52
Ka keyid‑u wey peggukum te Manama
Ka ulahingen* Te Hibruwanen: “maskil”, ngaran buwa seini te klasi te ulahingen. ni Dabid para te pangulu te mangngulahing. Insulat din seini te migkahiyan ni Deig ne Idumihanen si Saul, “Miggendiyad si Dabid ki Ahimilik.”
1 Sikaniyu se me mabantug, mania te nasi kew re iya egpegpeggasal te mareet ne himu.
Kene bes ne meupiya layun ka Manama kaniyu?
2 Egsuman-suman kew ne egdereet te duma.
Me limbungen kew wey egpekeiling te mahalang ne ilab ka dile niyu,
ne egpakapasakit te duma.
3 Igkeupii niyu pad ka mareet ne himu du te meupiya,
wey eg-awesen niyu pad ne eg-uubat du te egpangguhud te malehet.† Te Hibruwanen, duen pad sumpul ne “sila”, ne palinneu buwa te seeye se eg-ulahing ne keilangan ne egsanggel.
4 Sikaniyu se me limbungen, neelin ne mareet ka eglalahen niyu,
su egkeupian kew en iya ne egpasakit te duma.
5 Piru egguleen kew red iya te Manama te ware egtamanan.
Egsikepen kew nikandin te leeb niyu wey eggulemeken.
Eg-aween kew nikandin puun te inged te me manekal.
6 Egkakita seini te me matareng wey egkaaldek sikandan.
Egngingisi naan de sikandan wey egkahi,
7 “Pitawa niyu ka etew ne kene eg-aput te Manama,
su nasi egsalig-salig te dakel ne karatuan din.
Ne subla pad ne migmaresen sikandin,
pinaahi te pegdereet te duma.”
8 Piru sikeddi, egpekeiling a te malapung ne ulibu ne kayu,
ne migtubu diye te timplu te Manama.
Migsalig a te geyinawa te Manama ne kene egkabalbalawan,
te ware egtamanan.
9 Egpasalamatan ku sikeykew te ware egtamanan,
tenged te nangimu nu Manama.
Egsalig a keykew su ka eg-ikul keykew
nakataha ne meupiya ka.