147
Egdayanen ka Magbebaye ne Manama
1 Dayana niyu ka Magbebaye ne Manama!
Eleg ne eg-ulahingan te me pegsaye ka Manama ta su meupiya sikandin;
mateles amana sikandin wey eleg ne eg-ulahingan.
2 Impasasindeg ded man‑e te Magbebaye ka Hirusalim,
wey impalibed din ded ka me Israilita ne naddakep.
3 Imbawian din ka geyinawa te me etew ne nasakitan,
wey impamagkesan din ka me pali dan.
4 Sikandin ka migbuut te kasuluhan te me bituen,
wey impangngaranan din ka tagse sabeka.
5 Mabantug wey maresen ka Magbebaye ne Manama ta,
wey kene egkatirew ka katuenan din.
6 Impangabangan din ka egkengaleig-leig,
piru impangugngug din te tane ka me etew ne mareet se hinimuwan.
7 Ulahing kew te pegpasalamat te Magbebaye ne Manama;
balesi niyu te salurey ka pegsaye niyu te Manama ta.
8 Imbunbunan din te me gapun ka langit;
impeuranan din ka tane,
wey immatubu din ka me hilamunen diye te me bubungan.
9 Impamehayan din te egkakeen ka me mahintalunan,
wey impanungguran din ka egmangengangang ne me pispis te me uwak.
10 Kene sikandin egkahale te mannekal ne me kudde,
wey te me makeseg ne me etew.
11 Iyan din mule igkahale seeye se migtahud kandin,
wey migsalig te geyinawa rin ne kene egkabalbalawan.
12 Deyraya niyu me matig-Hirusalim ka Magbebaye ne Manama;
sayaa niyu me matig-Siyun ka Manama niyu.
13 Inggiresenan din ka me pagul te gumawan te siyudad niyu,
wey impanalanginan din ka me anak niyu ne duma niyu.
14 Imbehayan din te keupianan ka intiru ne inged niyu,
wey inggibulung kew nikandin te amana ne memeupiya ne trigu.
15 Egpekeempet te kalibutan ka me suhu din,
wey mahaan de egpekeuma ka lalag din te minsan hendei.
16 Impeuranan din ka tane te egpekeiling te mummu ne egngaranan te isnu,
wey in-empet din ka demmug iling te alinepung.
17 Impeuran din ka apiyew ne iling te batu,
wey ware egpakaantus te kaagsil te apiyew.
18 Egsuhuen din de ka apiyew wey egkaleney e seini;
egpakalamahen din, wey egdalanag e ka weyig.
19 Impataha rin ka me lalag wey me balaud din
diye te me Israilita ne keet-etawan din.
20 Ware din seini himuwa diye te duma ne me nasud;
ware sikandan nakanengneng te kandin ne me balaud.
Dayanen ka Magbebaye ne Manama!