36
Ka kareet te etew wey geyinawa te Manama
Ka ulahingen ni Dabid ne suluhuanen te Magbebaye para te pangulu te mangngulahing.
1 Insulat ku seini te timpu ne migpalemlem a te etew ne makasesale.* wey ke guhuren te makasesale ne etew ne iyan de layun egkasuman-suman ka mareet.
Ka etew ne mareet se hinimuwan, kene egkaaldek te Manama,
2 su amana sikandin migsalig te kandin ne pegkeetew,
wey kene din e egkakita ka hinimuwan din ne mareet,
ne eleg ne igkeepes din.
3 Neelin naan de ne mareet ka eglalahen din,
wey eggelebek sikandin egpanlimbung.
Kenad ne maheteng ka eg-ul-uleen din,
wey warad meupiya ne egkeyimu rin.
4 Ne minsan ke eggibat e sikandin, egsuman-suman de due ne eggimu te samuk,
wey mareet e ka eg-ul-uleen din wey kene sikandin eg-engked te mareet.
5 He Magbebaye, egpekeuma diye te langit ka geyinawa nu ne kene egkabalbalawan,
wey egginguma diye te me gapun ka pegkamatinumanen nu.
6 Ka katareng nu, egpekeiling karesen te me bubungan nu,
wey ka peggukum nu, iling karalem te pused te dahat.
Intanggu nu ka me etew wey me ayam.
7 Amana ne mateles ka geyinawa nu ne kene egkabalbalawan Magbebaye.
Mig-aput ka me etew diye te keykew,
iling te me piyak ne ingkupkup nu.
8 Migsahakeen sikandan diye te baley nu,
wey nabayangan sikandan te egkakeen,
wey nakarawat te migtulayas ne keupianan iling te weyig.
9 Su sikeykew ka egpuunan te sebseb ne egpakabehey te umul,
wey sikeykew ka layag ne eglayag kanami.
10 Ipabulus nu ka geyinawa nu ne kene egkabalbalawan te seeye se nekeila keykew,
wey ka keupiya nu te seeye se mig-ugpe ne matareng.
11 Kena a parieki te me hambuhen,
wey kena a ipahanuy te me etew ne mareet se hinimuwan.
12 Tew ke naa iya, nareetan e ka mareet se egpangimuwen,
wey kenad e sikandan egpakasasindeg.