18
1 Ka etew ne kene eg-al-alukuy,
iyan de egsumsumanen ka pegkeetew rin,
wey egsupaken din ka eleg ne katuenan te duma.
2 Ka ungel, kene egkeupian ne egpakasabut,
iyan din de igkeupii ka egpangguhud ke nekey ka insuman-suman din.
3 Ke eggimu ka te mareet, egkalemetan ka;
ke egkaawaan ka te kabantug, egkeyilawan ka.
4 Ka eglalahen te matagseb ne etew,
egpakabehey te katagseb diye te duma;
egpekeiling seini te maralem ne sebseb ne egtulayas diye te napu.
5 Kene ne meupiya ne iyan eglapihan ka nakasale,
kene degma ne meupiya ne kene ne eleg ka peggukum te ware sale.
6 Ka me lalag te etew ne egkeungel,
iyan egpuunan ne egpakakita sikandin te apulanan,
wey egkahumian iya sikandin.
7 Ka me lalag te etew ne egkeungel,
egpekeiling te balatik ne iyan ded egpakasahilut kandin.
8 Ka pegsesalupet, egpekeiling te mananam ne egkakeen
ne amana ne mananam ne eg-abelengen.
9 Ka pehulen ne etew, egpekeiling kareet te etew ne talagguhus.
10 Ka ngaran te Magbebaye ne Manama,
egpekeiling te malig‑en ne baley
ne aputanan te me matareng eyew egpakapariyu te karereetan.
11 Migpalintutuu ka me meyaman ne egpakabulig kandan ka karatuan dan
ne migsuman-suman sikandan ne iling seini te matikang wey makepal ne alad.
12 Ka pegpaambug, egpakarereet te etew,
piru ka pegpariralem, egpakabehey kandin te bantug.
13 Ungel ka etew ne egsalemak egtabak te ware din pad nasabut ka inse,
wey egkeyilawan sikandin.
14 Egpekeuli te etew ne egderalu ka pegpakannekal rin ne egkeuyag,
piru ke kene sikandin egpakannekal, ware egpakabulig kandin.
15 Ka me matagseb eg-iman-iman ne egkatimulan ka katagseb dan,
ka talinga ran egkeupian ne egpakarineg pad te me katuenan.
16 Emun ke egkeupian ka ne egpakaparani te mabantug ne etew,
uyan ka te dasag, wey ibehey nu naa kandin.
17 Ka etew ne eggun‑a eglalag diye te husayan, hendue te eleg
taman te eggingume e ka kuntere din ne eg-inse-inse kandin.
18 Emun ke egpekeg-apul diye te hukumanan ka daruwa ne maddesen ne etew,
iyan de egpakapasanggel kandan ka pegpintut-pintut.
19 Ke egbulihan nu ka suled nu, egpangabangan ka nikandin iling te malig‑en ne siyudad.
Piru ke eg-ehetan nu sikandin,
kene ka nikandin egpangabangan.
20 Dawata nu ka egpangkusan te langun ne egpanlalahen nu,
iling te egkakeen ne egpakabulung.
21 Ka me lalag, egpakabehey te umul wey ke kamatayen naa,
wey ka seeye se egpangawang de due egpanlalag,
egsahap ded iya te egpanlalahen din.
22 Emun ke egpakaasawa kad e, nakakita kad e te keupianan,
wey migpeila sika ne impanalanginan ka te Manama.
23 Emun ke eglalag ka egkaayu-ayu, egpeyid‑u-hid‑u mule,
piru ka meyaman, malangit ne egtabak.
24 Due me talag-alukuy ne kene egkaluhey,
piru due degma me talag-alukuy ne subla pad te tahasuled.