1  ✡ Imp 12:7; Mat 24:21; Mar 13:19; Imp 7:14; 12:7.“Te seeye ne timpu, eglepew si Migil, ka maresen ne pangulu te me panalihan ne iyan ka talagtameng te keet-etawan te Israil. Ne egginguma ka timpu te samuk ne ware pad iya neyitabu bunsud te duen e nasud taman te sika ne timpu. Piru egkaluwas ka duma nu ne me keet-etawan ne nasulat se me ngaran diye te Libru te Manama. 2  ✡ Isa 26:19; Mat 25:46; Huw 5:29.Masulug te seeye se nammatey ne inlebeng e, ne egkengeuyag. Ka duma kandan egbehayan te umul ne ware egtamanan wey ka duma kandan egpakarawat te ware egtamanan ne pegkeyilew. 3 Ka seeye se me matagseb, egsiha iling kalayag te langit. Ka seeye se nakabagget te masulug ne etew ne egmatareng, egsiha iling te me bituen taman te ware egtamanan.

4  ✡ Imp 22:10.“Piru Danyil, kene nu pa ipangguhud ka lalag te seini ne baseen wey kene nu pa belata taman te katammanan ne timpu. Masulug ne etew ka eggendiye te minsan hendei eyew te pegsabut due.”

5 Te pegpitew ku, duen e man‑e nakita ku ne daruwa ne etew ne migsasindeg diye te tagse ilis te weyig. 6 Mig-inse ka sabeka kandan te seeye se migsaluub te hinabel ne migsasindeg diye te ampew te weyig ne migkahi, “Mamenu pad kaluhey ka katammanan te seini se me kein-inuwan?”

7  ✡ Imp 10:5; Imp 12:14.Ingkayew te etew ne migsaluub te hinabel ne migsasindeg diye te ampew te weyig ka me belad din wey narineg ku sikandin ne migpahunlibet te ngaran te Manama ne ware egpatayan. Migkahi sikandin, “Egkatuman sika peglihad te tatelu ne leg‑un wey liware, ke egkataman en iya ka pegdereet te keet-etawan te Manama.”

8 Narineg ku ka tabak din piru ware ku nasabut, sikan naa ka mig-insa a kandin, “Ahalen, nekey naan e iya ka egtamanan te seini se langun?”

9 Migtabak sikandin ne miggenendue, “Hipanew kad Danyil su ka tabak te inse nu kene pad igkapanengneng taman te katammanan ne timpu. 10  ✡ Imp 22:11.Ne egmatulusen wey eglinisan te Manama ka masalig ne etew, piru ka me maddeet egpabulus ne eggimu te mareet wey ware sabeka kandan ne egpakasabut. Piru seeye se me matagseb egpakasabut mule.

11  ✡ Dan 9:27; 11:31; Mat 24:15; Mar 13:14.“Puun te timpu ne igpasanggel e ka aldew-aldew ne peghalad, ne iyan sika se pegtahu te makaalat-halat ne ‘talagdereet ne lilinditi’, eglihad pad ka 1,290 ne me aldew. 12 Keupianan te seeye se egtetahad wey egpekeuma te katammanan te 1,335 ne me aldew.

13 “Piru sikeykew Danyil, pabulus ka ne matinumanen taman te katamanan. Egpatey ka piru eg-uyahen ke red te katammanan ne timpu eyew te pegdawat te dasag ne intahahe keykew.”