1 “Pammineg kew me kabuhalan ni Israil! Egmanlapas kew e kuntee te Hurdan eyew te pegdeldel te me nasud ne derakel wey me madmaresen pad kaniyu. Malluag ka me siyudad dan ne inlingutan te malig‑en, matikang, wey me makepal ne alad ne batu. 2 Me makeseg wey mallangkew ka me mahinged diye—me eleggasi sikandan ne me kabuhalan ni Anak. Ne sumale te nanengnengan niyu, ware egpakasukul kandan. 3 Piru kuntee, egkakita niyu ne eggun‑a kaniyu eglapas te Hurdan ka Magbebaye ne Manama niyu, iling te hapuy ne egsilab te me kuntere niyu. Egtaluwen din sikandan ke egpalinggumaan kew e, eyew malemu re ne egpandeldelen niyu sikandan sumale te insaad kaniyu te Magbebaye.

4 “Ne emun ke egkaddeldel e te Magbebaye ne Manama ka me kuntere niyu ke egpalinggumaan kew e, kene kew suman-suman te, ‘In-uyan ki te Magbebaye ne Manama eyew te peg-angken te seini ne inged tenged su matareng ki.’ Kene ne sika. Impandeldel sikandan te Magbebaye ne Manama tenged te maddeet ne hinimuwan dan. 5 Kene ne tenged su matareng kew ne egkaangken niyu ka me nasud dan, ke kene, egpandeldelen sikandan te Magbebaye ne Manama tenged te maddeet ne hinimuwan dan, wey eyew degma te pegtuman te insaad din diye te me kaap-apuan niyu ne ensi Abraham, Isaak, wey si Hakub. 6 Purisu keilangan ne egsumsumanen niyu ne ware ibehey kaniyu te Manama seini se meupiya ne tane eyew egkaangken niyu tenged su me matareng kew, su ka malehet memakehal se me ulu niyu.”

7 Ne ingkahiyan e man‑e ni Muwisis ka me kabuhalan ni Israil, “Sumsumana niyu ne diye te disirtu, inhanggat niyu ka langet te Magbebaye ne Manama niyu. Migmasinupaken kew kandin puun pad te peglihawang niyu te Ihiptu taman kuntee. 8 Ne minsan te diye ki pad te Bubungan ne Sinay, inhanggat niyu ka langet te Magbebaye ne Manama, purisu egpangimatayan kew e perem nikandin. 9  ✡ Iks 24:18.Neyitabu seeye te diya a te bubungan eyew egdawat te kasabutan ne ingkulit te Magbebaye ne Manama diye te malumpayag ne batu. Mig-uugpa a diye taman te hep‑at ne pulu (40) ne aldew wey hep‑at ne pulu (40) ne marusilem. Ne wara a migkeen wey mig-inum te seeye ne me timpu. 10 Ne imbehey e keddi te Magbebaye ne Manama ka daruwa ne malumpayag ne batu ne ingkulitan din te langun ne suhu ne inlalag din kaniyu puun te taliware te hapuy diye te Bubungan ne Sinay taheed te nanlibulung kew diye. 11 Ka daruwa ne malumpayag ne batu ne ingkulitan te Magbebaye ne Manama te kasabutan din, imbehey rin keddi peglihad te hep‑at ne pulu (40) ne aldew wey hep‑at ne pulu (40) ne marusilem.

12 “Ne ingkahiyan a te Magbebaye ne Manama, ‘Enew ka wey dagdahew ka tupang su ka keet-etawan nu ne in-uyan nu puun te Ihiptu, migsupak e keddi. Mahaan de sikandan migsuwey te igkeupii ku ne eg-ikulen* Te Hibruwanen: te dalan ne insuhu ku kandan. dan. Miggimu e sikandan te intunew ne diyus-diyus ne egsimbeen dan.’

13 “Ne ingkahiyan e pad man‑e te Magbebaye ne Manama, ‘Nakita ku ne makehal iya se me ulu te seini ne me etew. 14 Balahara a nikeykew su egpangimatayan ku sikandan eyew egkaawe e ka ngaran dan kayi te ampew te tane. Piru eggimuwen ku mule sikeykew ne kaap-apuan te sabeka ne nasud ne madmaresen pad kandan.’

15 “Ne taheed te nalegleg pad ka bubungan, mig-enew wey migtupang ad ne mig-uyan te daruwa ne malumpayag ne batu ne ingkulitan te kasabutan. 16 Ne nakita ku sikaniyu ne migsupak kew te Magbebaye ne Manama niyu. Migpangimu kew te burunsi ne diyus-diyus ne nati te baka—inlemlemuwan niyu re inniyuhi ka me suhu te Magbebaye ne Manama niyu. 17 Ne imbantulang ku ka daruwa ne malumpayag ne batu diye te tangkaan niyu, wey nenapese e seini. 18 Ne miglangkeb ad e man‑e diye te tangkaan te Magbebaye ne Manama taman te hep‑at ne pulu (40) ne aldew wey hep‑at ne pulu (40) ne marusilem. Ne wara a migkeen wey mig-inum tenged te langun ne sale niyu. Amana ne mareet diye te tangkaan te Manama seini se nati te baka ne inggimu niyu, wey sika ka egpuunan ne nalangetan sikandin. 19  ✡ Hib 12:21.Ne naaldek a ne tenged te langet te Magbebaye ne Manama kaniyu wey ki Aarun, egpangimatayan kew nikandin. Piru migpammineg ded iya man‑e sikandin keddi. 20 Te seeye ne timpu, amana nabelu ka Magbebaye ne Manama ki Aarun, wey eggimatayan din e perem. Piru mig-ampu a degma para ki Aarun te seeye ne timpu. 21 Ne ingkuwa ku ka nati ne baka ne inggimu niyu ne iyan egpuunan ne nakasale kew, wey intunew kud seini te hapuy. Ne nataman impatamtamanan kud seini lupeta, wey insawed kud diye te bangalug ne egtulayasan te weyig puun te bubungan.

22  ✡ Num 11:3; Iks 17:7; Num 11:34.“Ne inhanggat niyu pad iya man‑e ka langet te Magbebaye ne Manama diye te Tabir, Masa, wey diye te Kibrut-Hataaba. 23  ✡ Num 13:17; Diy 1:21; Num 13:31; Diy 1:26; Hib 3:16.Te impaligkat kew e te Magbebaye ne Manama niyu puun te Kadis-Barniya, ingkahiyan kew nikandin te, ‘Hipanew kew e wey angkena niyud ka tane ne imbehey ku kaniyu.’ Piru ware niyu sikandin tumana; ware kew migpalintutuu kandin. 24 Migmasinupaken kew layun te Magbebaye ne Manama puun pad te an-anayan ne neilaan ku sikaniyu.

25 “Purisu miglangkeb a diye te tangkaan te Magbebaye ne Manama taman te hep‑at ne pulu (40) ne aldew wey hep‑at ne pulu (40) ne marusilem su migkahi ma ka Magbebaye ne Manama te egpangimatayan kew nikandin. 26 Ne mig-ampu a diye te Magbebaye ne Manama, ‘He Magbebaye ne Manama, kene nu re ubag sikandan pangimatayi su keet-etawan nu ma sikandan; inluwas nu sikandan wey impalihawang nu puun te Ihiptu pinaahi te dakel ne geem nu. 27 Kene nu linglingaa ka kakehal te me ulu te seini ne me etew wey ka maddeet ne hinimuwan dan. Sumsumana nu ka me suluhuanen nu ne ensi Abraham, Isaak, wey si Hakub. 28 Emun ke egpangimatayan nu sikandan, kema ke egpakakahi ka me Ihiptuhanen te, “Ware sikandan neuyan te Magbebaye ne Manama diye te Inged ne Insaad din kandan, purisu diye din naan de uyana te disirtu eyew egpangimatayan din diye tenged su nabelu sikandin kandan.” 29 Me keet-etawan nu sikandan ne impalihawang nu puun te Ihiptu pinaahi te dakel ne geem nu.’ ”