1 Ne migpabulus-bulus si Muwisis ka migkahi te me kabuhalan ni Israil, “Tumana niyu te mapahetpet ka langun ne suhu ne ingkahi ku kaniyu kuntee, eyew egmalayat pad ka umul niyu, egmasulug ka me kabuhalan, wey egpakaangken te Inged ne Insaad te Magbebaye ne Manama diye te me kaap-apuan niyu ne igbehey kaniyu. 2 Sumsumana niyu ne indumaan kew te Magbebaye ne Manama niyu te hipanawan niyu te hep‑at ne pulu (40) ne leg‑un diye te disirtu. Inggimu rin seeye eyew egsalig kew kandin, wey eyew te peg-eleg-eleg kaniyu wey pegnengneng ke nekey ka igkeupii niyu, ke egtumanen niyu naa ka me suhu din wey ke kene. 3  ✡ Mat 4:4; Luk 4:4.Inlised-lised kew nikandin pinaahi te pegpahutas kaniyu, wey nataman, imbehayan kew e man‑e te mana ne egkeenen niyu—pegkeen ne ware niyu re due naherami wey te me kaap-apuan niyu. Inggimu seeye te Manama eyew te pegpanulu kaniyu ne kene ne iyan de igkeuyag te etew ka pegkeen, ke kene, te tagse lalag degma te Manama. 4 Ne te hep‑at ne pulu (40) ne leg‑un ne hipanawan niyu, warad iya naggisi ka me kumbale niyu, wey ware degma nanlebag ka me paa niyu. 5 Ne sumsumana niyu ne egdisiplineen kew te Manama niyu iling te amey ne egdisiplina te me anak din. 6 Purisu tumana niyu ka me suhu te Manama; ikula niyu ka me panulu din wey tahura niyu sikandin, 7 su eg-uyanen kew nikandin diye te meupiya ne tane ne masulug se me beuhan wey me sebseb diye te me bangalug wey me bubungan; 8 tane ne masulug se trigu, sibada, paras, iggira, granada, ulibu, wey teneb. 9 Kene kew egkaawaan te egkakeen, wey te minsan nekey ne diye te seeye ne tane. Ne egpakakuwa kew te me putew diye ne iling de te egmanlaglag kew te me batu, wey egmakakekali kew degma te masulug ne burunsi diye te me bubungan. 10 Egpakakeen kew te minsan nekey ne igkeupii niyu, wey egdayanen niyu ka Manama tenged te pegbehey rin kaniyu te meupiya ne tane.”

11  ✡ Huswi 13:5-6.Ne ingkahiyan e man‑e ni Muwisis ka me kabuhalan ni Israil, “Kene niyu kalingawi ka Manama niyu, wey tumana niyu ka me balaud wey me suhu din ne ingkahi ku kaniyu kuntee. 12 Ne emun ke egkakeen niyud ka langun ne igkeupii niyu te egkeen, egpakabebaley kew e, 13 egmasulug e ka me ayam niyu, me bulawan niyu, wey ka langun ne karatuan niyu, 14 kene kew peggasal. Kene kew kalingew ne me uripen kew dengan diye te Ihiptu, piru ka Manama re ka migpalihawang kaniyu, 15 wey migduma kaniyu diye te luluahi wey makaliyas-liyas ne disirtu ne due egmanggilu ne me uled wey me tapilak. Ware weyig diye ne inged, piru migpalepew sikandin te weyig ne egkeinum niyu puun te sumalem ne batu. 16 Sikandin ka migbehey kaniyu te mana ne egkakeen niyu—pegkeen ne ware de due naherami te me kaap-apuan niyu. Inggimu seeye te Manama eyew egsalig kew kandin, wey eyew te peg-eleg-eleg kaniyu, wey te katamanan, egbehayan kew nikandin te meupiya ne peg-ugpe. 17 Ne kene kew suman-suman te naangken niyu sika ne me karatuan pinaahi te kanekal wey katuenan niyu. 18 Sumsumana niyu ka Manama niyu su sikandin ka migbehey kaniyu te katuenan eyew egkaangken niyu ka karatuan. Inggimu seeye te Manama eyew te pegtuman te insaad din diye te me kaap-apuan niyu. 19 Piru egpanpanayan ku sikaniyu te mapahetpet ne emun ke eglingawan niyu ka Manama niyu, wey iyan niyud egsimbeen ka lein ne me manama, egpangimatayan kew iya te Manama. 20 Ke kene niyu egtumanen ka Manama, egpandereetan kew red degma nikandin iling te me nasud ne egdereetan din ke egpalinggumaan kew e.”