1-2 Nataman, mig-awe e man‑e ka me kabuhalan ni Israil diye te Ripidim wey migginguma diye te disirtu ne diye te Bubungan ne Sinay. Ne diye sikandan nangekampu te lenlen te bubungan. Igkatatelu e seeye ne bulan ligkat te peg-awe dan puun te Ihiptu.

3 Ne migtakereg si Muwisis diye te bubungan eyew egpakigkita te Manama.

Ne in-umew sikandin te Magbebaye ne Manama diye te bubungan wey migkahiyan, “Inangen nu seini te me anak ni Hakub, pangguhuri nu ka me kabuhalan ni Israil. 4 Namelmelehan niyu ke nekey ka inggimu ku te me Ihiptuhanen wey ke immenu ku sikaniyu te eg-uyan kayi te keddiey. Nekeiling a te banug ne mig-uyan kaniyu iling te me pispis. 5  ✡ 1Pid 2:9.✡ Diy 4:20; 7:6; 14:2; 26:18; Tit 2:14.Na, emun ke eggeteng-geteng kew egtuman keddiey wey egpalintutuuwen niyu ka inggimu ku ne kasabutan, eg-alamen ku sikaniyu te langun ne me etew* Te Hibruwanen: nasud. wey eggimuwen ku sikaniyu ne keet-etawan ku. Su minsan keddi ka intiru ne kalibutan, 6  ✡ Imp 1:6; 5:10.piru eggimuwen ku sikaniyu ne sabeka ne migharian te me talagpanubad wey matulus ne keet-etawan.† Te Hibruwanen: nasud. Sika ilalag nu te me kabuhalan ni Israil.” 7 Purisu miglibed si Muwisis wey impeumew rin ka me igbuyag te me etew, wey innangenan din sikandan te langun ne insuhu kandin te Magbebaye ne Manama. 8 Ne naamin sikandan langun ka migkahi, “Eggimuwen ney ka langun ne insuhu te Magbebaye ne Manama.” Ne ingguhuran ni Muwisis ka Manama te intabak te me etew.

9 Ne migkahiyan te Manama si Muwisis, “Eggenduen a te keykew ne egkabukusan te makepal ne gapun eyew egpakarineg ka me etew keddi te egpakiglalag keykew, wey eyew egpalintutuu sikandan layun keykew.”

Ne impanugtulan e ni Muwisis ka Manama te inlalag te me etew. 10 Ne migkahiyan te Manama si Muwisis, “Hendiyei nu ka me etew wey banasali nu sikandan ne egmalinis puun kuntee taman kaaselem. Keilangan ne egpami‑pian dan ka me kumbale dan, 11 wey paandama nu ikaruwa su siak se Magbebaye ne Manama, egpamaneug a diye te Bubungan ne Sinay eyew egkakita a te langun ne etew. 12  ✡ Hib 12:18-20.Linguta nu naa ka bubungan te egtahu te eletanan wey kahii nu ka me etew te kene egpatakerehen te bubungan wey kene egpasamsamen te minsan nekey diye te eletanan. Eggimatayan seeye se egsamsam, 13 etew ma wey ke ayam. Ka egkeyimatayan tenged due, kene degma egpahen-genan minsan pad ke ayam de ka migpatey, su minsan hentew ne egpakahen-gen, egbatuwen wey ke egpaneen naa. Ne mesi egkarineg niyud e ka trumpita ne igparahing te mananey, human nu pa patakereha ka me etew.” 14 Seeye naa, migpatupang e si Muwisis te bubungan peendiye te me etew wey impaandam din e sikandan eyew egsimba. Ne impami‑pian dan e ka me kumbale dan. 15 Ne migkahiyan ni Muwisis ka me etew, “Pangandam kew ikaruwa, wey kene kew pa hulid te asawa niyu.”

16  ✡ Imp 4:5.✡ Diy 4:11-12.Te napawe te igkatelu e ne aldew, migluluhung wey migkikilat. Ne due makepal ne gapun diye te ampew te bubungan wey due degma dahing te amana ne marahing ne trumpita. Ne dutu, nangelkel te liyas ka langun ne etew. 17 Ne induma ni Muwisis ka me etew diye te kampu peendiye te pabunsuran te bubungan eyew egtemu te Magbebaye ne Manama, wey diye de iya sikandan nanasindeg. 18 Nabukusan te ebel ka Bubungan ne Sinay su migpamaneug ka Magbebaye ne Manama ne egpekeiling te hapuy wey migtiptipuuk ka ebel iling te kamet ne insilaban.‡ Te Hibruwanen: insugnuwan. Nawelwel man‑e ka bubungan te manekal ne linug. 19 Ne nanasnasian ne migmarahing ka trumpita. Ne miglalag si Muwisis wey intabak sikandin te Manama ne egpekeiling te luhung. 20 Diye migpamaneug ka Manama te ampew te Bubungan ne Sinay, wey impatakereg din si Muwisis diye te ampew. Seeye naa, migtakereg e si Muwisis. 21 Nataman, migkahiyan te Manama si Muwisis, “Tupang ka wey panpanayi nu ka me etew ne kene egpalapasen due te eletanan eyew egpitew keddiey, su masulug ka egpatey kandan. 22 Minsan ka me talagpanubad ne egparani keddiey, keilangan ne malinis sikandan, su ke kene, egparusaan ku sikandan.” 23 Migkahiyan ni Muwisis ka Manama, “Kene egpatakerehen ka me etew kayi su impanpanayan key ma nikeykew ne egtahuan te eletanan ka bubungan wey eg-ileen seeye ne matulus.” 24 Ne migkahi ka Manama, “Tupang ka wey dumaa nu si Aarun kayi. Piru kene nu palapasa te eletanan ka me talagpanubad wey ka me etew eyew kene ku sikandan egdusaan.” 25 Purisu migtupang si Muwisis diye te me etew wey innangenan din sikandan te inlalag te Manama.