1 Kene ka keimma te maddeet ne etew, wey kene ka alukuy kandan, 2 su iyan dan de egsumsumanen ka eggimu te mareet, wey ka pegpanlalag te egpakapasagkil te duma.

3 Ne pinaahi te katagseb wey te salabutan, igpakapes-ek ka baley wey egkeyimu ne malig‑en.

4 Ne pinaahi te katuenan, egkapenu ka sinabeng te me mahal ne karatuan.

5 Ka etew ne matagseb wey due salabutan, makeseg pad du te manekal amana ne etew, 6 su egpanalu te pegpakiggira tenged te meupiya ne tambag wey te masulug ne me planu.

7 Ka katagseb, kene egkatirew te ungel ne etew, su emun ke eglibulung ka me pangulu ne egmalalahey, ware igkalalag din.

8 Ke iyan nu re ugpe ka egplanu te mareet, eggennalan ka iya te talaggimu te samuk.

9 Sale ka pegplanu te mareet, wey igkeepes te me etew ka lemeten. 10 Ke egmahuye ka te timpu te keyirapan, migpasabut de sika ne mahuye ka iya.

11 Bulihi nu wey luwasa nu seeye se eggimatayan ne ware sale. 12 Egkaayun ne egkahi ka, “Ware hanew ku meyitenged kayi,” piru nakanengneng ka Manama ke nekey ka due te suman-suman nu, su migbebantey sikandin keykew. Egsulian ka nikandin ke nekey ka me hinimuwan nu.

13 Anak, inum ka te teneb su meupiya seini wey meemis. 14 Ne iling ded degma ka katagseb, egpakameupiya degma seini te umul nu. Ne emun ke egkaangken nu seini, egmeupiya ka eggingumaan nu wey egkatuman iya ka impallateng nu.

15 Kene ka ikul te eggimuwen te makasesale ne egpangatang wey egpanlusud diye te baley te matareng ne etew. 16 Minsan kapapitu egkapeled ka matareng ne etew, eg-enew red iya sikandin. Piru ka makasesale egkareetan iya te masumpit ne egkatamanan.

17 Kene ka kahale ke egpakaneem-neem te karereetan ka kuntere nu, wey kene ka gale-gale ke egkasaligkat sikandin. 18 Emun ke egkakita te Magbebaye ne Manama ne egkahale ka, kene sikandin egkabennalan keykew wey kene din e nasi egparusaan ka me kuntere nu.

19 Kene ka kabasuli tenged te me makasesale wey kene ka keimma te maddeet ne hinimuwan dan. 20 Su ware egkapallateng te makasesale wey egpekeiling sikandan te sulu ne egkeebukan e.

21 Anak, kaaldeki nu ka Magbebaye wey ka Hari, wey kene ka pangalukuy te me etew ne egsupak kandan. 22 Su ka iling due ne me etew, egkengareetan te senge-pele-pele de. Ne ware ki nakanengneng ke nekey ne karereetan ka igpeyinguma kandan te Magbebaye wey ke Hari naa.

23 Seini pad iya man‑e ka me lalag te matagseb ne etew:

Kene ne meupiya te sabeka ne talaggukum ne due eglapihan din. 24 Ke igpeila rin ne ware sale te nakasale, egdilusen sikandin, wey egdumutan te langun. 25 Piru ka talaggukum ne egparusa te nakasale, egpanalanginan iya wey egdeyrayen te langun.

26 Ka malehet ne me tabak egpekeiling keupiya te harek te malehet ne alukuy.

27 Impusi nu pa ka trabahu nu wey andama nu pa ka kamet nu, ne human ka pes-ek te baley nu.

28 Kene ka bayung te duma nu wey ke egpanlalag naa te ubat meyitenged kandin, ke ware eleg ne katarengan nu. 29 Kene ka kahi, “Eggimuwen ku kandin ka inggimu rin keddi, eyew egpakasuli a kandin.”

30 Miglihad a te kamet wey parasan te etew ne pehulen wey umbeg; 31 impanubuan e seini te me duhi wey ingkampetan e te hilamunen, wey nagguhus e ka me batu ne inlingut ialad dutu. 32 Ne duen ad e se migpalemlem te nakita ku. Ne seini ka naangey ku ne katuenan meyitenged dutu: 33 emun ke egliplipereng ke re, ke egpatutuyung ke re, wey egpangpangayepkep eyew eggimeley, 34 sahuhune ne eggingumaan ka te keyirapan iling te takawen ne tigkew eglepew.