Ulahingen
ni Sulumun
Igpewun‑a
Ka Ulahingen ne baseen, nasulat ka pegpaalihey, pegpaheyinaweey, wey pegpaasaweey. Nasulat man‑e te seini ne baseen ka pegkahale te lukes wey te malitan tenged te pegpaheyinaweey ran. Ka me etew te seini ne baseen iyan ka lukes, ka malitan, me mengebay te Hirusalim, wey ka me kanakan.
Ka Ulahingen ne baseen, impanunggiling layun te me Hudiyu te geyinawa te Manama wey te keet-etawan din, wey para te migmalintutuu ki Hisus, impanunggiling seini te rilasyun ni Hisus wey te simbaan.
Ka nenasulat te seini ne baseen
An-anayan ne ulahingen 1:1–2:7
Igkarangeb ne ulahingen 2:8–3:5
Igkatatelu ne ulahingen 3:6–5:1
Igkeep‑at ne ulahingen 5:2–6:3
Igkalalimma ne ulahingen 6:4–8:4
Igkeen‑em ne ulahingen 8:5-14
1
Ka an-anayan ne ulahingen
Malitan
2 Patamtamani a nikeykew te egpangarek,
su ka geyinawa nu meemis pad du te binu.
3 Heemuti naan de iya ka peemut nu,
wey ka ngaran nu egpekeiling keemut te imbusbus ne peemut.
Purisu kene egkein-inuwan ne egkaalihan ka me mengebay keykew.
4 Parani ka, gen-geni a wey egpallahuy ki.
Uyana a diye te sinabeng† Te Hibruwanen: me sinabeng. nu, he Hari ku.
Me mengebay te Hirusalim
Egkahale key iya ke duen ka!
Egkeupian key te geyinawa nu du te binu.
Malitan
Eleg de iya ne igkaalihi ka te me mengebay.
5 He me mengebay te Hirusalim,
meitem a iling te me balungbalung te Kidar,
piru mateles a iling te me kurtina te palasyu ni Sulumun.
6 Kena a lemeti nikaniyu tenged te meitem a,
su natutung a te aldew.
Nabelu keddi ka me suled ku ne me lukes
wey impatrabahu a nikandan te parasan,
sikan naa ka wara ad nakatugganul te pegkeetew ku.‡ Te Hibruwanen: piru ka keddiey ne parasan ware kud natugganul.
7 Guhuri a, inggeyinawaan ku,
hendei nu pepanabtaba ka me karniru nu?
Hendei nu igpeyimeley te meudtu?
Guhuri a nikeykew eyew kena a egpekeiling te malitan
ne migsisimbung ne natarin-tarin diye te duma nu ne me talagtameng te me karniru.
Lukes
8 Ke ware ka nakatulitu,
he tetelesi te langun ne malitan,
ikula nu re ka me kemes te me karniru ku
ne nakatangke diye te balungbalung te me talagtameng,
wey pepanabtaba nu ka me nati te kambing nu diye te marani.
9 He inggeyinawaan ku,
igpeiling ku sikeykew te beyan ne kudde
ne igkeinniyat te lukesan ne me kudde
ne egganuy te karwahi te Hari§ Te Hibruwanen: Paraun. te Ihiptu.
10 Mateles naan de iya ka beneng nu ne indayan-dayanan te me eritis!
Meupiya naan de iya ka lieg nu ne indayan-dayanan te me balieg ne mahal ne me batu!
Me mengebay te Hirusalim
11 Eggimuwan ney sikeykew te me eritis ne bulawan ne egdayan-dayanan te pelata.
Malitan
12 Nekeempet de iya ka keemut te peemut ku
taheed te migsuladlad ka Hari te pinnuuwanan din.
13 Meemut naan de iya ka pinalangge ku iling te senge-puyungut ne mira,
taheed te migsulsuladlad sikandin te kumeng* Te Hibruwanen: me susu. ku.
14 Egpekeiling sikandin te senge-bagkes te meemut ne bulak ne egngaranan te hina
ne diye te me parasan te In-Gidi.
Lukes
15 Mekein-inniyat ke naan de iya, inggeyinawaan ku;
tetelesi ke naan de iya!
Mateles ka mata nu iling kateles te me selepati!
Malitan
16 Tetelesi ka, pinalangge ku,
mekein-inniyat ke naan de iya!
Iyan ta hibatanan ka memeilem ne me hilamunen,
17 wey iyan ta lilliyungan ka me sugpang te sidar,
wey iyan ta atep ka mallapung ne dewun te ahuu.