1 Pitu pad ka idad ni Huwas te neyimu sikandin ne Hari, wey mighari sikandin te Hirusalim te hep‑at ne pulu (40) ne leg‑un. Si Sibiya ne matig-Birsiba ka iney rin. 2 Meupiya ka hinimuwan ni Huwas diye te tangkaan te Magbebaye ne Manama te neuyag pad si Hihuyada ne talagpanubad. 3 Ne impaasawaan ni Hihuyada te daruwa si Huwas wey nakaanak sikandan te me lukes wey me malitan.

4 Te ware naluhey, nakasuman-suman si Huwas ne eg-ay-ayaran din ka timplu te Magbebaye. 5 Impeumew rin ka me talagpanubad wey ka me Libita wey ingkahiyan din sikandan, “Hendiye kew te me siyudad te Huda wey pangua niyu ka buhis ne igbehey te me matig-Israil tagse leg‑un eyew egkaay-ayaran ta ka timplu te Manama ta. Na hendiye kew e wey keiyal kew.” Piru ware sikandan miglinga-linga te insuhu din. 6  ✡ Iks 30:11-16.Purisu, impeumew te Hari si Hihuyada ka Labew ne Talagpanubad wey mig-insaan din, “Mania te ware nu ipakuwa te me Libita ka buhis te me mahinged te Huda wey te Hirusalim? Nasabutan e dengan ni Muwisis ne suluhuanen te Manama wey te langun ne kabuhalan ni Israil ne egkuen seini para te Balungbalung ne Temuwanan.”

7 Su inseleran dengan te me anak ni Ataliya ne mareet ne malitan ka timplu te Manama wey inggamit dan te pegpamakey te me larawan ni Baal ka me kasangkapan ne inhalad diye te timplu.

8 Purisu, migbanasal si Hari Huwas ne eggimu te kaban ne egtahuan te seleppi wey igtahu seini diye te lihawangan te gumawan te timplu te Magbebaye. 9 Ne impanengneng dan ka langun ne mig-ugpe te Huda wey te Hirusalim ne keilangan ne eg-uyan sikandan te buhis para te Magbebaye ne imbuyu ni Muwisis te me matig-Israil te diye pad sikandan te disirtu. 10 Nahale-gale ka langun ne me upisyal wey ka me etew wey in-uyan dan ka me buhis dan wey in-ulug dan seini diye te kaban taman te napenu seini. 11 Ke egkapenu e ka kaban, eg-uyanen e seini te me Libita diye te me upisyal te Hari. Ne egkuen e te sikritari te Hari wey te me upisyal te Labew ne Talagpanubad ka seleppi puun te kaban. Ne iglibed dan ded ka kaban diye te gumawan te timplu. Sika ka eggimuwen dan te tagse aldew wey dakel ka nalimud dan ne seleppi.

12 Ne imbehey te Hari wey ni Hihuyada ka seleppi diye te me etew ne immamiyalan te trabahu, ne iyan mig-akat te me talagperi te batu wey te me panday ne eg-ayad-ayad te timplu te Magbebaye. Mig-akat man‑e sikandan te eggimu te me kasangkapan ne egpuun te putew wey te burunsi. 13 Migpakannekal ka me trabahanti ne egtrabahu, purisu meiyal ka peg-ayad-ayad. Impasasindeg dan ilibed ka timplu te Manama ne iling ded te tapey wey inlig‑enan dan pad seini. 14 Te neimpusan dan e ka trabahu, imbehey ran ded ka nasame ne seleppi diye te Hari wey ki Hihuyada. Inggamit dan seeye ne seleppi te pegpeyimu te me kasangkapan para te timplu te Magbebaye, me kasangkapan te pegsimba, te pegtutung te igpanubad, wey te me yahung, me tahuanan ne bulawan wey pelata. Ne aldew-aldew ka pegtutung te igmanubad diye te timplu te Magbebaye taman te neuyag pad si Hihuyada.

15 Ne buyag e amana si Hihuyada wey migpatey sikandin te sabeka ne gatus wey tatelu ne pulu (130) ka idad din. 16 Ne insabal ran sikandin diye te insabalan te me Hari te Siyudad ni Dabid su meupiya ma ka neyimu rin te Israil, te Manama, wey te timplu rin.

17 Te migpatey e si Hihuyada, miggendiye ki Hari Huwas ka me upisyal te Huda wey migpanimbuel sikandan diye te tangkaan din. Ne migpammineg ka Hari te me tambag dan. 18 Ne mig-engkeran dan e ka timplu te Magbebaye, ka Manama te me kaap-apuan dan, wey migsimba sikandan te sungkaleg ne larawan ni Asira wey te duma pad ne me larawan. Ne nalangetan ka Manama te me matig-Huda wey te me matig-Hirusalim tenged te mareet ne inggimu ran. 19 Ne minsan iling due ka inggimu ran, migpeuyan ded ka Magbebaye te me prupita eyew egpakalibed sikandan kandin. Impanpanayan sikandan te me prupita te mareet ne inggimu ran piru ware sikandan migpammineg kandan.

20  ✡ Mat 23:35; Luk 11:51.Ne in-umaan te Panisingan te Manama si Sakariyas ne anak ni Hihuyada ne talagpanubad. Migsasindeg sikandin diye te tangkaan te me etew wey migkahi, “Eg-inse ka Magbebaye te mania te insupak niyu ka me suhu din? Puun due, kene kew egmatubung. Tenged su in-engkeran niyu ka Manama, in-engkeran kew e degma nikandin.” 21 Ne migplanu sikandan te mareet ki Sakariyas. Ne migsuhu si Hari Huwas ne egbatuwen sikandin taman te egpatey diye te lama te timplu te Magbebaye. 22 Nalingawan ni Hari Huwas ka keupiya te amey ni Sakariyas kandin, purisu impeyimatayan din si Sakariyas. Te egpatey e si Sakariyas, migkahi sikandin, “Egkakita perem te Magbebaye seini wey egsulian kew nikandin.”

23 Te pegbunsud te iyam ne leg‑un, inlusuran si Huwas te me sundalu te matig-Sirya. Inlusuran dan ka Huda wey ka Hirusalim wey impangimatayan dan ka me pangulu. Ne impanguyan dan diye te Hari te Damasku ka nenaahew ran. 24 Ne minsan deisek de ka me sundalu te me matig-Sirya, imbulihan sikandan te Magbebaye ne egkatalu ran ka susuluhi ne sundalu te Huda. Su in-engkeran dan ma ka Magbebaye, ka Manama te kaap-apuan dan. Purisu inlegparan si Huwas pinaahi te me sundalu te Sirya. 25 Ne in-engkeran te me sundalu ne me matig-Sirya si Huwas ne tahapali e. Piru nasi migplanu kandin te mareet ka me upisyal rin tenged te pegpeyimatey rin te anak ni Hihuyada ne talagpanubad. Purisu, inggimatayan dan si Huwas diye te hibatanan din. Insabal ran sikandin diye te Siyudad ni Dabid piru kene ne diye te sabalanan te me Hari. 26 Seini ka me etew ne migplanu te mareet ki Huwas: si Sabad ne anak ni Simit ne malitan ne Amunihanen, wey si Hihusabad ne anak ni Simrit ne malitan ne Muwabihanen.

27 Ka me guhuren meyitenged te me anak ni Huwas, te me tagne kandin, wey te peg-ayad-ayad te timplu te Manama, nasulat diye te Sulatanan te me Guhuren te me Hari. Ne si Amasiyas ne anak din ka migsubal kandin mighari.