35
Ka pegpabulig te Manama
Ka ulahingen ni Dabid.
1 Pakig-ehet ka Magbebaye te seeye se egkuntere keddiey,
wey pakigkuntere ka te seeye se egpakigkuntere keddiey.
2 Kubayan kad te dakel wey deisek ne kalasag nu,
wey pangabangi ad e nikeykew.
3 Ay-ayuna nud ka deldeg nu,
wey pilaka nud ka miglusud keddi.
Pahunlibet ka keddi ne egluwasen a nikeykew.
4 Egkatalu perem sikandan se eglelalis ne eggimatey keddiey,
wey egkeyilawan perem sikandan.
Papallahuya nu sikandan se egdereet keddi,
wey ipalibed nu eyew egkareetan.
5 Ipeiling nu sikandan te ukaba ne eglayap te kalamag,
te timpu ne egdeldelen sikandan te panalihan te Magbebaye.
6 Egmarusilem perem ka egbayaan dan wey egmalurek,
te timpu ne eglupuhen sikandan te panalihan te Magbebaye.
7 Su minsan ware egpuunan, egsahiluten a nikandan,
wey minsan ware aliddanan, miglulungag sikandan te eglebengan keddi.
8 Sahuhune perem ne egginguma ka karereetan diye te kandan,
wey egsahad perem sikandan te igsahilut dan keddi.
Sikandan ded perem ka egkeulug te inlungag dan.
9 Puun due, eggale-gala a su inluwas a nikeykew Magbebaye.
10 Egkahi ka geyinawa ku,* Te Hibruwanen: langun ne tul‑an ku.
“Hentew‑a ka iling keykew, he Magbebaye,
ne egbulig te egkengaayu-ayu puun te seeye se egleig-leig kandan,
egpangabang te egkengaayu-ayu puun te seeye se eglupig kandan?”
11 Impandakesel a te me limbungen ne migbayung keddi,
wey mig-iinsaan a nikandan te ware ku nanengnengi.
12 Mareet ka insuli dan keddi minsan meupiya ka inggimu ku.
Purisu masakit amana ka geyinawa ku.
13 Piru ke egderalu sikandan, egsaluub a mule te saku ka eglungku,
wey egpuasa a,
wey eg-ampu a ne eg-unduk.
14 Miggiphipanew a ne eglungku de due,
iling te peglungku ku te me suled ku wey ke me alukuy ku naa.
Mig-uunduk a ka egkalange,
iling te etew ne egdamag te iney rin.
15 Piru te timpu ne nabaybayaran a,
miglibulung sikandan wey miggale-gale.
Migliblibulung ka me etew ne ware ku neileyi,
eyew egdali-di keddiey,
wey ware tamanan te pegbaley-baley ran keddiey.
16 Egpekeiling sikandan te punduk te me etew ne makehal se me ulu,
ne egpakapangngahat ka egkalelehet keddiey.
17 He Magbebaye, hendei taman ka pegbalahad nu re keddiey?
Luwasa a nikeykew te pegdereet dan keddiey,
wey pangabangi a puun kandan te egpekeiling te liyun ne egdawi keddiey.
18 Ne egpasalamatan ku sikeykew diye te kasuluhan,
wey egdayanen ku sikeykew diye te nalibulung ne keet-etawan.
19 Kene nu ituhut ne egpanalu ka me kuntere ku ne me akalen,
eyew kene egpakabaleybaley sikandan keddi.
Kena a pangisii† Te Hibruwanen: egpapipitpit. te me etew ne migdumut keddiey minsan ware egpuunan.
20 Su kene sikandan eglalag te meupiya diye te duma,
wey eggelebekan dan egsalupeti
ka me etew ne meupiya se peg-ugpe te seini ne inged.
21 Migpangasak sikandan wey imbayungan a te migkahi,
“Etuwey, etuwey, nakita ney iya ka inggimu nu.”
22 Nakita nu seini Magbebaye purisu kene ka peeneng-eneng de.
He Magbebaye, kene ka ubag pariyu keddiey.
23 Bukal-bukal kad Magbebaye wey bulihi ad puun te migbayung keddiey.
Pangabangi a Manama ku puun te migpandakesel keddiey.
24 Pamaleheti nu Magbebaye ne eleg a,
tenged su matareng ka Manama ku.
Kene nu ituhut ne egpanalu sikandan,
eyew kene egpakabaleybaley sikandan keddi.
25 Kene nu ituhut ne egpakakahi sikandan,
“Natuman ded iya ka igkeupii ney.”
Kene nu man‑e pasumsumana sikandan,
“Neutel ney red iya sikandin.”
26 Egkeyilawan perem seeye se nahale te pegkalasey ku,
wey egkaruruhu perem sikandan langun.
Egkeyilawan perem sikandan se migdew‑ey keddiey,
wey egkalueran perem sikandan te inggimu ran.
27 Ne seeye se egkeupian ne eleg ka peggukum keddiey, egkahale perem,
wey egpanguleyi te kahale ne egkahi layun,
“Egmabantug ka Magbebaye ne Manama.
Igkeupii rin ne due keupianan te suluhuanen din!”
28 Ne egkataman, igpangguhud ku ne matareng ka,
wey egdayanen ku sikeykew layun.