65
Pegdayan wey pegpasalamat
Ka ulahingen ni Dabid para te pangulu te mangngulahing.
1 Manama likes ka ne egdayanen diye te Hirusalim.* Te Hibruwanen: Siyun. Sabeka seini te me ngaran te Hirusalim.
Egtumanen ney ka insaad ney keykew.
2 Egparani keykew ka langun ne me etew,
uya su egtabaken nu ka peg-ampu dan.
3 Minsan nakasale key wey amana ne dakel ka sale ney,
impasaylu key red iya man‑e nikeykew.
4 Keupianan te etew ne in-alam nu,
wey ingginggat nu ne egpeugpeen te timplu nu.
Egkahale-gale key te keupianan diye te baley nu,
ne iyan ka matulus ne timplu nu.
5 He Manama ne talagluwas ney,
kein-inuwan ne me himu nu ka intabak nu kanami.
Sikeykew ka egsalihan te me etew,
te intiru ne kalibutan, minsan seeye se diye te iglapas te dahat.
6 Maresen ka wey inggimu nu ka me bubungan,
tenged te dakel ne geem nu.
7 Insaparan nu ka eglehes ne me bunlud te dahat,
wey ka kahulub te keet-etawan ne egpanagyawan.
8 Egliyasen e keykew ka me etew tenged te nangimu nu ne kein-inuwan,
minsan seeye se nangugpe diye te mariyu ne me inged.
Egpakapahale te me etew puun te igsile taman te iglineb,
ka langun ne nangimu nu te intiru ne kalibutan.
9 Impapitew nu ka pegtugganul nu te tane pinaahi te pegpeuran nu kayi,
wey egpakabehey te meupiya ne uma.
Ne ka weyig nu Manama kene egkeetiyan.
Imbehayan nu ka me etew te egkahaani,
su intahahe nu ka tane ne eg-umeen iya.
10 Impeuranan nu ka tane ne indaru,
taman te migmewumel e ka tane tenged te uran,
wey impanalanginan nu ka me pinamula ne egpanubu.
11 Dakel ka impeuma nu te me kamet te intiru ne leg‑un.
Egmatubung amana ka me inged ne egbayaan nu.
12 Dakel ka me hilamunen ne nanubu diye te panabtaban te disirtu,
wey egpekeiling e ka me bubungan te me etew ne dakel se kahalaan.
13 Miggulanap ka me ayam diye te panabtaban;
neempet te me egketuen ne pinamula ka napu ne malluag.
Egpekeiling e ka me napu wey me panabtaban,
te me etew ne eg-ul-ulahing su dakel se kahalaan.