8
1 Ke iling ke re perem te hari ku ne impasusu te iney ku,
eggarekan ku sikeykew ke egpekegkita ki minsan hendei
wey ware egsuman-suman te meenendue su talaari ki ma.
2 Egdumeen ku sikeykew diye te baley te iney ku,
diye te sinabeng te migpanulu keddi.* Iyan duma ne pegpasabut kayi ka malitan ne egpepanulu te lukes ke nekey ka geyinawa.
Egpeinumen ku sikeykew te meemut ne binu
ne egpuun te prutas ne granada.
3 Eg-ulunanan ku ka gibang ne belad nu,
wey igkepkep nu keddi ka kawanan ne belad nu.
4 Me mengebay te Hirusalim, pahunlibet kew keddi
ne kene niyu egpuwasan
wey egpukawen ka geyinawa te kene pad ne timpu.† Iyan duma ne igpasabut kayi ne kene egbanggawen ka pegpaheyinaweey te lukes wey malitan.
Ka ikeen‑em ne ulahingen
Me mengebay te Hirusalim
5 Hentew sika se egpeendini ne egpuun te disirtu
ne migsuladlad te pinalangge din?
Malitan
Impukew ku sikeykew
diye te diralem te mansanas ne kayu,
ne impangalalinan keykew
wey in-anakan keykew.
6 Sikeddiey re iya geyinawei nu,
sikeddiey re iya lehenga nu.‡ Te Hibruwanen: Itahu a ne silyu te pusung nu, isip silyu te belad nu.
Maresen amana ka geyinawa, iling te kamatayen,
wey egtanud-tanud seini iling te lebenganan.
Egmeinit seini iling te hapuy ne egkanlabkanlab.
7 Kene seini egkeebukan
minsan pad ke egbusbusan te dakel ne weyig.
Minsan pad ke egbaggiyuwan seini,
kene ded iya man‑e egkeebukan.
Kene seini egkabeli
minsan pad ke ig-amin te etew ka langun ne karatuan din;
egkasamsamilian de ka karatuan din.
Me maama te malitan
8 Due atebey ney
ne ware pad benihi.
Nekey ka eggimuwen ney
ke due eg-aalig kandin?§ Te Hibruwanen: te aldew ne eglalahen e sikandin.
9 Ke alad pa sikandin,
egsumpulan ney sikandin te alad ne pelata.
Ke gumawan pa sikandin,
egbalabahan ney sikandin te tabla ne sidar.
Malitan
10 Alad a wey ka kumeng ku
iling te matikang ne baley.
Nakita a te pinalangge ku,
wey ingkatelesi a nikandin.
11 Due parasan ni Sulumun diye te Baal-Hamun.
Impatanggu rin seini te me talagbasuk.
Ka tagse sabeka kandan
egbehey te sabeka ne libu (1,000) ne pelata
isip baad din te parasan din.
12 Piru sikeddi, due mule parasan ku ne sikeddi de iya ka egtanggu.
Keykew re sika se sabeka ne libu (1,000) ne pelata, he Sulumun,
wey ka daruwa ne gatus (200) ne pelata kandan de te me talagbasuk.
Lukes
13 He sikeykew se mig-ugpe diye te me pinamulaan,
egpanallinga eg-ayad-ayad te laheng nu ka me duma ku,
wey parineha a degma te laheng nu.
Malitan
14 Hendini ka,
pinalangge ku.
Pekeiyal ka iling te salareng wey ke te nati naa kayi
ne diye te me bubungan te me leggu.
*8:2 Iyan duma ne pegpasabut kayi ka malitan ne egpepanulu te lukes ke nekey ka geyinawa.
†8:4 Iyan duma ne igpasabut kayi ne kene egbanggawen ka pegpaheyinaweey te lukes wey malitan.
‡8:6 Te Hibruwanen: Itahu a ne silyu te pusung nu, isip silyu te belad nu.
§8:8 Te Hibruwanen: te aldew ne eglalahen e sikandin.