13
1 Ka matagseb ne anak
egpammineg ke egsaparan te amey rin.
Piru ka makehal se ulu
kene iya eg-angken te seyyup din.
2 Egdasahan ka me etew ne meupiya ne egpanlalag-lalag,
piru samuk mule ka egkaangken te seeye se me limbungen.
3 Ka etew ne egbantey te peglalag-lalag din,
migbantey te umul rin.
Piru ka etew ne egpanaweles de due eglalag, egkahunaan iya.
4 Kene egkaangken te etew ne pehulen ka igkeupii rin,
piru egkaangken mule te etew ne mabasuk ka langun ne igkeupii rin.
5 Ka matareng ne etew, egkeepes te ubat,
piru ka mareet ne etew
eggimu te mekeyilew-hilew wey egkalemetan ne me himu.
6 Ka pegkamatareng, egpakabulig te etew ne ware sale,
piru ka makasesale, egkareetan tenged te mareet ne himu rin.
7 Due me etew ne egpapitew-pitew ne ubag kun me meyaman, piru egkengaayu-ayu bes.
Ne due degma me etew ne egpapitew-pitew ne egkengaayu-ayu piru me meyaman bes.
8 Ka me meyaman, egpakabayad te umul ran eyew re egpakaawe,
piru ka egkengaayu-ayu, ware mule eglelalis te umul ran.
9 Ka matareng, egpekeiling te sulu ne lelayahi,
piru ka mareet ne etew, egpekeiling te sulu ne egkeebukan e.
10 Ka pegpaambug, egpekeyimu te samuk,
piru seeye se egpammineg te tambag, egmatagseb.
11 Ka karatuan ne ware ikalasey, mahaan de egkaawe,
piru ka karatuan ne egkatallintek te eglilimud, nasi egdakel.
12 Egpakamasakit te pusung ke mananey egkatuman ka egpallatengen,
piru egpakabehey te kahale ka natuman e ne impallateng.
13 Emun ke egbalaharen nu ka meupiya ne tambag,
egkeuyan ka iya diye te karereetan,
piru ke egpalintutuu ka te me panulu, egdasahan ka iya.
14 Ka pegpanulu te matagseb ne etew, egpekeiling te sebseb ne egbehey te umul,
wey egpakabulig keykew te peg-alihu te karereetan ne egginguma.
15 Egtahuren ka etew ne meupiya se suman-suman,
piru karereetan ka egpangkusan te etew ne kene egkasalihan.
16 Ka matagseb ne etew, egsumsumanen pad ka minsan nekey ne eggimuwen din.
Piru ka ungel ne etew, kenad egsuman-suman, purisu kenad iya egsalilung ka keungelan din.
17 Ka kene egkasalihan ne insuhu ne egpahuhuren, egpakabehey te samuk,
piru ka egkasalihan, egpekeuyan te keupianan.
18 Egkaayu-ayu wey egkeyilawan ka etew ne kene egkeupian te me tambag.
Piru egbantuhen mule ka egpammineg te me tambag.
19 Amana ka kahale te etew ke egkaangken din ka igkeupii rin.
Piru egpakamasakit te pusung te me ungel ka peg-engked te malindit.
20 Ka egduma-ruma te matagseb, egmatagseb degma,
piru ka egduma-ruma te ungel, egkabaybayaran.
21 Egdumdumaan te samuk ka me makasesale,
piru keupianan mule ka egkaangken te me matareng.
22 Ka meupiya ne etew, due igkahaat ne egkapanunud te me kabuhalan din.
Piru ka karatuan te me makasesale, egpekeendiye te me matareng.
23 Dakel perem ka uma te tane te egkaayu-ayu,
piru ware dan seini naangken tenged te maddeet ne etew ne iyan e eggakamhakam kayi.
24 Ke kene nu eglampesan ka anak nu, ware nu sikandin geyinawei,
piru ke inggeyinawaan nu ka anak nu, layun nu sikandin egdisiplinaa.
25 Due eleg ne egkakeen te me matareng,
piru layun de eggutasi ka mareet ne etew.