3
Ka sale te Hirusalim
1 Mekeyid‑u-hid‑u ka Hirusalim su in-ugpaan te me etew ne mallindit se egmangimuwen,
masinupaken sikandan wey egmanleig-leig te me etew ka me pangulu ran.
2 Kene sikandan egpammineg ke eglalahan
wey kene egpalintutuu ke egsaparan.
Ware sikandan migsalig te Magbebaye ne Manama
wey ware sikandan migparani te Manama ran.
3 Ka me pangulu te seini ne siyudad egpekeiling te egginihel ne liyun,
wey egpekeiling ka me talewukum te me singgalung ne egmanggutasan amana ne egmambalbalen e
wey ware egsameen te egkeenen dan taman te egkapawaan.
4 Me hambuhen wey kene egkasalihan ka me prupita;
ware tahura te me talagpanubad ka timplu te Manama wey ware dan tumana ka me balaud din.
5 Piru matareng ka Magbebaye ne diye te siyudad dan,
wey kene sikandin eggimu te mareet.
Igpapitew rin ka katareng din te tagse maselem;
eggimuwen din seini tagse aldew.
Piru ka me etew ne maddeet se me hinimuwan, kene iya egkeyilew.
6 Ne migkahi ka Magbebaye, “Indereetan ku ka me nasud,
wey ingguhus ku ka me alad te me siyudad.
Indereetan ku ka me dalan,
eyew warad etew ne eglihad.
Nahuhus e ka me siyudad wey in-engkeran e,
wey warad me etew ne nangugpe.
7 Sikan naa ka nakakahi a, ‘Egtahud e ka keet-etawan ku keddi,
wey egpammineg e sikandan keddi ke egsaparan ku.
Ne emun ke eggimuwen dan sika, kene kud e egdereetan ka me ugpaan dan wey kene kud e eglegparan sikandan.’
Piru nasi de iya sikandan nalelehet ne miggimu te maddeet ne hinimuwan.
8 “Sikan naa ka tahari niyu ka aldew ne eggukuman kud ka me etew te me nasud.
Su nakasuman-suman ad ne eglibulungen ku ka me etew te me nasud wey te me migharian,
eyew igpaneem-neem ku ka egpangebel-ebel ne langet ku kandan.
Su egkasilaban ka intiru ne kalibutan tenged te egpangebel-ebel ne langet ku,” kahi te Magbebaye.
9 Migkahi pad man‑e sikandin,
“Malehet iya ne te sika kangkuwa ne aldew eglinisan ku ka keet-etawan te me nasud,
eyew egdawit e sikandan te ngaran ku wey egkasabeke e sikandan ka egpamakey keddi.* Te Hibruwanen: su eyew egpamakey sikandan kandin te sabeka ne pamanayen.
10 Ka migsimba keddi ne nenekegsuwey-suwey ne keet-etawan wey diye nangugpe te talipag te me weyig te Itiyupiya,† Te Hibruwanen: Kus. egmanlepew ne egmanguyan te igmandasag dan.
11 Te sika kangkuwa ne aldew, kene kew e egkeyilew se keet-etawan ku
tenged te pegsukul niyu keddi,
su eg-aween kud puun kaniyu ka me hambuhen,
wey warad e mapegpeggasal diye te matulus ne siyudad ku ne Hirusalim.‡ Te Hibruwanen: “matulus ne bubungan” su diye ma ka Hirusalim te bubungan.
12 Ne iggaat ku diye te Hirusalim ka keet-etawan ku ne me mapariralemen.
Egpangananey sikandan keddi wey egsalig keddi.
13 ✡ Imp 14:5.Ne seeye se nenasame diye te Israil, kenad e egmangimu te mareet
wey kenad e egmanguubat,
wey kenad e egmanlimbung.
Egmatubung§ Te Hibruwanen: egmanabtab. sikandan
wey egmangibat ne warad igkangilam.”
Ka ulahingen te pegkahale
14 Panaman-taman kew ulahing, keet-etawan te Siyun.* Ka matig-Siyun, matig-Israil, wey ka matig-Hirusalim, sabeka re ne grupu te keet-etawan.
Panguleyi kew, keet-etawan te Israil!
Gale-gale kew ne egpuun te pusung niyu, keet-etawan te Hirusalim!
15 In-awe e te Magbebaye ka parusa rin kaniyu,
wey indeldel rin e ka me kuntere niyu.
Ne ka Hari te Israil, ne iyan ka Magbebaye ka egduma kaniyu,
wey warad karereetan ne igkaaldek niyu.
16 Te sika ne aldew, egkahiyan kew ka matig-Hirusalim,
“Kene kew kaaldek.
Sikaniyu se mig-ugpe te Siyun,
pakannekal kew.† Te Hibruwanen: kene egkapu-pu ka me belad niyu.
17 Tenged su duma niyu ka Magbebaye, ne Manama niyu.
Maresen sikandin ne Manama ne egpangabang kaniyu.
Neele amana sikandin kaniyu,
wey eglingawan din e ka mareet ne hinimuwan niyu tenged te geyinawa rin kaniyu.
Egpanaman-taman sikandin eg-ulahing te pegkahale din kaniyu,
18 iling te pegkahale te etew ne migtambung te sahakeen.”
Migkahi ka Magbebaye,
“Kene kud sikaniyu egpeyingumaan te karereetan
eyew kene kew e egkengeyilawan.
19 Te sika ne timpu, egparusaan ku ka langun ne migdeeg-deeg kaniyu.
Ne eglibulungen ku ka keet-etawan ne natalagtag
wey egpakalibed minsan ka pungku.
Egdayanen e sikandan wey kenad e egpeyilawan,
wey eggimuwen ku sikandan ne mabantug te intiru ne kalibutan.
20 Te sika ne timpu, eglibulungen ku sikaniyu
wey igpalibed ku sikaniyu te me ugpaan niyu.
Eggimuwen ku sikaniyu ne mabantug
wey egdayanen kew te langun ne etew te intiru ne kalibutan.
Egkeyitabu sika te timpu ne egmatubungen kud e man‑e sikaniyu.”
Sika ka ingkahi te Magbebaye.
*3:9 Te Hibruwanen: su eyew egpamakey sikandan kandin te sabeka ne pamanayen.
†3:10 Te Hibruwanen: Kus.
‡3:11 Te Hibruwanen: “matulus ne bubungan” su diye ma ka Hirusalim te bubungan.
§3:13 Te Hibruwanen: egmanabtab.
*3:14 Ka matig-Siyun, matig-Israil, wey ka matig-Hirusalim, sabeka re ne grupu te keet-etawan.
†3:16 Te Hibruwanen: kene egkapu-pu ka me belad niyu.