53
Ka mareet ne hinimuwan te keet-etawan
Ka ulahingen* Te Hibruwanen: “maskil”, ngaran buwa seini te klasi te ulahingen. ni Dabid para te pangulu te mangngulahing ne eg-ulahingen iling te peg-ulahing te “Mahalat.”† Ka Mahalat sabeka ne instrumintu wey ke laheng naa.
1 ✡ Rum 3:10-12.Migkahi diye te geyinawa ran ka egkengeungel,
“Kene ne malehet ne due Manama.”
Mareet ka eggimuwen dan,
wey warad iya egkateu pad ne eggimu te meupiya.
2 Migpamantew ka Manama diye te langit,
wey impitew rin ka keet-etawan.‡ Te Hibruwanen: me anak te etew.
Su egnengnengan din ke duen pad matagseb,
wey ke duen naan pad migpamitew kandin.
3 Migsuwey e ka langun te maheteng ne dalan;
langun dan iya ne eggimu te mareet.
Ware sabeka kandan ne eggimu te meupiya,
minsan senge-etawan naan de iya.
4 Ware kaligneepan te me etew ne mareet se hinimuwan.
Mareet ka inggimu ran te keet-etawan ku.
Ne kenad sikandan eg-ampu diye te Magbebaye.
5 Piru egliyasen sikandan te mangune-kune,
liyas ne ware dan de due naheram puun pad dengan,
su egpayatpaten te Manama ka me tul‑an dan.
Egkapeyilawan niyu sikandan tenged su in-engkeran e sikandan te Manama.
6 Meupiya ke eggingume e ka talagluwas te Israil ne egpuun te Hirusalim.§ Te Hibruwanen: Siyun. Sabeka seini te me ngaran te Hirusalim.
Emun ke igpalibed e man‑e te Magbebaye ka katubung te keet-etawan din,
egkahale-gale si Hakub,
wey egmahalew-galew si Israil.