141
Ka peg-ampu te timpu te marusilem
Ka ulahingen ni Dabid.
1 Migpangananey a keykew, he Magbebaye ne Manama, bulihi a kuntee!
Pammineha nu ubag ka pegpangananey ku keykew.
2 ✡ Imp 5:8.Dawata nu ubag ka peg-ampu ku iling te insinsu,
wey ka ingkayew ku ne me belad ku iling te igpanubad te timpu te marusilem.
3 He Magbebaye, bulihi a ne egbantey te eglalahen ku,
tantanuri nu Manama ka be‑be ku.
4 Ipariyu a te mareet ne eggimuwen,
wey kena a paam-ambaha te me etew ne eggimu te mareet.
Kena a iparuma te me etew ne egmanlimbung,
kena a patambunga te sahakeen dan.
5 Egkaayun ne eglegparan a te etew ne maheteng wey egsaparan a nikandin duma te himenew,
piru kene ku igkeupii ne eg-itisan te lana ka ulu ku te me etew ne mareet se hinimuwan,
tenged su in-ampu ku layun ka maddeet ne me himu ran.
6 Emun ke igdegpak e ka me pangulu ran diye te batuwen ne kundawasan,
egpalintutuu e ka me etew ne malehet ka inlalag ku.
7 Ne egkatalagtag ka me tul‑an dan diye te lebeng,
iling te tane ne egkakali te daru.
8 Piru migsalig a iya keykew, he Magbebaye ne Manama.
Sikeykew ka talagpangabang ku,
purisu kena a ubag balahara ne egpatey.
9 Ipariyu a te me balatik ne inteen para keddiey,
me baled te me etew ne mareet se hinimuwan.
10 Egkeuney re perem egsahad ka me etew ne mareet se hinimuwan,
te me baled dan,
wey eglihad e re ne kenad iya egkamenu.