29
Ka sulat ni Hirimiyas te me Hudiyu ne diye te Babilunya
1 ✡ 2Har 24:12-16; 2Kru 36:10.Ne puun te Hirusalim, insulatan ku ka me talagpanubad, me prupita, me pangulu te me etew, wey ka langun ne impandakep ni Hari Nibukadnisar wey impanguyan diye te Babilunya. 2 Insulat ku seini te narakep e si Hari Huwakin lagkes ka iney rin ne Rayna, ka me upisyal te palasyu, ka me pangulu te Huda wey Hirusalim, ka mangngateu ne me panday, wey ka me trabahanti. 3 Impeuyan ku ka sulat ki Ilasa ne anak ni Sapan wey ki Gimariyas ne anak ni Hilkiyas. Insuhu sikandan ni Sidikiyas ne Hari te Huda ne egpeendiyeen ki Nibukadnisar ne Hari te Babilunya. Seini ka tahu te sulat:
4 Ka Amana ne Maresen ne Magbebaye, ka Manama te Israil, migkahi diye te langun ne matig-Hirusalim ne immarakep din wey immeuyan din ki Nibukadnisar diye te Babilunya, 5 “Bebaley kew te eg-ugpaan niyu. Pamula kew eyew due egkakeen niyu. 6 Pangasawa kew wey panganak-anak kew. Ne paasawaa niyu degma ka me anak niyu eyew egmanganak-anak degma sikandan. Igkeupii ku ne egkabuhal kew wey kene egdeisek. 7 Himuwa niyu ka egpakameupiya te siyudad ne impeendiyaan ku kaniyu isip me dinakep. Ne iampu niyu sika ne siyudad, su emun ke egmatubung e sika ne siyudad, egmatubung kew e degma. 8 Sikeddiey se Magbebaye ne Manama te Israil, egpaney-paney a kaniyu ne kene kew palimbung te me prupita due te kaniyu wey ke me manenagne naa. Kene kew man‑e pammineg te me taheinep dan, 9 su eggamiten dan de ka ngaran ku te egmanagne te ubat. Ware ku suhua sikandan.”
10 ✡ 2Kru 36:21; Hir 25:11; Dan 9:2.Ne migkahi pad man‑e ka Magbebaye, “Emun ke egkapenge e ka pitu ne pulu (70) ne leg‑un ne pegsakup te me matig-Babilunya kaniyu, eggenduenan ku sikaniyu wey egtumanen kud ka insaad ku kaniyu ne igpalibed ku sikaniyu diye te inged niyu. 11 Su sikeddiey se Magbebaye ne Manama, nakataha a te me planu ku para kaniyu—planu para te keupianan niyu wey kene ne karereetan, planu te pegbehey kaniyu te meupiya ne peg-ugpe wey egkapallatengan. 12 Ne egpabulig kew keddiey wey eg-ampu, wey egtabaken ku sikaniyu. 13 ✡ Diy 4:29.Ne emun ke egpamitew kew keddiey te intiru ne pusung niyu, egkakita a nikaniyu. 14 Egkakita a iya nikaniyu, wey igpalibed ku red ka keupianan niyu. Ne eglibulungen ku sikaniyu puun te nalein-lein ne me nasud wey te me inged ne impandeldelan ku kaniyu. Igpalibed ku red sikaniyu diye te inged ne in-ugpaan niyu te ware ku pad sikaniyu iparakep.
15 “Ne migkahi kew te impeuyanan ku sikaniyu te me prupita diye te Babilunya, 16 piru seini ka inlalag ku meyitenged te Hari ne migpangulu te migharian ni Dabid, wey te langun ne etew ne mig-ugpe te siyudad te Hirusalim, ne ware narakep duma kaniyu: 17 Igpasalerep ku sikandan te gira, gutas, wey me dalu. Ne egpekeiling e sikandan te nammewu ne behas te iggira ne kenad egkakeen. 18 Igpasalerep ku sikandan te gira, gutas, wey me dalu, wey egkengaaldek ka langun ne migharian te kalibutan tenged te egkeyitabu kandan. Ne egpandeldelen kud sikandan diye te nalein-lein ne me nasud, wey egdirilusen e sikandan diye wey egderali-dian. 19 Egkeyitabu seini su ware ma sikandan migpalintutuu te inlalag ku pinaahi te me suluhuanen ku ne me prupita ne insuhu ku layun diye te kandan.
20 “Purisu pammineg kew te eglalahen ku! Sikaniyu se langun ne immarakep ku puun te Hirusalim peendiye te Babilunya.”
21 Migkahi ka Amana ne Maresen ne Magbebaye, ka Manama te Israil meyitenged ki Ahab ne anak ni Kulayas wey ki Sidikiyas ne anak ni Maasiyas, “Ka seini ne me etew migmanagne te ubat pinaahi te ngaran ku. Sikan naa ka igbehey kud sikandan ki Nibukadnisar ne Hari te Babilunya, wey eggimatayan din sikandan diye te tangkaan niyu. 22 Ne tenged kandan, ka langun ne naddakep ne me matig-Huda ne impanguyan diye te Babilunya, eggamit e te seini ne pegdilus ke egdilus sikandan te duma ne eggenendue, ‘Eg-ilingen kew perem te Magbebaye ki Sidikiyas wey ki Ahab te manekal re due ne insilaban te Hari te Babilunya!’ 23 Egkeyitabu seini kandan tenged te me keungelan ne inggimu ran diye te Israil. Migpanlibug sikandan wey inggamit dan ka ngaran ku te egmanguubat. Ware ku suhua sikandan ne eggimu due. Nakataha a te inggimu ran wey egpakapamalehet a kayi. Sikeddiey se Magbebaye ne Manama ka miglalag kayi.”
Ka sulat ni Simayas
24 Ne ingkahiyan a te Magbebaye, “Kahii nu si Simayas ne matig-Nihilam* Te seini ne timpu, diye te Babilunya si Simayas. 25 te migkahi a se Amana ne Maresen ne Magbebaye, ka Manama te Israil, ‘Inggamit nu ka katenged nu te egsusulat peendiye te langun ne keet-etawan te Hirusalim, ki Supuniyas ne anak ni Maasiyas ne talagpanubad, wey te langun ne talagpanubad. Te sika ne sulat, migkahi ka ki Supuniyas,
26 “ ‘In-alam ka te Magbebaye ne talagpanubad subal ki Hihuyada, wey sikeykew e kuntee ka labew ne pangulu due te timplu. Katenged nu ka egparusa† Te Hibruwanen: egbakuen wey egbaliehan te putew. te minsan hentew ne ungel ne egpeila ne prupita kun sikandan. 27 Piru mania te ware nu sapari si Hirimiyas ne matig-Anatut ka migpeila kaniyu ne prupita? 28 Migpeuyan sikandin te lalahen diye te Babilunya ne migkahi, “Egkaluhey pad ka pegkaprisu niyu. Keilangan ne bebaley kew te eg-ugpaan niyu, wey pamula kew eyew due egkakeen niyu.” ’ ”
29 Te narawat e ni Supuniyas ne talagpanubad ka sulat ni Simayas, imbasa rin e seini kayi te keddiey. 30 Ne impanengneng ad te Magbebaye, 31 “Ipeuyan nu seini ne guhuren diye te langun ne dinakep. Kahii nu sikandan te migkahi a se Magbebaye ne Manama meyitenged ki Simayas ne matig-Nihilam: Migpakiglalag si Simayas kaniyu ne ubag kun prupita, piru ware ku suhua sikandin. Impepalintutuu kew nikandin te ubat. 32 Purisu egkahi a se Magbebaye ne Manama te eglegparan ku iya si Simayas wey ka me kabuhalan din. Warad iya minsan sabeka te me kabuhalan din ne egpakakita te keupianan ne eggimuwen ku para kaniyu su impanulu kew ma nikandin ne egribildi keddiey. Sikeddiey se Magbebaye ne Manama ka miglalag kayi.”
✡29:1 2Har 24:12-16; 2Kru 36:10.
✡29:10 2Kru 36:21; Hir 25:11; Dan 9:2.
*29:24 Te seini ne timpu, diye te Babilunya si Simayas.
†29:26 Te Hibruwanen: egbakuen wey egbaliehan te putew.