5
Ka pegpangananey ne peg-ampu
Ka ulahingen ni Dabid para te pangulu te mangngulahing ne egbalesen te pulendag.
1 Pammineha nu ubag ka eglalahen ku, he Magbebaye ne Manama,
wey sahipaa nu ka pegdeg-uy ku.
2 Magbebaye ne Manama ku wey Hari ku,
pammineha nu ka pegpabulig ku, su mig-ampu a keykew.
3 Te maselem, he Magbebaye ne Manama,
pammineha nu ka peg-ampu ku.
Te maselem, mig-andam a te me halad,
wey migtetahad a keykew.
4 Sikeykew ka Magbebaye ne Manama ne kene egkahale te mareet ne himu,
wey kene ka egduma te me etew ne mareet se hinimuwan.
5 Kene egpakasasindeg diye te tangkaan nu ka me hambuhen;
igkabelu nu ka langun ne me etew ne mareet se hinimuwan.
6 Egdereetan nu ka langun ne ubaten,
wey amana nu igkalangeti ka mangngimatey wey limbungen.
7 Piru tenged te dakel ne geyinawa nu ne kene egkabalbalawan,
egpakaseled a te baley nu.
Egpakasimba a diye te timplu nu duma te dakel ne pegtahud.
8 He Magbebaye ne Manama, amana ne masulug ka kuntere ku!
Panulua a te peggimu te igkeupii nu,
pataha nu ka dalan ne eg-ikulen ku.
9 ✡ Rum 3:13.Ubat langun ka me lalag te me kuntere ku,
wey pegdereet de ka igkeupii ran.
Egkateu sikandan ne eggulu te duma;
egpekeiling te nalukatan ne lebeng ka me be‑be dan.
10 He Manama, paruseyi nu sikandan;
egkeuney perem sikandan te mareet ne implanu ran.
Deldela nu sikandan tenged te me sale dan;
su migsupak sikandan keykew.
11 Piru egkeele perem ka eg-aput keykew,
wey eg-ulahing perem sikandan langun tenged te kahale.
Ka miggeyinawa keykew, egpangabangan nu iya perem,
wey egkeele perem amana sikandan tenged keykew.
12 He Magbebaye, impanalanginan nu ka me matareng,
wey egpabantayan nu sikandan te geyinawa nu ne egpekeiling te kalasag.