6
Ka hep‑at ne karwahi
1 Nataman, migpitew ad e man‑e, wey iyan kud man‑e se hep‑at ne karwahi ne miglepew puun te elat-elat te daruwa ne bubungan ne burunsi.
2 Ka hun‑a ne karwahi, ingganuy te mallalab ne me kudde, ne ka igkarangeb ne karwahi, ingganuy te memeitem ne me kudde.
3 Ne ka igkatelu ne karwahi, ingganuy te memaangkag ne me kudde, wey ka igkeep‑at ne karwahi, ingganuy te me balangbangan ne me kudde. Neelin ne mannekal ka me kudde.
4 Ne mig-insaan ku ka panalihan, “Ahalen, nekey‑a ka igpasabut due?”
5 Ne migtabak ka panalihan, “Iyan sika ka hep‑at ne kalamag diye te langit ne diye pad migpuun te tangkaan te Magbebaye ne Manama te intiru ne kalibutan.”
6 Ne ka karwahi ne ingganuy te memeitem ne me kudde, egpeendiye te igkahibang ne balabahan te Babilunya. Ne ka karwahi ne ingganuy te memaangkag ne me kudde, egpeendiye te iglineb, ne ka karwahi ne ingganuy te me balangbangan ne me kudde, egpeendiye te igkakawanan ne balabahan.
7 Ne migmanligkat e ka mannekal ne me kudde ne egkaana-ane en iya ka egligkat eyew egpitew ke nekey ka egkengeyitabu te intiru ne kalibutan. Piru migkahiyan pad sikandan te panalihan, “Hipanew kew e, wey empeta niyu te egpitew ka intiru ne kalibutan!” Ne migmanligkat e sikandan.
8 Nataman, migpangumew e keddi ka panalihan ne miggenendue, “Tengtengi nu seeye se nangendiye te igkahibang ne balabahan. Sikandan ka egpakapeyimmeley te Panisingan te Manama diye ne inged!”
Ka pegkuruna ki Huswi
9 Ne impanengneng a te Magbebaye ne Manama,
10 “Pangua nu naa ka me bulawan wey me pelata ne igdasag ni Hilday, ni Tubiyas, wey ni Hidayas. Nekeuli e sikandan ka naddakep ne in-uyan dengan diye te Babilunya. Ne leus ke naa diye ki Husiyas ne anak ni Supuniyas.
11 Himuwa nu naa ne kuruna ka me pelata wey me bulawan. Ne ikuruna nu naa seini ki Huswi, ka Labew ne Talagpanubad ne anak ni Hihusadak.
12 Nangeni nu sikandin te migkahi a se Amana ne Maresen ne Magbebaye, ‘Pammineg ka. Ka etew ne egngaranan te Sugpang, egmatubung sikandin te peg-ugpe din, wey sikandin ka egbalew-balew egpasasindeg te timplu ku.’
13 Uya, igbalew-balew rin igpasasindeg ka timplu ku. Egmabantug sikandin iling te Hari wey sikandin ka egmandu te keet-etawan. Ne due egsasindeg ne talagpanubad diye te kakiliran te trunu rin, wey egpekegtuleddu sikandan se daruwa.
14 Ne ka kuruna, diye de igtahu te timplu ku eyew due eglimlimuan engki Hilday, ki Tubiyas, ki Hidayas, wey ki Husiyas ne anak ni Supuniyas.”
15 Ne ka me etew ne diye te maddiyu ne inged, egpangendiye te Israil ka egbulig eggimu te timplu te Magbebaye ne Manama. Emun ke egkeyitabu e seini, egkatahaan niyud e ne iyan migsuhu keddi ka Amana ne Maresen ne Magbebaye eyew eggendini te kaniyu. Ne egkeyitabu iya seini ke egpegpehetan niyu te egtuman ka me suhu te Magbebaye ne Manama niyu.