1 Ne migkahiyan te Magbebaye ne Manama si Muwisis, 2 “Nangeni nu ka me kabuhalan ni Israil te egpabehayen sikandan langun keddiey te minsan nekey ne igkeupii ran ne igbehey. Sikeykew naa ka egdawat te igbehey ran keddiey 3 ne bulawan, pelata, burunsi, 4 me hinabel ne meilem, malalab, malugtem, wey mahal ne hinabel, hinabel ne ligkat te bulbul te me kambing, 5 me laplap te lukesan ne me karniru ne imbatekan te malalab, me laplap te me kambing, me kayu ne akasya, 6 lana ne igtubil te sulu, me leggu ne eggimuwen ne lana ne ig-itis te ulu wey meemut ne insinsu, 7 mahal ne me batu ne kurnalina, wey duma pad ne mahal ne me batu ne igdayan-dayan te kumbale te talagpanubad ne egngaranan te ipud* Ka ipud iyan ka kumbale ne egpekeiling te sening ne igpagket te Labew ne Talagpanubad diye te kumeng din ke egseled diye te balungbalung. Due hiket ne igsampey diye te pamanayen wey igbanggut diye te kumbale te liwaraan te talagpanubad. wey te hagpi te kumeng te talagpanubad. 8 Ne peyimuwa nu sikandan te balungbalung eyew egpakalemung a kandan te eg-ugpe. 9 Igpapitew ku keykew ka egpeilingan te matulus ne balungbalung ne eg-alaran wey ka langun ne kasangkapan ne igtahu dutu.”

10 “Peyimuwa nu sikandan te Tahuanan te Kasabutan ligkat te kayu ne akasya—lalimma ne dangew ka kalayat, wey tatelu ne dangew ka kaluag, wey tatelu ne dangew ka katikang. 11 Buliti nu te bulawan ka seled wey ka lihawangan te Tahuanan te Kasabutan, wey linguta nu seini te egdayan-dayan te bulawan. 12 Himuwi nu seini te derakel ne sising ne bulawan, wey italinga nu iatul diye te hep‑at ne paa eyew egkaatul te sising ka tagse kakiliran te tahuanan. 13 Ne himu ka te me dullug ne akasya ne igyayung, wey buliti nu degma te bulawan. 14 Iluglug nu seini diye te intalinga ne me sising te tagse kakiliran te Tahuanan te Kasabutan eyew egkayayungan te me etew. 15 Igpatalu re iya diye te me sising ka me dullug ne igyayung wey kenad eg-aween. 16 Ne keilangan ne itahu nu diye te tahuanan ka igbehey ku keykew ne kasabutan.

17  ✡ Hib 9:5.“Ne himuwi nu te bulawan ne supe† Te Hibruwanen: pinnuuwan te himenew. ka Tahuanan te Kasabutan, wey lalimma ne dangew ka kalayat, wey tatelu ne dangew ka kaluag. 18 Ne himuwi nu ka supe te daruwa ne kirubin‡ Ka kirubin, sabeka ne klasi te panalihan ne egpekeiling te mananap ne due pakpak wey belad. ne indekdek ne bulawan, wey pegdangdanga nu te egtahu diye te ampew te supe. 19 Ka sabeka ne kirubin, diye igpagket te pulipusan te supe, wey ka dangeb, diye degma igpagket te limang ne pulipusan. Ig-uney re igpagket te supe ka daruwa ne kirubin eyew egpekegsumpul re. 20 Keilangan ne egpabekalen ka me pakpak te me kirubin ne egpakaralung te supe te Tahuanan te Kasabutan. Keilangan ne egpegtangkeen ka daruwa ne kirubin wey igpeunduk diye te supe. 21 Itahu nu naa diye te seled te Tahuanan te Kasabutan ka igbehey ku keykew ne kasabutan, wey supei nu naa. 22 Ne egpakigkita a wey egpakiglalag a keykew diye te supe te tahuanan, diye te taliware te me kirubin, eyew igpakabehey ku keykew ka langun ne balaud para te me kabuhalan ni Israil.”

23 “Kuwa ka te kayu ne akasya wey himu ka te lamisa ne hep‑at ne dangew ka kalayat, wey daruwa ne dangew ka kaluag, wey tatelu ne dangew ka katikang. 24 Buliti nu seini te bulawan wey linguta nu te egdayan-dayan te bulawan. 25 Talingei nu ka lamisa te me senge-palad ne tabla, wey linguta nu te egdayan-dayan te bulawan. 26 Himu ka te hep‑at ne derakel ne me sising ne bulawan, wey italinga niyu diye te hep‑at ne paa te lamisa. 27 Ilenged nu te intalinga nu ne tabla ka me sising eyew eglugluhan te igyayung te lamisa. 28 Ne himu ka te me dullug ne akasya ne igyayung, wey buliti nu te bulawan. Sika ka eggamiten te pegtiang te lamisa. 29 Ne himu ka te bulawan ne me kasangkapan diye te lamisa: Me pinggan, me tahuanan te me insinsu, me ubab, wey me pitsil ne eg-itisan te igpanubad ne me inumen. 30  ✡ Lib 24:5-8.Ne keilangan ne itahu nu layun ka paan ne impanubad keddiey diye te lamisa ne diye te tangkaan ku.”

31 “Dekdek ka te bulawan wey himuwa nu ne tahuanan te sulu. Piru keilangan ne ig-uney red igtangen te pabunsuran wey te lawa, ka me ubab, ka me pakew, wey ka me bulak eyew egpekegsumpul re langun. 32 Keilangan ne egtahuan te hen‑em ne pakew diye te lawa te tahuanan te sulu, tigtatelu te tagse kakiliran. 33 Ka tagse pakew, egtahuan te tigtatelu ne ubab ne egpekeiling te bulak te almindras ne migbukadkad wey migderewun. 34 Ne ka lawa te tahuanan te sulu, egtahuan te hep‑at ne ubab ne egpekeiling te bulak te almindras ne migbukadkad wey migderewun. 35 Ne tahui nu te bulak ka diye te diralem te tagse tetemuwan te daruwa ne pakew. 36 Dekdek ka te bulawan wey iyan nu iya himuwa ne me ubbus wey me sugpang. Piru keilangan ne ig-uney red igtangen seini diye te lawa te tahuanan te sulu eyew egpekegsumpul re langun. 37 Ne himu ka te pitu ne lamparilya wey itahu nu diye te tahuanan te sulu eyew egkalayahan ka egkatangkaan te sulu. 38 Ka me lipit wey me tayaan, keilangan ne me bulawan degma. 39 Keilangan ka te me tatelu ne pulu wey lalimma (35) ne kilu ne bulawan te peggimu langun te tahuanan te sulu wey te me kasangkapan te sulu. 40  ✡ Him 7:44; Hib 8:5.Keilangan ne eg-ay-ayaran niyu te eggimu ka langun ne egpekeiling iya te impapitew ku keykew ne egpeilingan kayi te bubungan.”