7
Ka peg-ampu para te matareng ne peggukum
Ka ulahingen ni Dabid meyitenged ki Kus ne sakup te me kabuhalan ni Binhamin. In-ulahing din seini para te Manama.
1 He Magbebaye ne Manama ku,
mig-aput a keykew eyew egpepangabang.
Luwasa a nikeykew wey ipaalihu a te langun ne migbayad-bayad keddi
2 su kema ke eggan-ganuyen a nikandan wey egbinbindasen,
iling te eggimuwen te sabeka ne liyun,
wey ware egpakaluwas keddi.
3 He Magbebaye ne Manama ku,
ke nekeyimu e ma te mareet diye te duma ku
4 ke insulian ku ma te mareet ka meupiya ne inggimu te alukuy ku,
wey ke in-ahawan ku naa te karatuan ka me kuntere te ware malehet ne egpuunan,
5 na, ipalupug a wey iparakep a kandan,
wey balahara nu ne egdi-diekan a taman te egpatey a,
wey eg-engkeran ka lawa ku ne nakabahed de te tane.* Te Hibruwanen, duen pad sumpul ne “sila”, ne palinneu buwa te seeye se eg-ulahing ne keilangan ne egsanggel.
6 Te kabelu nu, he Magbebaye ne Manama,
sulii nu ka pegkamareet te me kuntere ku!
Weil kad e, he Manama ku,
wey pangabangi a,
su iyan nu ma egpamitawen ka matareng ne peggukum.
7 Libulunga nu ka keet-etawan diye te tangkaan nu.
Mandu ka kandan puun te ampew.
8 Sikeykew, he Magbebaye ne Manama, ka eggukum te keet-etawan.
Pamaleheti nu ne ware sale ku,
su nakanengneng ka ne matareng a wey wara a miggimu te mareet.
9 ✡ Imp 2:23.Egkataman e perem ka maddeet ne me hinimuwan te me etew ne mareet se hinimuwan!
Piru pangabangi nu ka me matareng, he matareng ne Manama,
sikeykew ka eg-ugsi-ugsi te me pusung wey te me suman-suman.
10 Iyan ku talagpangabang† Te Hibruwanen: kalasag. ka Manama ne Amana ne Mabantug,
ne egluwas te seeye se eg-ugpe ne matareng.
11 Matareng ne talaggukum ka Manama.
Egkabelu sikandin te me etew ne mareet se hinimuwan te tagse aldew.
12 Emun ke kene eg-inniyug ka etew te sale din,
egkamangeen e te Manama ka sundang din;
egtagtagelen din e ka igpane din.
13 Eg-andamen din ka egpakapatey ne me panganiban din,
wey igpane din ka egkalegleg ne me tunud din.
14 Pammineg ka, ka me etew ne mareet se hinimuwan, egsuman-suman te mareet,
egkeupian sikandan ne eggimu te samuk, wey egpanlimbung.
15 Eglulungag sikandan te maralem eyew egkeuluhan te duma,
piru nasi de iya ne sikandan ka egkeulug kayi.
16 Ka samuk ne inggimu ran, eglibed diye te kandan.
Ka mareet ne planu ran, sikandan ded ka egkasuhat.
17 Egpasalamat a te Magbebaye ne Manama tenged te pegkamatareng din,
wey eg-ulahingan ku ka ngaran te Magbebaye ne Manama, ka Amana ne Mabantug.