16
1 Ka etew ka egplanu,
piru ka Magbebaye ne Manama ka egbuut te langun.
2 Egsuman-suman ka ne eleg ka langun ne inggimu nu,
piru egpitawen te Manama ke nekey ka tuyu nu.
3 Isalig nu te Manama ka langun ne eggimuwen nu
eyew eglampus ka te me planu nu.
4 Inggimu te Magbebaye ne Manama ka langun ne due egpabulusan;
minsan ka maddeet ne etew, karereetan ka egpangkusan.
5 Egkalindit ka Magbebaye te me hambuhen,
wey egparusaan din iya sikandan.
6 Emun ke eggeyinawaan nu ka Magbebaye
wey egmatinumanen ka kandin,
egpasayluwen ka nikandin;
emun ke egkaaldek ka te Magbebaye,
egpakaalihu ka te karereetan.
7 Emun ke egpakapahale ka te Manama,
egkaalukuy nu ka me kuntere nu.
8 Meupiya pad ke due deisek ne karatuan ne naangken pinaahi te peglasey-lasey,
du te dakel ne karatuan ne naangken te mareet ne paahi.
9 Sikeykew ka egplanu,
piru ka Manama ka egpanulu keykew te dalan ne egbayaan nu.
10 Emun ke eggukum ka Hari ne egdumaan te geem te Manama
layun eleg ka peggukum din.
11 Igkeupii te Magbebaye ka eleg ne timbangan wey eleg ne sekeranan.
Sikandin ka egbuut ke egmenuwen te eggamit ka timbangan.
12 Egkalindit ka Hari te mareet ne himu,
su egmaresen ka peghari din pinaahi te pegkamatareng.
13 Egkeupian ka Hari ne egpammineg te kamalehetan
wey egkahale sikandin te etew ne egpangguhud te malehet.
14 Emun ke egkabelu ka Hari, diye egpangkus te due egkapatey ne suluhuanen,
purisu ka matagseb ne etew, egpakannekal ne egkahale kandin ka Hari.
15 Emun ke mahalew-halew ka Hari,
egmahalew-halew degma ka me etew,
wey egmeupiya ka egkatamanan dan.
Ne ka keupiya te Hari, egpekeiling te uran ne egpakapatubu te beni ne impamula.
16 Meupiya pad ne iyan nu egkaangken ka katagseb wey katuenan
du te pelata wey bulawan.
17 Ka matareng ne etew, egpariyu te mareet ne himu;
ka migtanud-tanud te pegbebatasan din,
migbantey te umul rin.
18 Ka pegpaambug, iyan egpangkusan ka karereetan,
wey ka pegparibabew, iyan egpangkusan ka egkariralem.
19 Meupiya pad ka egpariralem duma te egkengaayu-ayu,
du te egbaad-baad te karatuan duma te me hambuhen.
20 Egmatubung ka etew ne egpammineg te me panulu,
wey due keupianan te etew ne migsalig te Magbebaye ne Manama.
21 Ka matagseb ne etew egkeilaan pinaahi te meupiya ne salabutan din,
ka meupiya ne peglalag-lalag din egpakabagget amana.
22 Ka katagseb iyan sebseb te umul te me matagseb,
piru ka pegpanulu te me ungel warad iya karuan.
23 Ka matagseb ne etew, egsum-sumanen din pad ka eglalahen din,
purisu egpakabagget iya ka me lalag din.
24 Ka memeupiya ne lalag,
egpekeiling te teneb ne egpakapahale,
wey egpakameupiya te lawa.
25 Due dalan ne egkahiyen nu ne eleg,
piru egpeendiye bes seini te kamatayen.
26 Tenged te gutas, wey te igkeupii te etew te egkeen,
eglasey-lasey sikandin ne egtrabahu.
27 Ka etew ne mareet egpamitew iya te paahi
te pegdereet te duma,
wey ka peglalag-lalag din egpekeiling te migkanlabkanlab ne hapuy.
28 Ka etew ne salupeten, egpangguhud de due egpangawang te me ware karuan,
sikandin ka egpuunan ne egkasamuk wey egkareetan ka me talag-alukuy.
29 Ka mabulut ne etew eglilimbung te sumbaley rin
wey eg-akalan din eyew egkareetan.
30 Bantey kew te etew ne eggihimun-gimun
wey egpanungkilat kaniyu
su mareet ka planu rin.
31 Ka uban palinneu te kabantug;
egkaangken seini te matareng ne me etew.
32 Meupiya pad ka kene mahaan egkabelu
du te etew ne mabulut.
Meupiya pad ka egpakatigkel te pegkeetew rin;
du te etew ne egpakalusud te siyudad.
33 Egpintut-pintut ka me etew te pegnengneng te igkeupii te Manama;
piru iyan egbuut te langun ka Manama.