1 Te seeye ne timpu, si Daryu ne matig-Midiyan ne anak ni Aswiru iyan Hari te intiru ne Babilunya. 2  ✡ Hir 25:11; 29:10.Te an-anayan ne leg‑un te peghari din, sikeddi si Danyil, imbasa kud ka me baseen, ne due baseen dutu ne impakita te Magbebaye ne Manama diye ki prupita Hirimiyas. Ne dutun ku nanengnengi ne ka pegkahuhus te Hirusalim egkataman te pitu ne pulu (70) ne leg‑un.

3 Ne dutu, migpangananey a te Magbebaye ne Manama pinaahi te peg-ampu, pegpuasa, wey pegsaluub te saku* Iyan igpasabut kayi ka meitem wey egdehes ne manggad ne inggimu puun te bulbul te kambing ne igsaluub te timpu te peglungku wey ke eg-inniyug naa te sale. wey pegpamukbuk te abu te ulu ku. 4 Mig-ampu a wey migpangguhud a te me sale ney te miggenendue, “He, Magbebaye ne Manama, maresen ka wey igkaaldek ne Manama. Intuman nu ka me saad nu wey impapitew nu te geyinawa ne kene egkabalbalawan seeye se miggeyinawa keykew wey migtuman te me suhu nu. 5 Nakasale key keykew te peggimu ney te mareet wey te pegsupak ney keykew, wey te pegbalahad ney te me suhu nu wey balaud. 6 Ware key migpammineg te me suluhuanen nu ne me prupita, ne insuhu nu ne egpakiglalag te me Hari ney, te me pangulu ney, te me kabuybuyahan ney, wey te langun ne etew te nasud. 7 Matareng ka, Magbebaye, piru mekeyilew-hilew key mule minsan kuntee. Mekeyilew-hilew key langun ne me etew lagkes ka keet-etawan te Huda wey te Hirusalim, wey ka me kabuhalan ni Israil ne intalagtag nu diye te marani wey diye te mariyu ne me inged tenged te pegsupak dan keykew. 8 Mekeyilew-hilew key Magbebaye ne Manama lagkes ka me Hari ney, ka me pangulu ney, wey ka me kabuybuyahan ney tenged su nakasale key keykew.

9 “Piru hiid‑uwen wey mapasayluwen ka, Magbebaye ne Manama minsan se migsupak key keykew. 10 Ware key migpammineg keykew wey ke migtuman naa te me balaud nu ne imbehey nu kanami pinaahi te me suluhuanen nu ne me prupita. 11 Migsupak ka langun ne kabuhalan ni Israil te balaud nu, wey migpariyu key e, wey ware ney tumana ka inlalag nu. Tenged te pegpakasale ney, neyingumaan key te pegdilus wey peggukum ne nasulat diye te Balaud ni Muwisis ne suluhuanen nu. 12 Intuman nu ka ingkahi nu kanami wey te me pangulu ney, ne egpasalerepen key nikeykew te masumpit. Ne ware pad iya neyitabu kayi te ampew te tane ne egpekeiling te natamanan te Hirusalim. 13 Migginguma ka langun ne karereetan kayi te kanami sumale te nasulat te Balaud ni Muwisis, piru ware key red iya man‑e migpangananey keykew eyew peg-engked te me sale ney, wey imbalahad ney ka kamalehetan. 14 Ne sikeykew Magbebaye ne Manama ka mig-andam te karereetan, wey impaneem-neem nu seini kanami tenged su matareng ka te langun ne eggimuwen piru ware key migtuman keykew.

15 “Na kuntee, sikeykew ka Magbebaye ne Manama ney, ne iyan migluwas te keet-etawan nu puun te Ihiptu pinaahi te geem nu, wey neyimu ka ne mabantug taman kuntee. Piru nakasale key wey miggimu te subla ne mareet. 16 Puun te pegkamatareng nu, migpeyid‑u-hid‑u key ne egkaawe e ka belu wey langet nu te Hirusalim, ka siyudad nu ne diye te matulus ne bubungan. Tenged te sale ney wey te mareet ne neyimu te me kabuybuyahan ney, inlemetan key te me etew ne nakalingut kanami wey inlemetan dan degma ka Hirusalim. 17 Purisu pammineha nu kuntee Manama ka peg-ampu wey pegpeyid‑u-hid‑u ku isip suluhuanen nu. Ne eyew egkareyrey ka, ay-ayari nu† Te Hibruwanen: tenged keykew Magbebaye ne Manama, ipalayag nu ka ulaula nu. ka timplu nu ne nahuhus e. 18 E Manama ku, pammineha key wey pitawa nu ka keyirapan ney wey ka pegkahuhus te siyudad nu. Kene ne iyan egpuunan ne egpangananey key keykew su matareng key, ke kene, puun su amana ka ne hiid‑uwen. 19 Pammineha key Magbebaye ne Manama, pasayluwa key, wey bulihi key e nikeykew. Para keykew Manama ku, kene kad lamu-lamu tenged su ka siyudad nu wey ka keet-etawan nu, ingngaran ma te ngaran nu.”

20 Migpabulus a ka eg-ampu wey egpangguhud te sale ku wey te sale te keet-etawan ku ne me kabuhalan ni Israil. Migpangananey a te Magbebaye ne Manama ku ne igpalibed din ded igpasasindeg ka matulus ne bubungan din. 21  ✡ Luk 1:19,26.Taheed te eg-ampu e pad, nakita ku si Gabril ne miglayang peendini te keddi. Sikandin ka nakita ku dengan diye te taheinep ku. Timpu seeye te pegpanubad te maapun. 22 Migparani sikandin keddi wey migkahi, “Danyil, miggendini a eyew egpasabuten ka wey egpataheen meyitenged te impakita te Manama keykew. 23 Te sikan ke pad migbunsud ka egpangananey te Manama, intabak kad e nikandin. Ne sika iya ka innendini ku eyew te pegguhud keykew meyitenged kayi, tenged su amana ka geyinawei te Manama. Purisu pammineg ka su eyew egkasabut nu ka impakita keykew.

24 “Ingkerew te Manama ne 490 ne leg‑un ne egkataman e ka peggimu te sale te me etew wey te matulus ne siyudad din. Egpasayluwen e sikandan eyew igpeyingume e te Manama ka katareng ne ware egtamanan, wey eyew egkapamalehetan e ka impakita te Manama wey ka inlalag te prupita, wey eyew igpakahalad e man‑e ka timplu te Manama.‡ Te Hibruwanen: matulus ne inged. 25 Keilangan ne egkatahaan nu wey egkasabut nu ne eglihad pad ka 49 ne leg‑un puun te pegkahi te Manama ne igpasasindeg ded ka Hirusalim, taman te eglepew e ka in-alam din. Ne eglihad pad man‑e ka 434 ne me leg‑un human egpakasasindeg ka Hirusalim ne due plasa wey matikang wey maluag ne alad ne batu. Piru timpu seini te due samuk. 26 Pegkeimpus te sika ne me leg‑un, eggimatayan e ka in-alam te Manama wey hendue te ware neimpusan din. Egguhusen te me sakup te Hari ne egginguma ka siyudad wey ka timplu, piru egginguma ka katamanan kayi ne egpekeiling te baggiyu. Ne egpabulus taman te katamanan ka gubut su ingkerew e te Manama ka karereetan. 27  ✡ Dan 11:31; 12:11; Mat 24:15; Mar 13:14.Seeye ne Hari eggimu te maresen ne kasabutan te masulug ne me etew seled te pitu ne leg‑un. Piru te peglihad te tatelu ne leg‑un wey liware, egpasanggelen din ka pegpanubad wey peghalad. Ne egtahu sikandin te sabeka ne makaalat-halat ne ‘talagdereet ne lilinditi’ diye te timplu. Egpabulus seini taman te eggingume e ka katammanan ne intahahe te Manama kandin.”