, patutuyung, wey pangayepkep wey himmimeley. 11 Taheed te eglipereng ka, egginguma keykew ka keyirapan ne egpekeiling te etew ne due panganiban.
12 Ka maddeet ne etew wey ka me ware karuan, iyan de himu se egmanleug-leug eyew egsesalupet. 13 Egpanungkilat sikandan wey egtingyas eyew te peglimbung te duma. 14 Ne puun te maddeet ne suman-suman dan, migplanu sikandan te mareet wey layun egsesamuk. 15 Purisu sahuhune ne egginguma kandan ka karereetan; egkahule sikandan wey kenad e egpekeenew.
16 Due pitu ne klasi te etew ne igkeepes te Magbebaye ne Manama wey kene din en iya seini igkeupii:
17 Ka hambuhen,
ka ubaten,
ka eggimatey te etew ne ware sale,
18 ka egplanu te mareet,
kene egpekegteil ke kene egpekeyimu te mareet,
19 ka kene ne malehet ne talagpamalehet,
wey ka etew ne egpuunan ne egpekeg-ehet ka tahasuled.
20 Anak, tumana nu ka me suhu wey me panulu keykew te amey wey iney nu. 21 Itines* Te Hibruwanen: Ibagkes. nu layun te suman-suman nu ka me lalag dan, iling te balieg ne layun due te lieg nu. 22 Su ka me panulu dan, iyan egkitkit keykew ke eggipanew ka, wey egtameng keykew ke eglipereng ka, wey egpanulu keykew ke eggimata ka. 23 Ka me suhu egpekeiling te sulu, wey ka me panulu, iyan kalayag. Ne ka me pegsapad ka egpakameupiya keykew wey egpakamalayat te umul nu. 24 Sika ne me pegpanulu ka egpakapariyu keykew puun te mareet ne malitan wey te me lalag din ne egpekeinniyat. 25 Kene ka peinniyat te katelesan din, wey kene ka pasahilut te me sungkilatan din. 26 Egkabayaran de te senge-timman ne paan ka malitan ne egpamelegye te lawa, piru egpakapatey te lukes ka malitan ne egpalibug-libug.
27 Emun ke egparandaniyan nu te hapuy ka kumeng nu, egkatutung iya ka kumbale nu.
28 Emun ke egpandiek-diek ka te baha, egkatutung iya ka me paa nu.
29 Ne iling degma due ke egpakalibug ka te asawa te senge-etew, eglegparan ka iya.
30 Egkaayun ne egbalaharen pad te me etew ka etew ne egpanakew tenged te gutas din. 31 Piru ke egkasapenan sikandin, egbayad sikandin te pitu ne lupi wey keilangan ne igbehey rin ka langun ne kandin. 32 Ka etew ne egpanlibug, ware aperu; egdereetan din de ka pegkeetew rin. 33 Egpanlampesan sikandin wey kene egkalingawan ka pegpeyilew rin. 34 Su ka lukes ne egpangalikud te asawa, egkalanglangetan iya wey kene eg-ulung-ulung ne egsuli. 35 Kene sikandin egparuwad wey kene egkaawe ka langet din minsan mamenu karakel ka igbetad kandin.