119
Ka Balaud te Manama
1 Meupiya seeye se mig-ugpe ne ware igkarew‑ey,
wey mig-ikul te balaud te Magbebaye ne Manama.
2 Meupiya seeye se migtuman te me suhu din,
wey nasabeke e se suman-suman ne eg-ikul kandin.
3 Ware sikandan miggimu te mareet;
mig-ikul de iya sikandan te igkeupii rin.
4 Imbanasalan key nikeykew, he Magbebaye,
ne egtumanen egpaay-ayari ka me suhu nu kanami.
5 Igkeupii kud iya ne egkatuman ku,
ka me balaud nu.
6 Sikan naa ka kena a iya egkapeyilawan,
su egtumanen ku ma ka langun ne suhu nu.
7 Egdayanen ku sikeykew te intiru ne pusung ku,
taheed te egpanuluen a nikeykew te matareng ne me balaud nu.
8 Egtumanen ku iya ka me balaud nu;
kena a ubag nikeykew balahara.
Ka pegtuman te balaud te Manama
9 Egmenuwen te me kabatbataan ne kene egpakasuwey te igkeupii nu?
Egtumanen dan de iya ka me suhu nu.
10 Migsabeka kud ka pusung ku ne egpamakey keykew.
Kena a ipasuwey te me suhu nu.
11 Intetahu ku ka lalag nu kayi te pusung ku,
eyew kena a egpakasale keykew.
12 Egsayeen ku sikeykew, he Magbebaye;
panulua a te me balaud nu.
13 Iglalag ku wey igpangguhud ku,
ka langun ne balaud ne imbehey nu.
14 Igkahale kud iya ka peg-ikul te me suhu nu,
subla pad du te due dakel se karatuan.
15 Egpalemlemen ku ka me suhu nu,
wey eg-ay-ayaran ku te eg-ikul ka igmanulu nu.
16 Egkahale-gala a te me balaud nu;
kene ku eglingawan ka me suhu nu.
Ka kahalaan te pegtuman te Balaud te Manama
17 Ipakita nu ubag keddiey te suluhuanen nu ka keupiya nu,
eyew eg-ugpa a ne egtuman te lalag nu.
18 Puwasi nu ka suman-suman ku eyew egkasabut ku,
ka kateles te me balaud nu.
19 Nakaaran e re kayi te kalibutan,
purisu ipanengneng nu keddiey ka me suhu nu.
20 Mig-iman-iman ad iya te langun ne timpu,
ne egpakasabut te me suhu nu.
21 Insaparan nu ka indilus nu ne me hambuhen,
tenged su ware ma sikandan migtuman te me suhu nu.
22 Ipariyu a te peglemet wey pegbaley-baley,
tenged su intuman ku ka me balaud nu.
23 Eglibulung ka me pangulu wey egsuman-suman ne egdereet keddiey,
piru egpalemlemen ku te suluhuanen nu ka igmanulu nu.
24 Igkahale-gale kud iya ka me suhu nu;
egpakapanulu seini keddiey.
Ka pegpakannekal te pegtuman te balaud te Manama
25 Mahaan ad egpatey wey nakabahed e re.
Uyaha a ubag nikeykew iling te insaad nu.
26 Impangguhud ku keykew ka neneyimu ku, wey impammineg a nikeykew;
panulua a te me balaud nu.
27 Bulihi a ne egsabut te me suhu nu,
wey egpalemlemen ku ka kein-inuwan ne me himu nu.
28 Ne iling te egkabigtawan ad tenged te laggew ku,
purisu uyaha a nikeykew iling te insaad nu.
29 Ipariyu a te mareet ne dalan,
tenged te keupiya wey hid‑u nu, panulua a te balaud nu.
30 Nasabeke e ka suman-suman ku ne egtuman te me suhu nu;
intantanuran ku layun ka me balaud nu.
31 Intuman kud iya ka me balaud nu, he Magbebaye,
purisu kene e re ubag peyilawi.
32 Eg-ay-ayaran kud iya te eg-ikul* Te Hibruwanen: egpallahuy. ka me suhu nu,
uya su intimulan† Te Hibruwanen: imparakel. nu ma ka salabutan ku.
Ka peg-ampu para te katagseb
33 Panulua a, he Magbebaye, te igpasabut te me balaud nu,
wey egtumanen ku seini layun.
34 Behayi a te salabutan, eyew egkatantanuran ku ka balaud nu,
wey egkatuman ku seini te intiru ne pusung ku.
35 Panulua a te peg-ikul te me suhu nu,
su sika ka kahalaan ku.
36 Behayi a te geyinawa te pegtuman te me balaud nu,
kene ne geyinawa te pegkuwa te karatuan.
37 Ipariyu a te ware me pulus ne igkeupii ku;
ikeyid‑u a ubag iling te insaad nu.
38 Tumana nu ka insaad nu keddiey te suluhuanen nu,
ka insaad nu te seeye se migtahud keykew.
39 Ipariyu a te me lemet ne igkaaldek ku;
malehet iya ne meupiya ka me balaud nu.
40 Egkeupian ad iya ne egtuman te me suhu nu,
ne tenged su matareng ke ma, behayi a ubag te iyam ne umul.
Ka pegsalig te Balaud te Manama
41 Ipakita nu, he Magbebaye, ka geyinawa nu keddiey ne kene egkabalbalawan,
wey luwasa a iling te insaad nu keddiey.
42 Ne duen e igkatabak ku te miglemet keddiey,
tenged su migsalig e ma te lalag nu.
43 Bulihi a ne egpangguhud layun te kamalehetan,
tenged su duen de te me suhu nu ka eg-im-imanen ku.
44 Egtumanen ku layun ka balaud nu te ware egtamanan.
45 Eg-uugpa a ne ware igkabantali,
uya su migpakannekal e ma te pegtuman te me suhu nu.
46 Igpangguhud ku degma ka me suhu nu diye te me Hari,
wey kena ad iya egkeyilew.
47 Igkahale kud iya ka pegtuman te me suhu nu,
tenged su inggeyinawaan ku seini.
48 Intahud ku wey inggeyinawaan ku ka me suhu nu,
wey egpalemlemen ku ka me balaud nu.
Egkasalihan ka Balaud te Manama
49 Tantanuri nu ka insaad nu keddiey te suluhuanen nu,
tenged su sika ka egpallatengen ku.
50 Ne minsan egkabaybayaran a, egkaliwang e red,
uya su egpakabehey ma te umul keddiey ka saad nu.
51 Egtamtamanan a eglelemeti te me hambuhen,
piru wara ad iya migleke te balaud nu.
52 Egkasuman-suman ku ka me balaud nu dengan, he Magbebaye,
wey egpakaliwang iya seini keddiey.
53 Egpangebel-ebel e ka langet ku,
ke egpakakita a te mareet ne etew ne egsupak te balaud nu.
54 Ka me balaud nu ka me ulahingen ku,
taheed te kayi e pad te kalibutan.
55 Egkasuman-suman ku sikeykew, he Magbebaye, te timpu te marusilem,
wey egkapalemlem kud ka balaud nu.
56 Kahalaan ku ka pegtuman te me suhu nu.
Ka peggeyinawa te Balaud te Manama
57 Sikeykew re iya, he Magbebaye ne Manama, ka keilangan ku;
igsaad ku ne egtumanen ku ka me suhu nu.
58 Egpeyimmimenew ka geyinawa ku keykew,
ne ikeyid‑u a iling te insaad nu keddiey.
59 Insuman-suman ku ka neneyimu ku,
wey insaad ad ne eg-ikul te igmanulu nu.
60 Migdagdahew a, wey wara ad miglamu-lamu;
migtuman ad iya te me suhu nu.
61 Minsan pad nasahilut ad te me etew ne mareet se hinimuwan,
piru ware kud iya nalingawi ka me balaud nu.
62 Eggimata a te egliware e ka marusilem,
eyew egdayan keykew,
uya su eleg ka peggukum nu.
63 Alukuy a te langun ne egtahud keykew;
duma a te seeye se egtuman te me suhu nu.
64 He Magbebaye ne Manama, napenu te geyinawa nu ne kene egkabalbalawan ka kalibutan;
panulua a ubag te me balaud nu.
Ka karuan te Balaud te Manama
65 Intuman nu ka insaad nu, he Magbebaye,
wey meupiya ka keddiey te suluhuanen nu.
66 Behayi a ubag te katagseb wey katuenan,
tenged su migsalig a te me suhu nu.
67 Te ware e pad legpari nikeykew, mig-engked ad keykew,
piru kuntee egtumanen kud ka lalag nu.
68 Mateles ka wey meupiya ka himu nu;
panulua a ubag te me balaud nu.
69 Ne minsan pad egbebayungan a te me hambuhen te kene ne malehet,
intuman ku red iya ka me suhu nu te intiru ne pusung ku.
70 Warad iya mule geyinawa ran,‡ Te Hibruwanen: kene eggeram ke pusung dan iling te kalambuan.
piru igkatelesi ku mule ka balaud nu.
71 Meupiya re iya te inlegparan a nikeykew,
eyew egkanengnengan ku ka me balaud nu.
72 Meupiya pad keddiey ka balaud nu,
du te libu-libu ne me bulawan wey pelata.
Ka katareng te Balaud te Manama
73 In-ay-ayaran a himuwa nikeykew;
behayi a ubag te katagseb eyew egkasabut ku ka me balaud nu.
74 Egkahale seeye se egtahud keykew ke egkakita a nikandan,
tenged su migsalig e ma te saad nu.
75 Nakataha a, he Magbebaye, ne eleg ka peggukum nu,
wey inlegparan a nikeykew tenged su egtuman ke ma te insaad nu.
76 Liwanga a te geyinawa nu ne kene egkabalbalawan,
iling te insaad nu keddiey te suluhuanen nu.
77 Keyid‑u ka ubag keddiey, eyew egpabulus a ne eg-ugpe,
tenged su igkatelesi kud iya ka balaud nu.
78 Egkengeyilawan ka me hambuhen,
tenged su impatamtamanan a nikandan bebayungi te ubat.
Piru egpalemlemen ku ka me suhu nu.
79 Egparani keddiey seeye se egtahud keykew,
wey seeye se nakataha te me suhu nu.
80 Tuhuti a ubag ne egkatuman ku ka me balaud nu te intiru ne pusung ku,
eyew kena a egkapeyilawan.
Ka peg-ampu eyew egkaluwas
81 Napelaan ad ka egtetahad ke egluwasen a nikeykew,
piru mig-iman-iman e red iya te lalag nu.
82 Kena ad egpakameleg-meleg ka egtetahad te insaad nu;
nekeinsa ad ka migkahi, “Ken‑u e pad nikeykew egpangabangi?”
83 Nekeiling ad te lerut ne laplap ne tahuanan te binu ne inteluk,
piru ware kud iya nalingawi ka balaud nu.
84 Ken‑u e bu pad mule taman ka egtetahad?
Ken‑u nu pad eglegpari ka migbayad-bayad keddiey?
85 Ne migpangimu te paluwak ka me hambuhen ne ware migtuman te balaud nu,
eyew egpasaharan keddiey.
86 Egkasalihan iya ka langun ne suhu nu.
Imbaybayaran a te me etew ne egbayung keddiey te ubat,
purisu bulihi a ubag!
87 Deisek naan de iya perem ne egkeyimatayan ad nikandan,
piru ware ku inniyuhi ka me suhu nu.
88 Ne tenged te geyinawa nu ne kene egkabalbalawan, ikeyid‑u a ubag nikeykew,
eyew egkatuman ku ka me lalag nu.
Ka pegsalig te balaud te Manama
89 Ware egtamanan te lalag nu, he Magbebaye;
kene seini egkabalbalawan due te langit.
90 Kene egkabalbalawan ka pegkamatinumanen nu te langun ne kabuhalan;
inteil nu ay-ayari ka inged wey kenad iya seini egkaawe.
91 Duen ded ka langun ne kasangkapan taman kuntee tenged te suhu nu,
tenged su suluhuanen nu ma ka langun.
92 Emun ke kene pad ne balaud nu ka egpakapahale keddiey,
impatey e buwad perem tenged te me peg-antus ku.
93 Kene kud iya egkalingawan ka me suhu nu,
su tenged due, in-uyag e pad nikeykew.
94 Sikeykew ka kamuney te umul ku, purisu luwasa a ubag nikeykew,
tenged su migpakannekal a ka mig-ikul te me suhu nu.
95 Miggepasan ad te me etew ne mareet se hinimuwan eyew eggimatayan a,
piru egsumsumanen ku ka me balaud nu.
96 Nakita kud ne due iya katammanan te langun,
piru ware iya katammanan te me suhu nu.
Ka peggeyinawa te balaud te Manama
97 Inggeyinawaan kud iya ka balaud nu;
egsumsumanen ku seini te intiru ne aldew.
98 Duma ku layun ka me suhu nu;
nakapamatagseb pad seini keddiey du te me kuntere.
99 Dakel pad ka natuenan ku du te me talagpanulu ku,
tenged su insuman-suman ku ma ka me suhu nu.
100 Matagseb e pad du te me buyag e,
tenged su intuman ku ma ka me suhu nu.
101 Migpanalliya ad iya ne egpekeyimu te mareet,
eyew egkatuman ku ka me suhu nu.
102 Ware ku lingawi ka me balaud nu,
uya su sikeykew ma ka talagpanulu ku.
103 Tetelesi§ Te Hibruwanen: meemis. naan de iya mule ka me lalag nu,
subla pad ne mateles du te teneb.
104 Migmatagseb a tenged te me suhu nu,
purisu igkatameneng kud iya ka langun ne maddeet ne hinimuwan.
Ka keupianan puun te balaud te Manama
105 Iling te sulu ka lalag nu ne eg-inahak keddiey,
wey eglayag te egbayaan ku.
106 Egtumanen ku iya ka saad ku,
ne eg-ikul te matareng ne me balaud nu.
107 He Magbebaye ne Manama, amana ad iya nabaybayari,
purisu sumpuli nu pa ubag ka umul ku iling te insaad nu.
108 Dawata nu ubag, he Magbebaye, ka peg-ampu ku te pegpasalamat keykew,
wey panulua a te me suhu nu.
109 Andam a layun ne egpatey,
ware ku lingawi ka balaud nu.
110 Migbebaled e ka me etew ne mareet se hinimuwan para keddiey,
piru ware kud iya engkeri ka me suhu nu.
111 Ka me suhu nu ka karatuan ku,
wey ka kahalaan te pusung ku te ware egtamanan.
112 Nasabeke e ka suman-suman ku,
ne egtuman te me balaud nu taman te egpatey a.
Ka keupianan te pegtuman te Balaud te Manama
113 Igkalangeti kud iya seeye se kene ne mapahetpet ne egtuman keykew,
piru inggeyinawaan ku ka balaud nu.
114 Sikeykew ka aputanan ku wey ka talagpangabang ku;
mig-iman-iman a te insaad nu.
115 Pariyu kew keddiey, sikaniyu se makasesale ne me etew,
eyew egkatuman ku ka me suhu te Manama ku.
116 Behayi a ubag te kanekal iling te insaad nu eyew egpabulus a ne eg-ugpe;
kene nu ubag ituhut ne egkasuhey a te peg-iman-iman ku!
117 Bulihi a ubag eyew ware mareet ne egkeumaan ku,
wey egsumsumanen ku layun ka me suhu nu.
118 Mig-inniyuhan nu ka langun ne ware migtuman te me balaud nu;
warad iya me pulus te pegpanlimbung dan.
119 In-isip nu ne iling te lapek ka langun ne me etew ne mareet se hinimuwan,
purisu inggeyinawaan ku ka me balaud nu.
120 Igkaaldek kud iya sikeykew;
egkelkelen ad ka egkaaldek te peggukum nu.
Ka pegtuman te Balaud te Manama
121 Inggimu ku ka eleg wey matareng,
purisu kena a ubag ibehey te me kuntere ku.
122 Isaad nu ubag ne egbulihan a nikeykew se suluhuanen nu.
Kena a ubag balahara ne egle-leihen te me hambuhen.
123 Kena ad egpakameleg-meleg ka egtetahad,
ne egluwasen nu iling te insaad nu.
124 Sahipaa a ubag nikeykew se suluhuanen nu,
sumale te geyinawa nu ne kene egkabalbalawan,
wey panulua a te me balaud nu.
125 Suluhuanen a nikeykew purisu behayi a ubag te katagseb,
eyew egkasabut ku ka igmanulu nu.
126 Timpu e ne egsagman ka, he Magbebaye ne Manama,
tenged su insupak e te me etew ka balaud nu.
127 Inggeyinawaan kud iya ka me suhu nu,
subla pad te bulawan.
128 Purisu intuman ku ka langun ne suhu nu,
wey igkalangeti kud iya ka langun ne maddeet ne hinimuwan.
Ka eyam te pegtuman te Balaud te Manama
129 Meupiya naan de iya ka igmanulu nu,
purisu intuman ku seini te intiru ne pusung ku.
130 Egpakabehey te kalayag te suman-suman te me etew ka igmanulu nu,
wey egpakabehey te katagseb te ware me katuenan.
131 Egkeup-upian ad iya ne egtuman te me suhu nu.
132 Sahipaa e red ubag, wey keyid‑u ka ubag keddiey,
iling te eggimuwen nu layun te seeye se miggeyinawa keykew.
133 Ne inahaka a ubag iling te insaad nu,
kena a balahara ne egkareeg te mareet.
134 Luwasa a ubag puun te egmanleig-leig keddiey,
eyew egkatuman ku ka me suhu nu.
135 Ipakita nu ka keupiya nu keddiey te suluhuanen nu,
wey panulua a te me balaud nu.
136 Migpanaman-taman ad migsinehew,
tenged su kene egtuman te balaud nu ka me etew.
Ware eglapihan te Balaud te Manama
137 Matareng ka, he Magbebaye ne Manama,
wey eleg ka peggukum nu.
138 Matareng wey egkasalihan iya
ka me balaud ne imbehey nu.
139 Nalanglangetan ad iya,
su mig-inniyuhan te me kuntere ku ka me lalag nu.
140 Malehet iya ne egkasalihan ka saad nu,
wey sikeddi se suluhuanen nu, miggeyinawa kayi.
141 Minsan pad egkaayu-ayu a wey eglelemetan a,
ware kud iya lingawi ka me suhu nu.
142 Ware egtamanan te katareng nu,
wey malehet iya ka me balaud nu.
143 Masulug amana ka me prublima ku,
piru egpakapahale keddiey ka me suhu nu.
144 Matareng ka igmanulu nu te ware egtamanan;
behayi a ubag te katagseb eyew egpabulus a ne eg-ugpe.
Ka peg-ampu eyew egkaluwas
145 Egpangananey a keykew te intiru ne pusung ku, he Magbebaye ne Manama;
tabaka a ubag nikeykew wey egtumanen ku ka me suhu nu.
146 Migpangananey a keykew;
luwasa a ubag nikeykew wey egtumanen ku ka me balaud nu.
147 Mig-enew ad te ware pad migsile ka aldew ka egpangananey keykew,
su mig-iman-iman a te saad nu.
148 Wara ad miglipereng te intiru ne marusilem,
ka egpalpalemlem te lalag nu.
149 Pammineha a ubag, he Magbebaye, tenged te geyinawa nu ne kene egkabalbalawan;
ipakita nu ka hid‑u nu, wey bantayi a nikeykew.
150 Egparani e keddiey ka me etew ne mareet se hinimuwan ne migbayad-bayad keddiey,
ka me etew ne warad iya migtuman te balaud nu.
151 Piru duma ku sikeykew, he Magbebaye,
wey egkasalihan ka langun ne me suhu nu.
152 Dengan e re nakataha te me suhu nu;
inggimu nu seini ne ware egtamanan.
Ka peg-ampu eyew egkaluwas
153 Pitawa nu ka peg-antus ku wey luwasa a ubag nikeykew,
tenged su intantanuran ku ma ka balaud nu.
154 Pangabangi a ubag te migbayung keddiey,
wey luwasa a nikeykew iling te insaad nu.
155 Kene egkaluwas ka me etew ne mareet se hinimuwan,
tenged su ware ma migtuman sikandan te me balaud nu.
156 Piru dakel ka himenew nu, he Magbebaye;
ipakita nu ka hid‑u nu wey luwasa a ubag.
157 Masulug ka me kuntere ku ne migbayad-bayad keddiey,
piru ware kud iya engkeri ka me balaud nu.
158 Egkalanglangetan ad iya ke egkakita ku ka me akalen,
tenged su ware ma migtuman sikandan te me suhu nu.
159 Nakataha ka ne inggeyinawaan ku ka me suhu nu, he Magbebaye.
Kene egkabalbalawan ka geyinawa nu, luwasa a ubag nikeykew.
160 Malehet iya ka me lalag nu,
wey ware egtamanan te matareng ne me suhu nu.
Ka pegtuman te balaud te Manama
161 Imbaybayaran a te me pangulu minsan ware egpuunan,
piru intahud ku ka me lalag nu.
162 Nahale-gale a tenged te me saad nu,
iling te kahalaan te etew ne nakakita te susuluhi ne karatuan.
163 Igkalangeti ku wey igkatameneng kud iya ka langun ne ubat,
piru inggeyinawaan kud iya ka balaud nu.
164 Kapapitu a egpasalamat keykew tagse aldew,
tenged te matareng ne me peggukum nu.
165 Warad iya samuk te seeye se miggeyinawa te balaud nu,
wey warad iya egpakareeg kandan.
166 In-iman-iman a ne egluwasen a nikeykew, he Magbebaye,
wey intuman ku ka me suhu nu.
167 Intuman ku ka me balaud nu,
wey inggeyinawaan kud iya seini.
168 Nakataha ka te langun ne eggimuwen ku,
purisu intuman ku ka me suhu nu wey ka igmanulu nu.
Ka peg-ampu eyew egbulihan
169 Pammineha nu ubag, he Magbebaye ne Manama ka pegpangananey ku!
Behayi a ubag te katagseb iling te insaad nu.
170 Pammineha nu ubag ka peg-ampu ku,
wey luwasa a iling te insaad nu.
171 Egdayanen ku sikeykew layun,
tenged su impanulu a nikeykew te me balaud nu.
172 Eg-ulahing a meyitenged te balaud nu,
tenged su matareng ka langun ne me suhu nu.
173 Bulihi a ubag nikeykew layun,
tenged su intuman ku ma ka me suhu nu.
174 Mig-iman-iman a, he Magbebaye ne Manama, ne egluwasen a nikeykew.
Ka me balaud nu ka kahalaan ku.
175 Behayi a ubag te kanekal eyew egsayeen ku sikeykew,
wey pabulihi a ubag te me suhu nu.
176 Nalaag-laag ad iling te natarin ne karniru,
purisu pamitawa a ubag se suluhuanen nu,
tenged su intuman ku ma ka me balaud nu.