Huswi
Igpewun‑a
Ka baseen ne Huswi, guhuren seini te me kabuhalan ni Israil te peglusud dan te Kanaan. Ne iyan migpangulu kandan si Huswi ne nakaliwan ki Muwisis. Seini ka me neyitabu te seini ne baseen: ka peglapas dan te Weyig ne Hurdan, ka pegkahuhus te Hiriku, ka gira diye te Ay, ka pegbaad-baad te inged diye te tagse tribu te Israil, wey ka pegbalew-balew te kasabutan te Manama wey te me keet-etawan din. Ne ka amana ne neila ne birsikulu te seini ne baseen iyan ka, “Alam kew kuntee ne aldew ke hentew ka egpamakayen niyu… Piru sikeddi wey ka me pamilya ku egpamakey mule te Magbebaye ne Manama” (24:15).
Ka nenasulat te seini ne baseen
Ka pegkatalu te Kanaanen 1:1–12:24
Ka pegbaad-baad te tane 13:1–21:45
a. Ka tane ne diye dapit te igsile te Weyig ne Hurdan 13:1-33
b. Ka tane ne diye dapit te iglineb te Weyig ne Hurdan 14:1–19:51
c. Ka me siyudad ne aputanan 20:1-9
d. Ka me siyudad te me Libita 21:1-45
Ka peg-uli te me kabuhalan ne diye te igsile, diye te inged dan 22:1-34
Ka katamanan ne peglalag ni Huswi 23:1-16
Ka pegbalew-balew te kasabutan diye te Sikim 24:1-33
1
Ka suhu te Manama ki Huswi
1 Te migpatey e si Muwisis ne suluhuanen te Magbebaye ne Manama, migkahiyan te Magbebaye ka talagbulig ki Muwisis ne si Huswi ne anak ni Nun, 2 “Migpatey e si Muwisis ne suluhuanen ku, purisu, keilangan ne egpangandam ka wey ka langun ne etew te peglapas te Weyig ne Hurdan peendiye te inged ne igbehey ku kaniyu te keet-etawan ku. 3 ✡ Diy 11:24-25.Igbehey ku kaniyu ka langun ne inged ne egkariekan niyu sumale te insaad ku ki Muwisis. 4 Seini ka eletanan niyu: puun te disirtu ne diye te igkakawanan ne balabahan te igsile peendiye te kabubunganan te Libanun ne diye te igkahibang ne balabahan te igsile, wey puun te dakel ne Weyig ne Iyupratis ne diye te igsile peendiye te Dahat ne Miditiranyu ne diye te iglineb taman diye te inged te me Hitihanen. 5 ✡ Diy 31:6,8; Hib 13:5.Ware egpakatalu keykew taheed te manekal ke pad. Egdumaan ku sikeykew iling te pegduma ku ki Muwisis wey kene ku iya sikeykew eg-engkeran. 6 ✡ Diy 31:6-7,23.Pakannekal ka wey pakabbulut ka su sikeykew ka egpangulu te keet-etawan te peg-angken te inged ne insaad ku te me kaap-apuan dan. 7 Pakannekal ke re iya wey pakabbulut ka, keilangan ne egtumanen nu ka intiru ne Balaud ne imbehey keykew te suluhuanen ku ne si Muwisis. Kene nu irapig seini, su eyew eglampus ka minsan hendei ka egbaye. 8 Kene nu iya lingawi te egbasa ka Libru te Balaud. Palemlema nu seini te aldew wey marusilem, wey keilangan ne egtumanen nu ka langun ne nasulat kayi. Puun due, egmatubung ka wey eglampus ka. 9 Sumsumana nu ne insuhu ku sikeykew, ‘Pakannekal ka wey pakabbulut ka, kene ka iya kaaldek wey kene ka paliliyas su ka Magbebaye ne Manama nu, egduma keykew minsan hendei ka egbaye.’ ”
Ka pegsuhu ni Huswi te keet-etawan
10 Ne insuhu ni Huswi ka me pangulu te me etew te miggenendue, 11 “Pangendiyei niyu ka kampu wey kahii niyu ka me etew te egpepangandamen sikandan te egkakeen su igkatatelu ne aldew kuntee, egpanlapas kid diye te Weyig ne Hurdan eyew te peg-angken te inged ne imbehey kanta te Magbebaye ne Manama ta.”
12 ✡ Num 32:28-32; Diy 3:18-20; Huswi 22:1-6.Ne migkahiyan ni Huswi ka me kabuhalan ni Rubin, ni Gad, wey katenge te me kabuhalan ni Manasis,* Inteil ni Muwisis diye te kabuhalan ni Rubin, ni Gad, wey te katenge te kabuhalan ni Manasis ka tane ne diye dapit te igsile te Weyig ne Hurdan wey ka katenge te kabuhalan ni Manasis diye te iglineb. 13 “Tantanuri niyu ka ingkahi ni Muwisis ne suluhuanen te Magbebaye ne Manama ne igbehey kaniyu ka seini ne tane eyew eg-ugpaan niyu. 14 Ne ka asawa niyu, me anak niyu, wey ayam niyu, iggaat de kayi te inged te igsile te Weyig ne Hurdan ne imbehey kaniyu ni Muwisis. Piru keilangan ne eggun‑a eglapas ka kumplitu te panganiban te seeye se karumaan niyu ne me kabuhalan ni Israil eyew egbulihan sikandan, 15 taman te egkaangken dan e ka tane ne igbehey te Magbebaye ne Manama kandan. Egkataman, egkaayun kew e ne eglibed wey eg-ugpe kayi te inged te igsile te Hurdan ne imbehey kaniyu ni Muwisis ne suluhuanen te Magbebaye.”
16 Ne migtabak sikandan ki Huswi, “Eggimuwen ney ka langun ne insuhu nu kanami, wey eggendiye key minsan hendei key nikeykew igpeendiye. 17 Eg-ikul key keykew iling te peg-ikul ney ki Muwisis. Egdumaan ka perem te Magbebaye ne Manama nu iling te pegduma rin ki Muwisis. 18 Eggimatayan seeye se egsupak wey seeye se kene egtuman te me suhu nu. Pakannekal ka wey pakabbulut ka!”
✡1:12 Num 32:28-32; Diy 3:18-20; Huswi 22:1-6.
*1:12 Inteil ni Muwisis diye te kabuhalan ni Rubin, ni Gad, wey te katenge te kabuhalan ni Manasis ka tane ne diye dapit te igsile te Weyig ne Hurdan wey ka katenge te kabuhalan ni Manasis diye te iglineb.