12
1 Ka etew ne egkeupian ne egmatagseb,
egdawat ne egsaparan.
Piru ka etew ne ware salabutan, egkabelu ke egsaparan.
2 Igkahale te Magbebaye ne Manama ka meupiya ne etew,
piru eglegparan din ka egsuman-suman te mareet.
3 Ware keupianan te etew ne mareet se hinimuwan,
piru ka matareng ne etew, kene egkaweil iling te kayu ne nakareralid te maralem.
4 Igpakapeggasal te lukes wey kahalaan din ka meupiya ne asawa rin.
Piru ka mekeyilew-hilew ne malitan,
egpekeiling te dalu ne egpakadereet te tul‑an te asawa rin.
5 Meupiya ka egsumsumanen te matareng ne etew,
piru peglimbung de ka igtambag te me maddeet.
6 Egpakapatey ka me lalag te maddeet ne me etew,
piru egpakaluwas ka me lalag te me matareng.
7 Egdereetan ka me etew ne maddeet
wey ware egkasame ne kabuhalan dan,
piru egkeuyag mule ka kabuhalan te matareng.
8 Egdeyrayen ka ke matagseb ka,
piru eglemetan ka ke ungel ka.
9 Meupiya pad ka egkaayu-ayu ne migtrabahu eyew egpakakeen
du te migpapitew-pitew ne ubag kun meyaman piru mig-antus te gutas.
10 Ka matareng ne etew, egtanggu te me mananap din,
piru ka mareet ne etew, egbayad-bayad te me ayam din.
11 Ka mabasuk ne etew, egmanubla-subla se pegkeen,
piru ka etew ne eggelebek eggimu te ware karuan, ware naa salabutan.
12 Ka maddeet ne etew, egkeupian layun ne eggimu te mareet, purisu egkengareetan sikandan.
Piru ka me matareng, kene mule egkamenu iling te kayu ne egpakaderalid te maralem wey egbebehas.
13 Ka mareet ne etew, egkasahilut te lalag din mismu,
piru ka matareng ne etew, egpakaalihu mule te samuk.
14 Ka etew ne matagseb ne eglalag-lalag, due me keupianan,
wey ka meupiya se me hinimuwan, egpakarawat te me dasag.
15 Ka ungel, migpalintutuu ne layun eleg sikandin,
piru ka me matagseb, egpammineg mule te tambag.
16 Ke eg-usihen ka ungel ne etew, mahaan sikandin egbubunlis.
Piru ka matareng ne etew, egbalaharen din de mule ke egpeyilawan sikandin.
17 Ka egkasalihan ne egpamalehet, egpangguhud te malehet.
Piru ka kene egkasalihan, egpangguhud te ubat.
18 Ka pegpangawang eglalag, egpakapasakit iling te egpakapali ne kampilan,
piru ka me lalag te matagseb, egpakabawi mule.
19 Ka kamalehetan, kene egkaawe,
piru ka ubat, kene egkaluhey.
20 Ka mareet ne etew, iyan de egsumsumanen ka peglilimbung.
Piru seeye mule se egsuman-suman te meupiya, egpakaangken te kahale.
21 Ware mareet ne egkeyitabu te etew ne matareng,
piru kasamuk de ka egkaangken te etew ne mareet.
22 Igkeepes te Magbebaye ka me ubaten,
piru igkahale din mule seeye se egmangguhud te malehet.
23 Ka matagseb ne etew, kene egpaambug te katuenan din,
piru ka ungel, egwangal-wangal iya te keungelan din.
24 Egkeyimu ne ahalen ka mabasuk,
piru egkeuripen ka pehulen.
25 Egpakarereet te suman-suman ka pegkalaggew,
piru egpakahale ka meupiya ne me lalag.
26 Ka matareng ne etew egpakapanulu te duma rin te eleg,
piru ka himu te maddeet ne me etew egpakapasuwey te duma.
27 Ka pehulen ne etew egdaat-daat te egkeutel rin,
piru ka mabasuk ne etew egtumpis te keingesan din.
28 Ke eg-ugpe ka ne matareng, egmalayat ka umul nu,
wey egkaluwas ka puun te kamatayen.