64
Ka igdusa te mareet ne me etew
Ka ulahingen ni Dabid para te pangulu te mangngulahing.
1 Pammineha a, he Manama te pegsagsahukul ku.
Kena a peyimateyi te me kuntere ku,
ne masumpit ne eglelalis keddiey.
2 Iheles a puun te me etew ne mareet se hinimuwan,
wey ipariyu a te punduk te me limbungen.
3 Egpekeiling ka me dile dan te kampilan wey pane,
wey masakit sikandan ne egpanlalag.
4 Eg-akalan dan ka me matareng,
wey kene sikandan egkehe ne egpamayung.
5 Migpabanbanasaley sikandan ne egpamuhawang te mareet.
Migplanu sikandan ne egteteen te igsahilut dan te me etew.
Migkahi sikandan, “Ware egpakakita kayi.
6 Hentew ka egpakasahimanu te mareet ka eggimuwen ta?
Impaay-ayaran ta te egplanu seini.”
Kene iya egkatirew ka maralem ne suman-suman wey pusung te etew.
7 Piru egpaneen sikandan te Manama,
wey due-rue ne egkapalian sikandan.
8 Egdereetan sikandan te Manama tenged te impanlalag dan.
Egmakalengey-lengey ka langun ne egpakakita kandan.
9 Ne egkaaldek ka langun ne me etew.
Igpangguhud dan ka nangimu te Manama,
wey impalemlem dan ka nangimu rin.
10 Egkahale ka me matareng wey egsaye tenged te nangimu te Magbebaye,
wey eg-aput sikandan te Manama.