83
Ka peg-ampu eyew egkareeg ka me kuntere te Israil
Ka ulahingen ni Asap.
1 He Manama, kene ka peeneng-eneng.
Manama, lalag ka wey kene ka leman.
2 Su pitew ka, egmanagyawan e ka me kuntere nu,
egmanlelalis* Te Hibruwanen: igpatikang ka ulu. e seeye se eg-ehet keykew.
3 Migbebentaan e sikandan ne egdereet te keet-etawan nu,
wey impaay-ayaran dan seini te egplanu.
Migpasabsabutey sikandan eyew egdereetan ka igkannuhun nu.
4 Migkahi sikandan, “Kuwa kid, su egdereetan ta sikandan se senge-nasud,
eyew egkaawe e ka Israil wey kenad egkatantanuran te minsan ken‑u.”
5 Migsabeka sikandan wey migparumeey,
wey migpasabsabutey ka eg-ehet keykew.
6 Ka me matig-Idum wey ka me kabuhalan ni Ismail,
wey ka me matig-Muwab wey ka me kabuhalan ni Hagar,
7 ka me kabuhalan ni Gibal, wey ni Amun, wey ka me Amalikanen,
wey ka me Pilistihanen, wey ka me matig-Tiru,
8 ka me matig-Asirya, migsaamul degma kandan.
Nasabeke e sikandan wey migmaresen e ka me kabuhalan ni Amun wey ka me matig-Muwab.† Te Hibruwanen: Neyimu e sikandan ne belad te me anak ni Lut.
9 Ipeiling nu red sikandan te me matig-Midiyan ne indereetan nu,
wey ki Sisira wey ki Habin diye te Weyig ne Kisun,
10 ne nammatey diye te Indur wey namewu e diye te tane.
11 Himuwa nu diye te me pangulu ran ka iling te inggimu nu ki Urib wey ki Siib,
wey himuwa nu diye te mabantug ka iling te inggimu nu ki Siba wey ki Salmuna.
12 Su migkahi sikandan, “Eg-ahawen ta ka palayuran te Manama,
eyew sikante e ka egpakakamuney.”
13 He Manama ku, ipeiling nu sikandan te alinepung ne egbebalisusu,
iling te lahami ne eglayap te kalamag.
14 Iling ka te hapuy ne egpakasilab te katalunan,
iling te legleg ne egpakasanlab te bubungan.
15 Lupuha nu sikandan ne egpekeiling te manekal ne kalamag,
wey hinaaldeka nu sikandan iling te balisusu.
16 Patamtamani nu sikandan te egpeyilew,
eyew egpamitawen ka nikandan Magbebaye.
17 Egkeyilawan perem sikandan wey egkaruruhu te ware egtamanan.
Egkahule perem sikandan eyew egkeyilawan.
18 Ne egkanengnengan dan perem,
ne sikeykew se egngaranan te Magbebaye,
iyan Amana ne Maresen ne Manama te intiru ne kalibutan.