1 Ka anuhang ni Muwisis ne si Hitru ne talagpanubad diye te Midiyan, nakarineg te langun ne inggimu te Manama ki Muwisis wey te keet-etawan din ne me kabuhalan ni Israil. Nakarineg sikandin ke immenu sikandan te Magbebaye ne Manama te egpaawe ligkat te Ihiptu. 2  ✡ Iks 2:21-22.Sikan naa, migpanumbaley sikandin ki Muwisis wey induma rin ka anak din ne si Sipura, ka asawa ni Muwisis ne impeuli din diye te kandan. 3  ✡ Him 7:29.Induma rin degma ka daruwa ne anak ni Sipura ne si Hirsum wey si Ilisir. Ingngaranan ni Muwisis ka panganey ne anak din ki Hirsum, su migkahi sikandin te peglesut te bate, “Lapu e re te seini ne inged.” 4 Ingngaranan din degma ki Ilisir ka inggiba, su migkahi sikandin te peglesut te bate, “Ka Manama te kaap-apuan ku ka migbulig wey ka migluwas keddi puun te kampilan te Paraun ne Hari te Ihiptu.”

5 Ne miggendiyad ensi Hitru te ingkampuwan enni Muwisis diye te disirtu ne diye te bubungan te Manama. 6 Tapey e patahaa ni Hitru si Muwisis te egpanumbaley sikandin wey egdumeen din ka anak din wey ka daruwa ne apu din. 7 Sikan naa ka insinug-ung ni Muwisis sikandan wey mig-usengul sikandin diye te tangkaan te anuhang din wey inggarekan din sikandin. Migmeel-elitey sikandan, nataman, naneled e sikandan diye te leeb ni Muwisis. 8 Ne dutu, impanugtulan e ni Muwisis ka anuhang din te langun ne inggimu te Magbebaye ne Manama diye te Paraun wey te me Ihiptuhanen eyew egpangabangan din ka me Hibruwanen. Ingguhud degma ni Muwisis ka langun ne keyirapan ne nabayaan dan diye te deralanen, wey ke immenu sikandan te Manama te egluwas. 9 Nahale amana si Hitru tenged te langun ne meupiya ne inggimu te Manama diye te me Hibruwanen, wey te pegluwas din kandan puun te me Ihiptuhanen. 10 Migkahi si Hitru, “Egdayanen ka Magbebaye ne Manama ne migluwas kaniyu wey te me keet-etawan puun te me Ihiptuhanen wey te Paraun. 11 Kuntee natahaan kud e ne maresen iya ka Manama te langun ne me manama, su inluwas din ka me etew puun te me Ihiptuhanen ne mig-ayu-ayu kandan.” 12 Ne migtutung si Hitru te impanubad din wey te duma pad ne me dasag diye te Manama. Ne dutu, miggingume e degma si Aarun duma te langun ne igbuyag te me etew, wey miglagpu sikandan ki Hitru ka migkeen diye te tangkaan te Manama.

13 Te napawe e, migpinnuu si Muwisis diye te tangkaan te me etew eyew eggusayen din sikandan. Ne miglarey sikandin te aldew ka miggusey te me etew ne migmasinsinunduley peendiye te kandin. 14 Te nakita te anuhang ni Muwisis ne sikandin de langun ka eggusey te me etew, mig-insaan din e sikandin, “Nekey seini se eggimuwen nu diye te me etew? Mania te migsabsabeka ke re kayi ka egpinpinnuu wey egkaapunan e ka me etew ne eg-alungut keykew?”

15 Ne migtabak si Muwisis te anuhang din, “Inggimu ku seini su nangendini te keddiey ka me etew eyew egnengneng te igkeupii te Manama. 16 Emun ke due igmekeg-apul ran, eggendini sikandan keddi wey eggusayen ku sikandan. Ne egpanengnengen ku man‑e sikandan meyitenged te me suhu te Manama wey te me balaud din.”

17 Ne migkahiyan si Muwisis te anuhang din, “Kene ne meupiya seini se inggimu nu. 18 Egkabaybayaran ka wey ka me etew ne egmangendini te keykew, su mabehat keykew ka seini ne himu. Kene nu egkeyimu seini ke sikeykew re. 19 Kema pammineg ka su due igtambag ku keykew, wey ka Manama ka egduma keykew! Keilangan ne sikeykew ka egsasindeg diye te tangkaan te Manama para te me etew, wey ipeyinguma nu diye te kandin ka me samuk dan. 20 Keilangan ne igpanulu nu kandan ka me suhu din wey ka me balaud din, wey panengnenga nu sikandan te eleg ne peg-ugpe wey te eleg ne eggimuwen dan. 21 Piru alam ka te me etew ne egpakabulig keykew. Keilangan ne due pegkaaldek dan te Manama, egkasalihan, egkateu ne eggusey, wey kene egdawat te igbayad eyew igbunbun te mareet. Himuwa nu sikandan ne me pangulu te tigsenge-libu (1,000) ne me etew, tigmahatus (100), tiglalimma ne pulu (50), wey tigsapulu (10). 22 Ne sikandan e ka egpewusayen te me etew, piru keilangan ne igpeyinguma ran diye te keykew ka derakel ne me prublima wey iyan dan de eggusayen ka dereisek ne me samuk. Puun due, egmaagkap de ka himu nu wey egkabulihan ka nikandan. 23 Ke egtumanen nu ka tambag ku, wey ke sika iya ka igsuhu te Manama keykew, kene ka egkabaybayaran wey egpekeuli degma ka seini ne me etew diye te kandan ne warad igkabantali.”

24 Ne intuman ni Muwisis ka langun ne intambag kandin te anuhang din. 25 Mig-alam sikandin te egkateu ne me etew ligkat te keet-etawan wey impepangulu rin sikandan te tigsenge-libu (1,000), tigmahatus (100), tiglalimma ne pulu (50), wey tigsapulu (10) ne me etew. 26 Ne nateil e sikandan ne me talaggusey te me etew, piru impeyinguma ran diye te ki Muwisis ka derakel ne me prublima, wey sikandan de ka miggusey te dereisek de ne me samuk.

27 Nataman, impaligkat e ni Muwisis ka anuhang din wey mig-uli e diye te inged din.