1 Ne due Hari te Tiru ne egngaranan ki Hiram ne naluhey e ne tala-alukuy ki Dabid. Purisu te nakanengneng e sikandin te mighari e si Sulumun subal te amey rin ne si Dabid, migsuhu e sikandin te me suluhuanen din diye ki Sulumun. 2 Ne impanahaan e degma ni Sulumun si Hiram: 3 “Nakanengneng ka ne ware nekeyimu te timplu ka amey ku ne si Dabid para te ngaran te Magbebaye ne Manama rin, su layun de sikandin egpakig-ehet te me kuntere din ne nakalingut ne me nasud. Ne nataman, natalu rin ded iya sikandan puun te bulig te Magbebaye. 4 Piru kuntee imbehayan e te Magbebaye ne Manama ku te keupianan ka migharian ku. Warad e me kuntere ku te minsan hendei wey ke karereetan naa. 5  ✡ 2Sam 7:12-13; 1Kru 17:11-12.Ne sikan naa ka eggimu ad te timplu para te ngaran te Magbebaye ne Manama ku, iling te insaad din te amey ku ne si Dabid te migkahi, ‘Ka anak nu ne igpasubal ku te trunu nu ka eggimu te timplu para keddi.’ 6 Ne suhua nu naa ubag ka me Sidunihanen eyew egpangabangan a te egpameled te me kayu ne sidar diye te Libanun. Egpabulihan ku sikandan te me etew ku, wey egbayaran ku sikandan te minsan nekey ne igkeupii nu ne bayad su nakanengneng ka ne warad iya etew ku ne egpekeiling kandan te egpameled te kayu.”

7 Te nahuhuran e si Hiram te lalag ni Sulumun, amana sikandin nahale wey migkahi, “Egdayanen ka Magbebaye ne Manama te seini ne aldew su imbehayan din si Dabid te matagseb ne anak eyew egsubal kandin eghari te dakel ne nasud!” 8 Ne impanahaan e degma ni Hiram si Sulumun te miggenendue, “Narineg kud ka lalag nu para keddi, wey andam a ne eggimu te igkeupii nu meyitenged te sidar wey sipris. 9 Igpatupang te me etew ku ka me geed ligkat te me bubungan te Libanun peendiye te Dahat ne Miditiranyu, wey eggimuwen dan seini ne gakit eyew eglawang sikandan peendiye te igkeupii nu ne eglimuran. Ne diye, egpangekaran dan e seini eyew eg-angayen e degma te me etew nu. Ne iyan ku re igkeupii ne egbehayan nu te egkakeen ka me etew ku kayi te palasyu ku.”

10 Ne imbehey e iya ni Hiram ka me sidar wey sipris ne keilangan ni Sulumun. 11 Ne imbehayan degma sikandin ni Sulumun te hen‑em ne pulu ne libu (60,000) ne saku ne trigu, wey sabeka ne gatus wey sapulu ne libu (110,000) ne gelun ne lana te ulibu. Tagse leg‑un din seini igbehey para te me etew ni Hiram. 12 Ne imbehayan te Magbebaye ne Manama si Sulumun te katagseb sumale te insaad din kandin. Ne meupiya ka pegpa-alukuyey ran ki Hiram, wey migpegsabutey degma sikandan para te keupianan.

13 Ne impehes e ni Sulumun te egpatrabahu ka tatelu ne pulu ne libu (30,000) ne etew puun te intiru ne Israil. 14  ✡ 1Har 12:18.Ne imbaad din sikandan te tatelu ne baad. Tagse baad, due sapulu ne libu (10,000) ne etew wey tigsenge-bulan sikandan ka egtrabahu diye te Libanun human egsubal ka senge-baad; wey daruwa ne bulan sikandan diye te me ugpaan dan. Ne si Aduniram ka impiyalan te me etew ne impehes patrabahuwa. 15 Ne due man‑e pitu ne pulu ne libu (70,000) ne trabahanti ni Sulumun ne talagtiang te me batu, wey walu ne pulu ne libu (80,000) ne talagperi te me batu diye te bubungan te Huda. 16 Ne duen pad man‑e tatelu ne libu wey tatelu ne gatus (3,300) ne etew ne impiyalan din ne egtameng te me trabahanti. 17 Intuman te me trabahanti ka insuhu ni Hari Sulumun ne egpanapsapan ka derakel wey mahal ne me batu eyew eggimuwen ne pabunsuran te timplu. 18 Ne seeye naa ka in-andam e te me trabahanti ni Sulumun, wey ni Hiram, wey te me matig-Gibal ka me batu wey me geed ne eggamiten dan te egpasasindeg te timplu.