142
Ka peg-ampu te pegpangananey
Ka ulahingen* Te Hibruwanen: “maskil”, ngaran buwa seini te klasi te ulahingen. wey peg-ampu ni Dabid te diye sikandin te sulung.
1 Migpabulig a te Magbebaye ne Manama;
migpangananey a kandin.
2 Inlalag ku kandin ka langun ne pegsagsahukul ku;
insumbung ku kandin ka langun ne igkalaggew ku.
3 Ne emun ke egkalaggew ad,
egdumaan a nikandin.
Ne diye te dalan ne egbayaan ku,
due baled te me kuntere ku.
4 Te miglilingey a,
nakita ku ne warad iya egbulig keddiey;
ware egpangabang keddiey.
Warad iya migsahipe keddiey.
5 Migpabulig a keykew, he Magbebaye;
sikeykew ka talagpangabang ku;
sikeykew re iya ka keilangan ku kayi te kalibutan.
6 Pammineha nu ubag ka pegpangananey ku,
su warad egkapallahuyan ku.
Luwasa a puun te me kuntere ku,
su makeseg pad sikandan keddiey.
7 Luwasa a ubag nikeykew te kalised;
eyew egpakapasalamat a te ngaran nu.
Ne eglingut ka keet-etawan nu keddiey,
ke egkakita ran ka keupiya nu keddiey.