37
Ka egtamanan te matareng wey te mareet se hinimuwan
Ka ulahingen ni Dabid.
1 Kene ka katameneng te me etew ne talagdereet,
wey kene ka keimma te mareet se egpangimuwen.
2 Su egpekeiling de sikandan te me hilamunen ne egkalanes,
wey egkahangu re sikandan iling te me pinamula.
3 Salig ka te Magbebaye wey meupiya himuwa nu.
Ugpe ka te inged wey kene ka suwey te maheteng ne peg-ugpe.
4 Himuwa nu ke nekey ka igkeupii te Magbebaye,
wey igbehey rin keykew ka igkeupii te pusung nu.
5 Ibehey nu te Magbebaye ka umul nu;
salig ka kandin wey egbulihan ka nikandin.
6 Igpakita rin ka katareng nu iling te layag te aldew te maselem
wey igpapitew rin ne eleg ka, iling te layag te aldew te meudtu.
7 Ugpe ka ne ware igkabanggew due te Magbebaye,
wey kene ka kapeleyi ne egtetahad kandin.
Kene ka katameneng te me etew ne egmatubung te mareet ne himu,
wey kene ka kalelehet te me etew ne egpanpanalu tenged te mareet ne me planu.
8 Kene ka kabelu wey kene ka palelanget kandan.
Kene ka katameneng su egpakarereet sika keykew.
9 Su egdeldelen ded sikandan puun te Israil,
piru seeye se egtetahad te Magbebaye,
kene egkaawe te inged te Israil.
10 Kene egkaluhey, egkaawe ka me etew ne mareet se hinimuwan.
Minsan egpaay-ayaran pad sikandan te egpamitew,
kenad en iya sikandan egkakita.
11 Piru ka mapariralemen, egpabulus ne eg-ugpe te inged dan,
wey ware igkabantali, wey meupiya se egkeula-ula.
12 Egplanuwan te me etew ne mareet se hinimuwan te egdereet ka me matareng,
wey egpakapangngahat e sikandan ka egtetengteng kandan.
13 Piru egngisiyan de te Magbebaye ka me etew ne mareet se hinimuwan,
su nakataha sikandin ne mahaan din e sikandan egduseyi.
14 Eggulabut te kampilan ka me etew ne mareet se hinimuwan wey egbengat te pane dan,
eyew iggimatey te egkaayu-ayu wey mig-ugpe ne maheteng.
15 Piru sikandan ded ka egkatiyuk se pusung te kampilan dan,
wey egkengahepu ka me pane dan.
16 Minsan ke deisek de ka kandin te matareng ne etew,
piru meupiya pad seini du te dakel ne karatuan te me etew ne mareet se hinimuwan.
17 Eg-awaan te Magbebaye te keseg ka me etew ne mareet se hinimuwan,
piru egbulihan din ka me matareng.
18 Su seeye se me etew ne ware igkarew‑ey, egkasasew ka Magbebaye,
wey ka egkapanunud dan, kandan en iya taman te katammanan.
19 Kene sikandan egkeyilawan te mareet ne timpu,
wey egmatubung sikandan te timpu te gulabung.
20 Piru ka me etew ne mareet se hinimuwan, egpatey iya.
Egpekeiling ka me kuntere te Magbebaye te mateles ne me bulak,
ne egpatey re wey egkaawe iling te ebel.
21 Ka me etew ne mareet se hinimuwan, egpanambey piru kene egkateu ne egbayad,
piru ka me matareng, mabehey-behey.
22 Seeye se impanalanginan te Magbebaye, egpabulus-bulus ne eg-ugpe te inged dan,
piru seeye se indilus din, egdeldelen te in-ugpaan dan.
23 Emun ke eggimuwen din ka igkeupii te Magbebaye,
egpanuluen sikandin te Magbebaye te egbayaan din.
24 Egkasaligkat sikandin piru kene egkapeled,
su egkitkiten sikandin te Magbebaye.
25 Puun te bate e pad taman te nabuyag ad,
ware de due nakita ku ne matareng ne imbalahad te Manama,
wey ke migpamuyu naan de ka me anak din te egkakeen.
26 Malasi pad sikandin egpamehey wey egpasambey,
wey egkeyimu ne panalangin ka me anak din.
27 Pariyu ka te mareet wey himu ka te meupiya,
eyew egpekeugpe ka te tane te Israil te ware egtamanan.
28 Su igkeupii te Magbebaye ka eleg ne peggukum,
wey kene din egbalaharen ka keet-etawan din.
Egtangguwen din sikandan te ware egtamanan,
piru ka me kabuhalan te me etew ne mareet se hinimuwan, egkaawe te inged te Israil.
29 Ne ka me matareng, egpabulus ne eg-ugpe te tane,
wey eg-ugpe sikandan diye te ware egtamanan.
30 Ka iglalag te etew ne matareng egpakabehey te katuenan,
wey neelin ne eleg ka guhuren din.
31 Intines din ka balaud te Manama diye te pusung din,
wey kene sikandin egsuwey te balaud din.
32 Eg-ipaten te me etew ne mareet se hinimuwan ka me matareng,
su igkeupii ran te eggimatey.
33 Piru kene egbalaharen te Magbebaye ka me matareng,
wey kene din igtuhut ne eggukuman sikandan te kuntere dan.
34 Tetahad ka te Magbebaye wey ikul ka te igkeupii rin,
wey igpabantug ka nikandin eyew egkamkamuney te tane.
Egkakita-kita nu pad man‑e ka me etew ne mareet se hinimuwan,
ne egkaawe te tane ne in-ugpaan dan.
35 Due nakita ku ne me etew ne mareet se hinimuwan ne egleig-leig te duma,
egpekeiling sikandan te sidru ne kayu ne miglapung ne diye te Libanun.* Diye seini egpuun te sinulat ne Septuagint, ka tapey ne Bibliya te me Hudiyu ne innalin te Grigu.
36 Piru te peglibed ku,† Diye seini egpuun te sinulat ne Siptuwagint, ka tapey ne Bibliya te me Hudiyu ne innalin te Grigu. warad sikandan.
Impamitew ku sikandan piru ware kud nakita.
37 Pitawa nu ka me matareng wey ipata nu ka maggeteng,
su meupiya ka eggingumaan te seeye se egkeupian te mateles se peg-ugpe.
38 Piru ka me makasesale, egkahule langun,
wey mareet ka egkatamanan dan.
39 Ka Magbebaye ka talagluwas te me matareng,
wey sikandin ka talagpangabang dan te timpu te keyirapan.
40 Egbulihan sikandan te Magbebaye wey egpangabangan.
Egluwasen din sikandan puun te me etew ne mareet se hinimuwan tenged su mig-aput sikandan kandin.