109
Bulihi a Manama ku
Ka ulahingen ni Dabid para te pangulu te mangngulahing.
1 He Manama ne egsayeen ku, kena a balahara.
2 Su egdereetan a wey eglilimbungan a te me etew ne mareet se hinimuwan.
Egpangguhud sikandan te ubat meyitenged keddiey.
3 Inlilingutan a nikandan wey in-eehetan a,
inlusuran a nikandan minsan ware aliddanan.
4 Inggeyinawaan ku sikandan piru iyan dan de insuli keddi ka egpamayung.
Piru migparahas-dahas e re due ka mig-ampu.
5 Mareet ka insuli dan te keupiya ku.
Ingkeepes a nikandan minsan geyinawa ka impapitew ku kandan.
6 Igpandakesel sikandin te me etew ne mareet se hinimuwan,
wey igpasasindeg diye te igkakawanan din ka egbayung kandin.
7 Emun ke eggukuman e sikandin, egkapamalehetan iya ne nakasale sikandin.
Ne egsumsumanen e te me etew ne kene ne meupiya ka peg-ampu din.
8 Kenad perem sikandin egkaluhey kayi te kalibutan.
Igbehey e perem ka trabahu rin diye te duma ne etew.
9 Egkeilu perem ka me anak din,
wey egkabalu ka asawa rin.
10 Egkaleleug perem ka me anak din wey egpampamuyu naan de,
wey egpaaween e perem sikandan diye te nahuhus e ne ugpaan dan.
11 Egpanguen perem ka me kasangkapan din te neutangan din.
Egpangahawen perem te me mahaliyug ka karatuan din.
12 Kenad perem sikandin igkeyid‑u te me etew,
wey kenad igkalulunu ka me anak din.
13 Kenad perem egkabuhal-buhal ka me anak din,
ne egkalingawan e ka ngaran te seup ne kabuhalan din!
14 Egkatanuran perem te Magbebaye ne Manama,
ka sale te me kabuybuyahan dan.
Kene perem egpasayluwen ka sale te iney rin.
15 Layun de perem seeye egkasuman-suman te Magbebaye,
wey eg-aween e perem te Manama sikandin wey kenad egkasuman-suman kayi te kalibutan.
16 Su warad iya sikandin nakasuman-suman ne egpapitew te keupiya,
su nasi de iya migleig-leig wey migpangimatey
te egkaayu-ayu, te egkaware-ware, wey te ware egkeyimu.
17 Egkeupian sikandin ne egdilus te duma,
uya egliberan degma sikandin igdilus.
Kene sikandin egkeupian ne egpanalangin te duma,
uya kene degma sikandin egkapanalanginan.
18 Eggelebek sikandin egdilus te duma,
wey nekeiling e seini te igkalayami rin ne kumbale.
Uya egkaabeleng din seini peendiye te getek din iling te weyig,
wey egleneb diye te tul‑an din iling te lana.
19 Egkabukusan perem sikandin te dilus iling te kumbale ne egpakabukus kandin,
wey egkataberan perem iling te sinturun ne igtetabed te tagse aldew.
20 Sika perem ka iglegpad te Magbebaye te me talagbayung keddi,
wey egsulian din ka seeye se eglalag te mareet keddiey.
21 Piru Magbebaye ne Manama ku,
pangabangi a nikeykew sumale te insaad nu.
Su mateles ka geyinawa nu ne kene egkabalbalawan,
sikan naa ka luwasa a ubag nikeykew.
22 Su egkaayu-ayu a wey egkaware-ware,
wey amana ne masakit ka geyinawa ku.
23 Egpekeiling a te alung ne egkaawe ke egkasagkup e,
iling te talangas ne eglayap te kalamag.
24 Egpangelkelen e ka buel ku te gutas,
warad kalambuan ku wey tul‑an e naan de.
25 Eggelebekan a nikandan te egbaley-baley,
ke egkiteen a nikandan, eglengey-lengey sikandan ka egdali-di keddi.
26 Bulihi a, he Magbebaye ne Manama ku,
luwasa a sumale te geyinawa nu ne kene egkabalbalawan.
27 Ipanengneng nu kandan ne dakel ka egkeyimu nu,
ne sikeykew iya Magbebaye ka egtuman due.
28 Igdilus a nikandan, piru egpanalanginan a mule nikeykew.
Emun ke eglusud sikandan, egkapeyilawan de iya,
piru dakel ka kahalaan te suluhuanen nu.
29 Egkeyilawan perem egkatamtamani ka me talagbayung keddi;
egkasaluuban perem sikandan te pegkeyilew iling te kumbale.
30 Egpataman-taman a egpasalamat te Magbebaye ne Manama,
egdayanen ku sikandin diye te kasuluhan.
31 Su egsasindeg sikandin wey eglapig te egkaayu-ayu,
eyew egluwasen sikandin puun te seeye se eglelalis ne eggimatey kandin.