89
Eg-ulahingen ku ka keupiya te Manama
Ka ulahingen* Te Hibruwanen: “maskil”, ngaran buwa seini te klasi te ulahingen. ni Itan ne kabuhalan ni Isra.
1 Eg-ulahingan ku ka Magbebaye ne Manama
tenged te geyinawa rin ne kene egkabalbalawan te ware egtamanan.
Igpangguhud ku te langun ne me kabuhalan,
ne egkasalihan ka.
2 Su migkahi a, “Kene egkataman ka geyinawa te Manama ne kene egkabalbalawan,
wey ka pegkamatinumanen din kene egkaweil iling te langit.”
3 Migkahi ka Magbebaye ne Manama, “Miggimu a te kasabutan te seeye se in-alam ku,
migpanaad a ki Dabid ne suluhuanen ku.
4 ✡ 2Sam 7:12-16; 1Kru 17:11-14; Sal 132:11; Him 2:30.Layun ku igpahari ka me kabuhalan nu te ware egtamanan;
igpapinnuu ku ka trunu nu ne egsubsubalan te keykew ne kabuhalan.”† Te Hibruwanen, duen pad sumpul ne “sila”, ne palinneu buwa te seeye se eg-ulahing ne keilangan ne egsanggel.
5 Egdayanen ka te langit, he Magbebaye ne Manama,
tenged te kein-inuwan ne nangimu nu.
Egkasalihan ka te kalibulungan te me matulus.
6 Su hentew naan de iya diye te langit, ka egpekeiling te Magbebaye ne Manama?
Hentew naan de iya diye te langit, ka egpakalepeng te Magbebaye?
7 Igkaaldek amana ka Manama te seeye se me matulus;
maresen pad sikandin du te langun ne nakalingut kandin.
8 Hentew‑a ka egpekeiling keykew, he Amana ne Maresen ne Manama?
Egkasalihan ke pad iya man‑e te seeye se nakalingut keykew.
9 Egpakasuhu ka te manekal ne me bunlud,
wey egpakasapad ka ne egpeeneng-eneng seini ke egsipuk.
10 Inlupet nu si Rahab‡ Rahab: Ka igpasabut te ngaran ne Rahab “ka hambuhen,” wey senge-kakuwa ne eggamiten seini ne panunggilingan te Ihiptu. ne iling te minatey;
inggule nu ka me kuntere nu wey natalagtag sikandan tenged te karesen nu.
11 Keykew ka langit wey ka tane;
inggimu nu ka inged wey ka langun ne kayi te inged.
12 Inggimu nu ka igkakawanan wey ka igkahibang ne me balabahan dapit te igsile.
Egdayanen ka te bubungan te Tabur wey eg-ulahingen ka te bubungan te Hirmun.
13 Maresen ka bakelawan nu,
wey manekal ka belad nu,
wey kene egkeilingan ka kawanan ne belad nu.
14 Matareng ka peghari nu wey eleg ka peggukum nu;
ka geyinawa nu kene egkabalbalawan, wey egtuman ka te langun ne saad nu te pegpangulu nu.
15 Keupianan te etew ne nakanengneng te egkahale ne laheng,
wey mig-ikul te egpakapahale keykew, Magbebaye.
16 Egkaapunan sikandan ka egkahale-gale tenged te ngaran nu;
egdayan sikandan keykew tenged te katareng nu.
17 Su ka katelesan nu ka kanekal ran;
ka keupiya nu ka egpuunan te karesen ney.
18 Su ka kalasag ney due te keykew egpuun Magbebaye ne Manama;
sikeykew ka matulus ne Manama te Israil, ne migbehey te Hari ney.
19 Migpakiglalag ka dengan te matinumanen ne suluhuanen nu diye te taheinep din,
wey migkahi ka, “Egbulihan ku ka sabeka ne manekal;
egpabantuhen ku ka in-alam ku puun te me etew.
20 Iyan ku nakita si Dabid, ka suluhuanen ku;
in-itisan ku sikandin te matulus ne lana ku.
21 Ka kanekal ku layun egduma kandin,
wey egmaresen sikandin tenged te karesen ku.
22 Kene sikandin egkatalu te katuenan te me kuntere din,
wey kene sikandin egkalupig te mareet ne me etew.
23 Eglupeten ku ka me kuntere din diye te tangkaan din,
wey egdereetan ku seeye se eg-ehet kandin.
24 Kene ku sikandin eg-engkeran wey kene egkabalbalawan ka geyinawa ku kandin;
eggimuwen ku sikandin ne maresen tenged te keddi ne ngaran.
25 Egkasakup din ka me inged diye te deyipag te dahat,
wey ka diye te talipag te me weyig.
26 Egpangananey sikandin keddiey,
‘Sikeykew ka amey ku, ka Manama ku,
wey maresen ne batu ne iyan talagpangabang ku.’
27 Eggimuwen ku sikandin ne panganey ne anak ku ne lukes;
ka amana ne maresen te langun ne Hari te kalibutan.
28 Ka geyinawa ku kandin kene egkabalbalawan te ware egtamanan,
wey kene ku eglingawan ka kasabutan ku kandin.
29 Egbugbuhalen ku ka me anak din te ware egtamanan,
wey kene egkaawe ka trunu rin taman te duen pad ka langit.
30 Ne emun ke eg-engkeran dan ka balaud ku,
wey kene eg-ikul te igsuhu ku,
31 wey egsupaken dan ka balaud ku,
wey kene egtuman te me suhu ku,
32 ne eglegparan ku sikandan te pegsupak dan;
egbarasan ku sikandan tenged te me sale dan.
33 Piru kene ku eg-aween ka geyinawa ku kandan ne kene egkabalbalawan,
wey kene ku eg-ubatan sikandan te impasalig ku kandan.
34 Kene ku egsupaken ka inggimu ku ne balaud,
wey kene ku egbalbalawan ka nalalag kud.
35 Kasabeke e re migsaad,
pinaahi te matulus ne ngaran ku;
kene ku iya eg-ubatan si Dabid.
36 Due iya kabuhalan din te ware egtamanan;
kene egkataman ka peghari din taman te duen pad ka aldew.
37 Egpabulus-bulus ka peghari din,
iling te bulan ne kene egkaawe,
kene ne ubat ne pamalehet ne egkakita diye te langit.”
38 Piru kuntee indeldel nud wey in-engkeran sikandin;
nangebel-ebel e ka langet nu te in-alam nu.
39 Imbalahad nud ka kasabutan niyu te suluhuanen nu;
ka kuruna rin inlinditan nud te alinepung.
40 Inlundus nud ka langun ne alad din ne batu ne matikang wey makepal;
ingguhus nud ka aputanan din.
41 Impangahawan sikandin te langun ne eglihad;
eglelemetan e sikandan te me sumbaley rin.
42 Impabantug nu ka karesen te me kuntere din;
imbehayan nu te kahalaan ka langun ne eg-ehet kandin.
43 Ware nu ipatangkalang ka kampilan din,
wey ware nu bulihi sikandin ka egpakiggira.
44 Intamped nud ka katelesan din;
igdegpak nud diye te tane ka trunu rin.
45 Egmahaanen nu re te egtaman ka pegkakankanakan din;
egpatamtamanan nu sikandin egpeyilawi.
46 He Magbebaye, ken‑u ka egpeeneng ka kene egkataman ne eggeles-heles?
Ken‑u ka egkataman ka egpangebel-ebel e se langet?
47 Sumsumana nu ne mahaan de egkataman ka umul ku.
Nekey‑a ka egpuunan ne inggimu nu ka langun ne etew,
eyew egkeyimu ne ware karuan?
48 Duen naa etew ne neuyag ne kene egpatey?
Hentew naa ka egpakaluwas te umul te etew puun te geem te inged te minatey?
49 Magbebaye, hendei naan e ka geyinawa nu ne kene egkabalbalawan dengan?
Migsaad ka wey migpasalig ka ki Hari Dabid.
50 Sumsumana nu, he Magbebaye ne Manama, ne impeyilawan ka suluhuanen nu;
tantanuri nu ne in-antus ku ka pegdali-di keddiey te langun ne nasud.
51 In-alam a nikeykew Magbebaye ne Manama,
piru eglelemetan e te me kuntere din ka in-alam nu.
52 Egdayanen ka Magbebaye ne Manama te ware egtamanan. Uya, malehet iya.
*^ Te Hibruwanen: “maskil”, ngaran buwa seini te klasi te ulahingen.
✡89:4 2Sam 7:12-16; 1Kru 17:11-14; Sal 132:11; Him 2:30.
†89:4 Te Hibruwanen, duen pad sumpul ne “sila”, ne palinneu buwa te seeye se eg-ulahing ne keilangan ne egsanggel.
‡89:10 Rahab: Ka igpasabut te ngaran ne Rahab “ka hambuhen,” wey senge-kakuwa ne eggamiten seini ne panunggilingan te Ihiptu.