Iklisyastis
Igpewun‑a
Ka seini ne baseen te Iklisyastis, insulat te matagseb ne talagpanulu. Kahi te duma ne si Sulumun ka migsulat kayi piru kahi te duma, lein ne etew. Ka etew ne migsulat kayi, mig-ayad-ayad migsuman-suman ke nekey ka igpasabut te umul. Nakita rin ka langun ne neyitabu kayi te ampew te tane ne ware karuan wey ke malised naa ne egsabuten wey eglihad de ka umul kayi te ampew te tane. Migtambag sikandin ne keilangan ne egtahuren ta ka Magbebaye, eg-ikulen ta wey eggale-gale ki te langun ne indasag din kanta tagse aldew. (Ka igpasabut te Iklisyastis iyan ka “talagpanulu.”)
Ka nenasulat te seini ne baseen
Ka inse meyitenged te umul 1:1–2:26
Ka kamalehetan meyitenged te umul 3:1–11:8
Ka katamanan ne me tambag 11:9–12:8
Ka katammanan 12:9-14
1
Ware karuan te langun
1 Seini ka me lalag te matagseb ne anak ni Dabid ne Hari te Hirusalim.
2 Kahi te matagseb: Malised ne egsabuten! Malised ne egsabuten!
Malised ne egsabuten ka langun!
3 Nekey ka karuan te langun ne impakannekalan te etew kayi te kalibutan?
4 Egkaawe ka sabeka ne kabuhalan
wey egkasubalan e man‑e te lein,
piru kene egkabalbalawan ka kalibutan.
5 Egsile ka aldew wey eglineb e man‑e seini,
wey eg-iyal-iyal eglibed diye te impuunan din.
6 Egpangalamag ka diye te igkakawanan ne balabahan
wey egpabulus seini diye te igkahibang ne balabahan;
eglibeng-libeng de iya seini wey eglibed diye te impuunan din.
7 Egtulayas diye te dahat ka langun ne me beuhan,
piru kene egkapenu ka dahat;
eglibed e man‑e ka me beuhan diye te impuunan dan
wey egtulayas e man‑e diye te dahat.
8 Egpakapela seini se langun;
egpakapela seini.
Kene egkapelaan ka mata ne egtetengteng
wey kene egkapelaan ka talinga ne egpammineg.
9 Ka neyimu e dengan egkeyimu red man‑e kuntee.
Ka neyitabu e dengan egkeyitabu ded man‑e kuntee;
warad iya egkakita ta ne iyam pad kayi te kalibutan.
10 Duen naan pad egkeyitabu ne egkakahi ta ne iyam?
Ware iya, neyitabu e sika te ware ki pad neetew.
11 Warad egpakasuman-suman te neneyitabu e,
wey ke egpakasuman-suman naa te egkeyitabu pad.
Kenad degma seeye egkasuman-suman pad te egpakasubal ne kabuhalan.
Ka nabaybayaan te matagseb
12 Sikeddiey ka matagseb ne Hari te Israil
wey diya a mig-ugpe te Hirusalim.
13 Inggamit ku ka suman-suman ku te pegnengneng te katagseb
wey inggamit ku ka katuenan ku te peg-ugsi-ugsi te langun ne neyitabu kayi te kalibutan.
Ne nanengnengan ku ne ka kalaggew impatapik e te Manama te etew.
14 Nakita ku ka langun ne hinimuwan kayi te kalibutan,
wey nakakahi a te malised ne egsabuten ka langun;
egpekeiling seini keyirap te egpanlupug te kalamag.
15 Ka egkapeku kenad egkaketeng,
wey ka egkalaag kenad egkakita.* Te Hibruwanen: ka egkatarin kenad egkaseel.
16 ✡ 1Har 4:29-31.Nasuman-suman ku,
“Dakel ka katagseb ku du te langun ne mighari te Hirusalim;
matagseb a wey mangngateu e pad kandan.”
17 Purisu inggamit ku ka suman-suman ku te pegnengneng te katagseb,
wey te seeye se egpakabusew wey te keungelan,
piru egpekeiling de seini te miglupug a te kalamag.
18 Su emun ke egdakel e ka katagseb ku
nasi e degma egdakel ka peglungku ku.
Su ka egdakel se katuenan,
nasi egdakel degma ka kalaggew.