17
1 Meupiya pad ka egkeen te sanig ne due keupianan,
du te egsahakeen piru layun egpeehetey.
2 Ka matagseb ne suluhuanen
iyan egmandu te ungel ne anak te ahalen din,
wey egbaaran sikandin te egkapanunud din.
3 Eg-el-elehan te Magbebaye ne Manama ka pusung te etew,
iling te bulawan wey pelata ne eglenayen te hapuy.
4 Ka mareet ne etew, egpammineg te mareet ne me lalag,
wey ka ubaten ne etew, egpammineg degma te ubat.
5 Ka miglemet te egkengaayu-ayu
miglemet degma te miggimu kandan.
Egparusaan ka etew ne nasi egkahale te karereetan te duma.
6 Igpakapeggasal te me buyag ka me apu dan,
wey igpakapeggasal degma te me anak ka me amey wey me iney ran.
7 Ka talahuren ne etew, kene eglalag te ubat;
ka mareet ne etew, kene eglalag te malehet.
8 Ka sagpeng te be‑be iling te taleyid‑u te etew ne migbehey,
minsan nekey ne eggimuwen din, eglampus sikandin.
9 Ka etew ne eglingew te mareet ne neyimu te duma,
egpapitew te geyinawa,
piru ka etew ne eg-ulit-ulit te mareet,
egpekegsuwey te pegpaal-alukuyey.
10 Ka etew ne due salabutan, mahaan de egpakasabut minsan kasabeka re egsapari,
piru ka ungel, kene iya egpakasabut minsan kapapila sikandin egpanlampesi.
11 Ka etew ne mabulut, egpamitew te samuk,
wey eglusuran sikandin iling te mangngayew ne egtigkew.
12 Meupiya pad ke egpakasinug-ung ka te iney te mananap ne egngaranan te usu ne nalaahan te anak
du te egpakasinug-ung ka te ungel ne eggimu iya te mareet.
13 Ke egsulian nu te mareet ka meupiya,
layun e ne due mareet ne egkeyitabu diye te baley nu.
14 Ka egpuunan te apulanan, egpekeiling te migluluwang te subung,
sikan naa, isanggel niyud sika te kene pad egdakel.
15 Igkeepes te Magbebaye ka pegparusa te ware sale
wey ka pegpaawe te due sale.
16 Ware karuan ne egpanuluen ka ungel eyew egmatagseb,
su ware ma meupiya ne suman-suman din.
17 Egpaheyinaweey layun ka talag-alukuy,
wey ka tahasuled egpepangabangey.
18 Ka etew ne ware suman-suman,
mahaan egsaad ne iyan egbayad te utang te sumbaley rin.
19 Ka etew ne egkeupian te samuk, miggeyinawa te sale,
wey ka etew ne egparibabew, egpamitew te karereetan.
20 Ka etew ne layun egsuman-suman te mareet, kene iya egmatubung,
wey ka etew ne ubaten, iyan egpangkusan ka karereetan.
21 Ka ungel ne anak,
egpakabehey te kalaggew te amey wey iney rin.
22 Ka peggale-gale, egpakameupiya te peglelawa,
piru ka pegkalaggew, egpakarereet mule.
23 Ka mareet ne etew, egdawat te seleppi ne sagpeng te be‑be
eyew egdereetan ka eleg ne peggukum.
24 Ka matagseb ne etew egsuman-suman te eleg ne eggimuwen din.
Piru ka ungel minsan hendei re egpabulus se suman-suman.
25 Ka anak ne ungel,
egpakapalaggew re te amey rin,
wey egpakapasakit de te iney rin.
26 Kene ne eleg ne egmultaan ka ware sale,
wey ka pegdusa te etew ne matareng.
27 Ka etew ne kene egtakuseng egpangasak, duen naa salabutan;
ka etew ne egpakatigkel te pegkeetew rin, malayat naa se suman-suman.
28 Minsan ka ungel,
henduen ma te matagseb wey due salabutan ke egpeeneng-eneng de sikandin.