148
Pegpanengneng te kalibutan te pegdayan te Manama
1 Dayana niyu ka Magbebaye ne Manama!
Deyraya niyu ka Magbebaye due te langit,
dayana niyu sikandin due te aw-awangan.
2 Dayana niyu sikandin, sikaniyu se langun ne panalihan din;
deyraya niyu sikandin, sikaniyu se langun ne sundalu rin!
3 Dayana niyu sikandin, he aldew wey bulan;
deyraya niyu sikandin, he me bituen ne egmanlayag!
4 Dayana niyu sikandin, he subla ne matikang ne langit,
wey sikaniyu se weyig due te dibabew te langit.* weyig due te dibabew te langit: Egkakita diye te Hin 1:6-7.
5 Eleg sikandan langun ne egdayan te ngaran te Magbebaye,
tenged su miglalag de sikandin, wey neyimu e sikandan.
6 Inteil sikandan te Magbebaye diye te me inged dan te ware egtamanan;
miggimu sikandin te balaud ne kene dan egsupaken.
7 Dayana niyu ka Magbebaye, sikaniyu se due te kalibutan,
sikaniyu se bubuyahen ne me ngalap te dahat, wey te deralemi ne dahat,
8 sikaniyu se me kilat wey me apiyew, uran ne egpekeiling te mummu ne egngaranan te isnu wey me gapun,
wey manekal ne kalamag ne egtuman te suhu din!
9 Dayana niyu sikandin, sikaniyu se me labuntud wey me bubungan,
me kayu ne egpamehas wey me sidar,
10 langun ne me mananap: me ayam wey me mahintalunan,
egmandul‑ug ne me mananap wey me manuk-manuk.
11 Dayana niyu sikandin, sikaniyu se me Hari wey langun ne keet-etawan,
me upisyal wey langun ne me pangulu te kalibutan!
12 Me lukes-lukes wey me mengebay,
me buyag wey me bate!
13 Likes ne egdayan sikandan langun te ngaran te Magbebaye,
tenged su labew sikandin te langun.
Maresen pad sikandin du te minsan nekey kayi te kalibutan wey ke diye naa te langit.
14 Inlig‑en din ka nasud din,
eyew egdayanen sikandin te langun ne keet-etawan din—
ka keet-etawan te Israil ne pinalangge din.
Dayana niyu ka Magbebaye ne Manama!