126
Ka peg-ampu para te keupianan te Israil
Ka ulahingen para te pegpatakereg diye te Hirusalim.
1 Te timpu ne impalibed ki te Magbebaye ne Manama diye te Hirusalim puun te pegkarakep ta,
egkahiyen ta ne taheinep te re seeye.
2 Amana se me ngisiyan ta wey nangulahing ki tenged te kahale.
Ne migkahi ka keet-etawan te duma ne nasud,
“Dakel ne kein-inuwan ka inggimu te Magbebaye ne Manama para kandan.”
3 Malehet iya ne miggimu ka Magbebaye ne Manama te dakel ne kein-inuwan para kanta,
wey amana ki nahale-gale.
4 He Magbebaye ne Manama, matubunga key e man‑e nikeykew,
iling te neetiyan ne me beuhan te inged te Nigib ne egbusbusan nu te weyig.
5 Ne seeye se migpamula ne migsinehew,
eggaani sikandan ne amana egkahale-gale.
6 Ka seeye se migsinehew ne mig-uyan te puntil ne intahuan te beni eyew igpamula,
egmanggaani ne egkahale-gale wey egmanguli ne eg-uyan te nahaani ran.