31
Ka me lalahen te Hari
1 Seini ka immanlalag ni Hari Limwil ne matig-Masa. Impanulu kandin seini te iney rin:
2 “Sikeykew se anak ne nabaley te aanakan ku; Imbuyu ku sikeykew te Manama sikan naa ka neetew ka. 3 Kene nu da-daati ka kanekal nu diye te me malitan ne egpakarereet te me Hari. 4 Limwil, kene ne meupiya ne eg-inum te binu ka me Hari, kene ne meupiya te me pangulu ka egkeibeg-ibeg te inumen. 5 Su emun ke egkewubug e sikandan, egkalingawan dan e ka Balaud wey egdi-diekan dan e ka katenged te langun ne egkaayu-ayu. 6 Balahara nu re ne eg-inum te subla ne egpekewubug ne binu ka seeye se mahaan e egpatey wey seeye se eg-antus te subla ne masakit. 7 Peinuma nu iya sikandan eyew egkalingawan dan ka me keyirapan wey eyew kene dan e egkasuman-suman ka pegkaayu-ayu ran.”
8 “Lalag ka eyew egkapangabangan te katenged ka me etew ne kene egpakapangabang te pegkeetew ran. 9 Keilangan ne ka peggukum nu, egpekeikul te gantangan wey palabian. Lalag ka eyew te pegpangabang te katenged te egkengaayu-ayu wey te seeye se ware egkekeyimu.”
Ka meupiya ne asawa ne malitan
10 Malised ne egpamitawen ka meupiya ne asawa wey mahal pad sikandin du te mahal ne me batu.
11 Egkasalig kandin ka iglukes din, wey warad egkeilanganen pad te iglukes din diye te kandin.
12 Kene sikandin eggimu te egpakarereet te iglukes din, su layun de ne meupiya ka eggimuwen din te intiru ne umul rin.
13 Maali-ali sikandin ne egpangimu te me kumbale ne linu puun te bulbul te karniru.
14 Egpekeiling sikandin te barku ne egpanguyan te egkakeen puun te mariyu ne inged.
15 Eggimate e sikandin te kene pad egkasi-si ka kaliwaswasan eyew eggilutu te egkakeen dan te taltalaanak, wey eyew egpanengneng te me suluhuanen dan ke nekey ka eggimuwen dan.
16 Egpamitew sikandin te tane wey egbeliyen din seini te seleppi ne inlimud din, wey egpamulaan din te paras.
17 Maali-ali sikandin wey manekal ne egtrabahu.
18 Nakanengneng sikandin ke pila ka egkaseleppi din te sika ne eggimuwen din. Sikan naa kene egkeebukan ka sulu din te marusilem.
19 Sikandin mismu ka egpangimu te hinabel eyew eggimuwen din ne kumbale.
20 Matumpis sikandin te egkaayu-ayu wey te me ware egkengeyimu.
21 Kene sikandin egkalaggew te timpu ne eg-uran te isnu su duen ma makepal ne manggad* Te Hibruwanen: malalab ne hinabel. para te pamilya rin.
22 Egpangimu sikandin te hagpi te me hibatanan wey egsaluub sikandin te mahal ne kumbale ne malugtem se batek.
23 Neilaan ka iglukes din† Te Hibruwanen: Mabantug diye te gumawan te siyudad. wey sabeka sikandin te me pangulu diye te lungsud dan.
24 Egpaneyi sikandin te me kumbale wey me sinturun eyew igpamelegye din diye te me nigusyanti.
25 Makeseg-keseg sikandin wey egtahuren, wey kene sikandin egkaaldek ke nekey ka egginguma.
26 Matagseb sikandin ne eglalag wey meupiya ka pamaahi rin te pegpanulu.
27 Mabasuk sikandin wey amana rin eg-atimana ka pamilya rin.
28 Inggeyinawaan sikandin wey indeyrey te me anak din wey te iglukes din.
29 Egkahi ka iglukes din, “Masulug ka meupiya ne asawa piru ware egpekeiling keykew.”
30 Ka kateles te malitan, egpakalimbung iya wey duen de katamanan. Piru ka malitan ne due pegkaaldek te Magbebaye ne Manama, eleg ne egdayanen.
31 Deyraya nu sikandin te langun ne neyimu rin. Ne tenged te meupiya ne neyimu rin egtahuren sikandin te me etew.