25
Ka duma pad ne me lalag ni Sulumun
1 Seini pad man‑e ka duma ne me lalahen ni Sulumun ne in-ilingan te me etew ni Isikiyas ne Hari te Huda. 2 Egbantuhen ka Manama tenged te minsan nekey ne ware din ipahawa-hawa, piru egbantuhen ka Hari tenged te minsan nekey ne igpakapapitew rin.
3 Iling te langit ne kene egkeumaan, wey te dahat ne kene egkatirew tenged te karalem, kene degma egkanengnengan ka suman-suman te me Hari.
4 Awaa nu ka taang ne nakasewug te pelata, eyew egpakasayab te me tahuanan ka mannayab. 5 Te iling due ne paahi, ke egpandeldelen nu ka maddeet ne talagtambag te Hari, egmalig‑en ka migharian din pinaahi te pegkamatareng.
6 ✡ Luk 14:8-10.Ke eggendiye ka te Hari, kene ka sasindeg diye te tangkaan din; kene ka man‑e sasindeg diye te eg-ugpaan te me mabantug. 7 Meupiya pad ne egkahiyan ka, “Pamaneyik ka kayi,” du te egkamelmelehan nud iya ne egle-leihen ka diye te tangkaan te me talahuren.
8 Kene ka ana-ana hendiye te hukumanan tenged te nakita nu. Ke due lein ne egpakapamalehet ne naseyyup ka, egpakapeyilawan ka?
9 Emun ke nekeg-apul kew te sumbaley nu, husaya niyu seini ne sikaniyu re, wey kene niyu ipanengneng te minsan hentew, 10 su ke due egpakarineg due, egkeyilawan kew e wey egmareet e ka pegtengteng te me etew kaniyu.
11 Ka lalag ne egpakasalete te eleg ne timpu,
egpekeiling te mansanas ne bulawan ne indayan-dayanan te pelata.
12 Ka pegsapad te matagseb ne etew diye te etew ne egpammineg kayi, egpekeiling te eritis ne bulawan wey mahal ne balieg.
13 Ka egkasalihan ne suluhuanen, egpakapahale te seeye se migsuhu kandin. Egpekeiling sikandin te maagsil ne weyig* Te Hibruwanen: isnu. te timpu te meinit.
14 Ka me etew ne migsaad te minsan nekey ne kene egkatuman, egpekeiling te gapun wey kalamag ne ware egkeuyan ne uran.
15 Ka pegpariralem wey ka me lalag ne kene ne malangit, egpakabennal te me pangulu wey te minsan hentew ne makehal se pusung.† Te Hibruwanen: tul‑an.
16 Emun ke egpakakita ka te teneb, iyan nu re keena ka eleg nu re su kema ke egpekeileb kad e.
17 Marelag ke re panumbaley te sumbaley nu su kema ke egkapelaan e sikandin wey egkeepes e keykew.
18 Ka etew ne egpamalehet te ubat meyitenged te sumbaley rin, egpekeiling te sundang wey ke kampilan naa, wey ke tunud naa ne maliddus.
19 Egkeyimu ne ware karuan ke egsalig ka te etew ne kene egkasalihan te timpu te keyirapan. Su egpekeiling sikandin te tigkey wey nabalingu ne paa ne ware igpakabulig.
20 Emun ke eg-ulahing ka diye te etew ne miglungku egkeulat de iya iling te inluungan nu sikandin te kumbale te timpu te tingmaagsil wey ke in-itisan nu naa te suka ka pali din.
21 Emun ke eggutasan ka kuntere nu, pakeena nu sikandin; ke egkammaraan, peinuma nu sikandin 22 su emun ke eggimuwen nu sika, impunggisan nu sikandin te salakey, piru egdasahan ka mule te Magbebaye ne Manama.
23 Ka pegsesalupet ka egpuunan te kabelu, iling te kalamag te igkahibang ne balabahan ne eg-uyan te uran.
24 Meupiya pad ke diye ka eg-ugpe te pikungan te atep te baley, du te diye ka te seled ne duma nu ka asawa nu ne mabulut.
25 Ka meupiya ne guhuren ne egpuun te mariyu ne inged, egpekeiling te maagsil ne weyig ne egpakamanekal te nammaraan.
26 Ka matareng ne etew ne egparuyun-duyun de te mareet ne etew, egpekeiling te basaken ne beuhan wey ke sebseb naa ne natahuan te maligsem.
27 Kene ne meupiya ka eg-am-amana egkeen te teneb, wey kene degma ne meupiya ka layun de egpareyrey.
28 Ka etew ne kene egpakatigkel te pegkeetew rin, egpekeiling te siyudad ne nahuhus ka alad.